Read Hadiyya Gassaa'n Kitaaba 1 Bible Online

Gassaa'n Kitaaba 1 - Hadiyya bible

Gassaa'n Kitaaba 1

¹Iyyaas lehaa lasage Isra'ee'l minaadab «Kana'aa'n manna qasimmina ni sulliinsi hinki sulli gaassaa gaadona?» yita'a Waa'a xa'mmito'o.

²Waa'im «Yihuxxi sulli gaassaa gaadona; anim uullooma ixxuwwina higisaa uwwoommo» yukko.

³Yihuxxi sulli ixxuwwina abbaayyuwwi ikko'i Simi'oon sullina «Kaana'aa'n manna qanseena niina sharad ihu uulla maqirem gaandona; ee'isam neesem ki'nnuwwina sharad ihu uulla ki'nnuwwinne gaandoommo» yito'o. Ee bikkina Simi'oon sulli ixxuwwinne maqirem gaaddo'o.

⁴Ee bikkina Yihuxxi sulli gaadukko; Waa'im Kaana'aa'n mannaa Feerze'i mannaa ixxuwwi anganne higisaa uwwukko. Ixxuwwim Beezeeqanne tommi kum manna shito'o.

⁵Adoonbeezeqam ee beyyonne qasso'o. Kaana'aa'n mannaa Feerze'i mannam kaa'llo'o.

⁶Adoonbeezeeqim ixxuwwi illagiinsi gibukko. Ihukkaarem ixxuwwi hollita'a amadda'a ixxi angikaa lokkikaa lob maxxaalluwwa mutto'o.

⁷Adoonbeezeeqim «Angikii lokkikii lob maxxaalluwwi muramaakkoo lamarayyi adilluwwi i maaddiinsi ubu giggira feetta'a ittam hee'llo'o. Ixxuwwanne an baxummi barche'e kaballa Waa'i dabaraa eesennem issaakko» yaa wocukko. Ixxom Yerusaaleema massakko'aare eekke'em lehukko.

⁸Yihuxxi sulli Yerusaalee'm beero'o qassa'a amaddo'o. Ee beero'i mannam bisa'inne guullita'a beero'ooma giirinne shokkiisso'o.

⁹Ee lasage Yihuxxi sulli duunaam ullanne, Neegeebannee qaala'i uullannee hee'llam Kana'aa'n manna qasseena gaaddo'o.

¹⁰Yihuxxi sulli odim gaassi «Qiiryaat Arba'a» yakkam Keebiroon beero'onne hee'llam Kana'aa'n manna qasseena gaaddo'o. Ixxuwwim Sheeshaayika, Ahiimaanikaa Taalimaay moolloo kaa'llo'o.

¹¹Ee lasage Yihuxxi sulli Daabiiranne hee'llam manninne oranteena gaaddo'o. Ee ammane ee beero'o «Qiiriyaat Seefeera» yakkam hee'akko'o.

¹²Kaaleebim «Gaassaa Qiriyaat Seefeera amadoo manchina i landichchi Aksaame ladiisoommo» yukko.

¹³Kaaleebina hoffi abbaayyi Qaanaaz beet Ootini'eel ee beero'o gaassaa qeefadaa amadukko. Ee bikkina Kaaleeb ixxi landichcho Aksaame ixxena ladiisukko.

¹⁴Ixxuwwi bollochcho'i ayyaamonnem Ootini'eel isena «Kiyyanni kiina abuulli uulla uwwona xa'mme» yukko. Isem is anni Kaaleeba siidda'a hallichchiinsi dillito'i ammanenne Kaaleeb «An kiina maha uwwona hassootto?» yaa xa'mmukko.

¹⁵Isem annina «At iina uwwittok udma'i uulli ihu bikkina wo'i bu'ika hofqaxam uwwe» yito'o. Kaaleebim hanaa'nnekaa woroo'n bu'oo uwwukko.

¹⁶Muse'ena balli hee'u Qeene'i shumo'i Yihuxxi sullinne maqirem dimbaab yoo Yaarko'i beero'iinsi ki'lla'a Yihuxxi uulli Araadiinsi woroo'n qarinne hee'oo gogaalli uulla matta'a Amaaleeq manninne maqirem afuutto'o.

¹⁷Yihuxxi sullim ixxuwwina abbaayyuwwi ikko'i Simi'oon sullinne maqirem gaadda'a Kitaabaat beero'onne hee'oo Kana'aa'n manna kaa'llo'o. Ee beero'om guullita'a bi'issa'a lasage summooma «Hoorima»[1] yito'o.

¹⁸Yihuxxi sulli Gaaza, Asqiloona, Eeqiroonaa ee kululleetanne yoo uulluwwaa edda'a amaddo'o.

¹⁹Waa'im Yihuxxi sullinne maqire hee'u bikkina duunaam uulla kaa'lla'a amaddo'o. Ihukkaarem cebbi uullanne hee'llam mannina xaariinsi baxamaakkoo faraxxi gaarre'uwwi hee'u bikkina Yihuxxi sulli ixxuwwa holliteena xanto'oyyo.

²⁰Muse'e ijaajukkisannem Keebiroo'n beero'i Kaaleebina uwwamukko. Ixxim Anaaq sasem moollom ee beero'iinsi fissaa hollukko.

²¹Ihukkaarem Biiniyaam sulli Yerusaaleemanne hee'oo Iyyaabuus manna fissaa hollukkoyyo. Ee bikkina Iyyaabuus manni kaballi afeebe'em Biiniyaam sullinne maqirem yookko.

²²Yooseef sullim Beeteela qasseena gaaddo'o; Waa'im ixxuwwinne maqire hee'ukko.

²³Ixxuwwim Beetee'l beero'o shaashshitam keeno asse'llo'o. Ee beero'i gaassi summi «Looza» yakkaman hee'ukko.

²⁴Oo shaashshaanim ee beero'iinsi firoo mat mancho siidda'a «Ka beero'o hinkeen aagakkamda'e niina moo'issilas keese hawwondoommoyyo» yito'o.

²⁵Ixxim ixxuwwina beero'o aagakkam googo moo'isukko. Ixxuwwim ee beero'o bisa'inne bi'isso'o; ihukkaarem ee manchinaa ixxi abaroosinaa qishixxito'o.

²⁶Oo manchim Hiite'i manni uulla maraa beero'o baxukko. Ee beero'ikam summa «Looza» yaa weeshukko. Kaballi afeebe'em ee summinne weeshamookko.

²⁷Minaas sulli Beetishaananne, Taa'inaakanne, Dooranne, Yubili'aamanne, Magido'onnee ixxuwwi hegeegguwwanne hee'oo minaadaba fissita'a hollito'bee'i bikkina Kana'aa'n manni ee beero'uwwannem afuutto'o.

²⁸Ihukkaarem Isra'ee'l minaadab malaayyitu'uuyyi matta'a Kana'aa'n manna malaayyi baxo baxxona giddissam hee'llo'o bagaan guullita'a hollito'oyyo.

²⁹Efireem sullim Geezeeranne hee'oo Kana'aa'n minaadaba hollito'oyyi hee'ukko. Ee bikkina Kana'aa'n manni ixxuwwinne maqirem hee'llo'o.

³⁰Zaabiloo'n sullim Qiitiroonannee Naahilaalannee hee'oo manna ho'llito'oyyi hee'ukko. Ee bikkina Kana'aa'n manni ixxuwwinne maqirem hee'llo'o. Ihona bagaan Zaabiloo'n sulli giddinne malaayyi baxo baxissam hee'llo'o.

³¹Ee'isam Aseer sullim Ako'onne, Siidoonanne, Ahilaabanne, Akiziibanne, Heeleebanne, Afeeqannee Rahoobannee hee'oo manna hollito'oyyi hee'ukko.

³²Asee'l sulli Kana'aa'n minaadaba hollitobee'i bikkina ixxuwwinne maqirem hee'llam hee'llo'o.

³³Niftaaleem sullim Beetisheemeeshannee Beeti'aanaatannee hee'oo manna hollito'oyyi hee'llo'o. Ee bikkina Niftaaleem sulli Kana'aa'n manninne maqirem hee'llo'o. Ihukkaarem Kaana'aa'n manna malaayyi baxo baxxona giddissam hee'llo'o.

³⁴Amoore'i manni Daan sullo duunaam uullanne hollito'o; cebbi uullam dilliteena hootto'o.

³⁵Amoore'i minaadab Heerees duunanne, Ayyaaloonannee Sha'aalbiimannee hee'llam hee'llo'o. Ihukkaarem Yooseef sulli ixxuwwi gassi woronnette issita'a malaayyi baxo baxxona giddissam hee'llo'o.

³⁶Amoore'i uulli gabal Aqiraabiim beqeriinsi Seela'iinsi iim yoo kolloo hee'ukko.