Read Hadiyya 1Yohaannis Asso 4 Bible Online

1Yohaannis Asso 4 - Hadiyya bible

1Yohaannis Asso 4

¹Iittantakko'oo i qarmanna, «Neese hiraagaano» yitam dut qophphanaan uullanne ki'llo'i bikkina Waa'iinsi asse'anto'oo keenda'e te'im asse'antobee'i keenda'e ikko'isa saarayyitakka'a moo'llehe bagaan ayyaan hundam amma'nnitakkotte.

²Yesuus Kiristoos manchi ihaa waarukkisa amma'nnoo kee'n ayyaan hundim Waa'iinsi waaraakkoo ayyaana. Ki'nnuwwim Waa'iinsi waaru ayyaana eehanninne annanni issitakka'a laqqakkamo.

³Ihukkaarem Yesuus Kiristoos manchi ihaa waarukkisa amma'nnoobee'i kee'n ayyaan hundim Waa'iinsi ihoo'n ki'nnuwwi waaroo'isa macceessakko'i Yesuus Kiristoosina diinakkichchi ayyaana. Ixxim kabadem ka uullanne yookko.

⁴I ooso, ki'nnuwwi Waa'ina oosona'e. Ki'nnuwwi woronne yoo Keesammi Ayyaan ka uulli minaadabanne yoo ayyaaniinsi lobakata loban ihu bikkina ee qophphanaano kaa'llakko'ookko.

⁵Oo «Neese Waa'iinsi asse'ammaammoo keeno» yitam qophphanaan woccamok ka uulli luwwa. Ixxuwwi woccamok ka uulliinsetti ihu bikkina ixxuwwi woccamoka ka uulli manni macceessamo.

⁶Ihukkaarem neese Waa'iinsette. Waa'iinsi ikko'i keenim niinniinsi macceessamo. Waa'iinsette ikkobee'i keen niinniinsi macceessamoyyo. Neese hanqo'i ayyaanaa qophpha'n ayyaanaa eehanninne annanni issinaa lanqoommo.

⁷Iittantakko'oo i qarmanna, iitti waarookkok Waa'iinsette ihu bikkina neesena'i neesem iittammona. Iittamookkok Waa'ina qachcho; Waa'am la'oohane.

⁸Waa'i iitti ihu bikkina iittamoobee'ek hundim Waa'a la'ooyyo.

⁹Neese heer heerina hee'oo heechcha siixxinoommisina Waa'i ixxeka mexxo'i Beetom ka uulla asse'imminne ixxi iitto niina caakkisaa la'isaakko.

¹⁰Iitto yimmi Waa'i neese iittaa ni baaxiilo shiinshoo'isina ixxi Beeto asse'u iitto bagaan neese Waa'a iittinoommi iittooyyo.

¹¹Iittantakko'oo i qarmanna, Waa'i neese kaa'nna iittulas neesena'i neesem iittanchi hasisookko.

¹² Waa'a moo'ukkok ayyim bee'e. Ihukkaarem neesena'i neese iittammumlas Waa'im ni woronne hee'ookko. Ixxi iittim ni woronne wo'mmookko.

¹³Waa'i niina ixxi gaqqi Keesammi Ayyaana uwwu bikkina neese ixxonne hee'nnoommisaa ixxim ni woronne hee'oo'isaa lanqoommo.

¹⁴Waa'i uulli minaadaba gatisaanchi issaa ixxi Beeto asse'ukkisa neese moo'nnaammo; manninam eekka naqqansoommo.

¹⁵Yesuus Waa'i Beeto ihukkisa amma'nnaa naqqasoo hundim Waa'anne hee'ookko. Waa'im ixxonne hee'ookko.

¹⁶Ee bikkina Waa'i neese hinkaa'nna iittuda'e lanqaa amma'nninaammo. Waa'i ixxi gagim iittona'e. Iittinne hee'ookkok hundim Waa'anne hee'ookko. Waa'im ixxonne hee'ookko.

¹⁷Ni woronne iitti wo'mmukkok Waa'i oogaxxi ayyaamonne ixxi illagenne tuulloo'n iggimminne hincinoommisinatte. Ee iggimmam siindeena xannoommok ni heechchi ka uullanne Kiristoos heechcha labaakkoo heechcha hee'nnumlasette.

¹⁸Baddimmi yoo beyyonne guzumo'anchi yoo bikkina ayyim baddoohan ihulas ixxek iitti wo'mmayyo. Wo'm iitti baddimma fissaa uunjoo bikkina iittonne baddimmi bee'e.

¹⁹Waa'i neese gaassaa iittu bikkina neesem iittinoommo.

²⁰Ayyi manchim «Anni Waa'a iittoommane» yukkuuyyi ixxi abbaayyo saboohan ihulas qophphanaancho. Moo'u ixxi abbaayyo iittubee'ek moo'ubee'i Waa'a hinkid iitteena xanoo?

²¹Kiristoos niina uwwu ijaaj «Waa'a iittookkok hundim ixxi abbaayyom iittimmi hasisookko» yoohane.