Read Hadiyya 1Yohaannis Asso 5 Bible Online

1Yohaannis Asso 5 - Hadiyya bible

1Yohaannis Asso 5

¹Yesuus Gatisaanchi Kiristoosatte ihukkisa amma'nnookkok hundim Waa'ina qachcho. Anni Waa'a iittookkok hundim Waa'i oosom iittookko.

²Neese Waa'a iittinaa ixxi ijaajom wonshinumlas Waa'i oosom iittinoommisa lanqoommo.

³ Waa'a iittimmi ixxeka ijaajo wonshimma. Hanqinam ixxek ijaajim kee'mmaallayyo.

⁴Mashka'oomim Waa'iinsi qaramukkok hundim ka uullika jor luwwa kaa'ookko. Neesem ka uulli jor luwwa kaa'nneena xannoommok Kiristoosanne amma'nnimminnette.

⁵Yesuus Waa'i Beet ihukkisa amma'nnoohaanniinsi bagaan ka uullika jor luwwa kaa'eena xanookkok ayyette?

⁶Xammaqancha moo'isoo wo'innee leho moo'isoo xiiginnee waarukkok Yesuus Kiristoosatte. Ixxim waarukkok xale'i wo'innette ihoo'n wo'innettee xiiginnettee. Kukim hanqi ihu bikkina hanqi ihukkisa Keesammi Ayyaan naqqasookko.

⁷Sas naqaashshuwwi yo'o.

⁸Ixxuwwim Ayyaana, wo'oo xiigaa. Oo sasim kuttam luwwi matome.

⁹Waa'i ixxi Beet bikkina kurukkok eehanena'e. Neese manni kurukkoka amma'nninoommi keen inkumlas Waa'i kurukkoka manni kurukkaanniinsi lobakata lonsinaa amma'nnimmi hasisookko.

¹⁰Ee bikkina Waa'i Beetonne amma'nnookkok hundim Waa'i kuru woshsha ixxi wodanonne qoossaa la'ookko. Waa'i Beetonne amma'nnoobee'ek hundim Waa'i ixxi Beet bikkina kuru woshsha amma'nnubee'i bikkina Waa'a qophphanaanchi issaakko.

¹¹ Waa'i niina kurukkok heer heerina hee'oo heechcha ixxi gagim niina uwwukkisa. Ee heechcham siixxineena xannoommok ixxi Beet kollinnette.

¹²Ee bikkina Waa'i Beet yoohaannina hundinam heechchi yookko. Waa'i Beet bee'aannina hundinam heechchi bee'e.

¹³An kaka kitaaboommuullak Waa'i Beetonne amma'nnukkaannina hundinam heer heerina hee'oo heechchi yoo'isa laqqakkamisinatte.

¹⁴Neese Waa'i doo'llisanne mat luwwa uunxinumlas Waa'i macceesoo'isa qoossinaa lanqummi bikkina ixxi illage iggimminne hincinoommo.

¹⁵Neesemdu uunxinummi luwwa Waa'i macceesoo'isa qoossinaa lanqumlas neese uunxinummi luwwa a'llinummisa lanqoommo.

¹⁶Mat amma'nnaanchi abbaayyi lehonne afisoobee'i baaxiilo baxukkuuyyi ki'nnuwwiinsi ayyim moo'uta'n ee abbaayyi bikkina Waa'a uunxona. Waa'im ee lehonne afisoobee'i baaxiilo baxukkaannina heechcha uwwookko. Ihukkaarem lehonne afisoo baaxiil yookko. Lehonne afisoo baaxiilo baxukkaannina «Waa'a uunxehe» yoommoyyo.

¹⁷Jor bax hundim baaxiilo. Ihukkaarem lehonne afisoobee'i baaxiil yookko.

¹⁸Waa'iinsi qaramukkok hundam Waa'i Beet Yesuus Kiristoos egeroo bikkina Sheexaan nakkeena xanooyyo. Ee bikkina Waa'iinsi qaramukkok baaxiilo baxeena xanoobee'isa lanqoommo.

¹⁹Waa'ina ijaajantambee'i ka uulli minaadab Sheexaa'n anganne hee'llamisaa neese Waa'i oos inkummisaa qoossinaa lanqoommo.

²⁰Neese hanqo'i Waa'a qoossinaa lanqoommisina qoossimma uwweena Waa'i Beet Yesuus Kiristoos waarukkisa lanqoommo. Neese yoommine'ek hanqo'i Waa'annettee Waa'i Beet Yesuus Kiristoosannettee. Kiristoos hanqo'i Waa'aa heer heerina hee'oo heechchaa.

²¹I ooso, qophpha'n waa'ina otossimmiinsi ege'llehe.