Read Hadiyya Gassaa'n Kitaaba 10 Bible Online

Gassaa'n Kitaaba 10 - Hadiyya bible

Gassaa'n Kitaaba 10

¹Abemeeleek lehaa lasage Doodo'ina beet beet Phu'a beet Toola'a Isra'eela gatiseena ki'ukko. Ixxim Yisaakoor sulliinsette ihaa duunaam Efireem uullane Shaamiira yakkam beyyonne hee'ukko.

²Ixxim lamiyyee sas hiinchoo Isra'ee'l minaadaba awwonsaa lasage lehukko; Shaamiirannem waammamukko.

³Toola'aansi lasonne Gala'aaxxi Yaa'iir ki'aa Isra'ee'l minaadaba lamiyyee lam hiinchoo awwonsukko.

⁴Ixxena sad hallanne saa'llita'a jigissam sad goo'n oos hee'llo'o. Ixxuwwinam Gala'aaxxi uullane sad beero'uwwi hee'ukko. Oo beero'uwwi kaballi afeebe'em Yaa'iir gatteewwaa yamamookko.

⁵Yaa'iirim lehaa Qaamoona yakkam beyyonne waammamukko.

⁶Isra'ee'l minaadab Waa'i illagenne odim jor luwwa baxxo'o. Ba'aalaa Astaarootaa ee'isam Sooriy manni, Siidoo'n manni, Moo'aaphphi manni, Aammoo'nnekii Filisxee'm mannii otossitam waa'uwwanne otossito'o. Waa'inam otossimma utto'o.

⁷Ee bikkina Waa'i Isra'ee'l minaadabanne ququkko; Filisxee'mmaanninaa Aamoo'n manninam higisaa uwwukko.

⁸Ixxuwwim Yoordaanoosiinsi eelliinchi firoo kollonne Amoore'i manni uullanne yoo Gala'aadanne hee'llam Isra'ee'l minaadab hundannem kee'mmaa'l hawwo afissu'uuyyi tommoo sadeenti hiinchoo gassito'o.

⁹Amoo'n manni Yihudika, Biiniyaamikaa Efireem sulloo qasseena Yoordaanos daajje fitto'o. Ee bikkina Isra'ee'l minaadab kee'mmaallisa u'nnanto'o.

¹⁰Ee lasage Isra'ee'l minaadab «Waa'a; neese ni Waa'a keese ullaa Ba'aala yakkam qophpha'n waa'uwwina otosimminne keese hawwondammo» yitu'uuyyi Waa'i kollonne laatto'o.

¹¹Waa'im ixxuwwina «Gibxik, Amoore'ik, Amoo'nnek, Fi'lisixee'mmek,

¹²Siidoo'nnek, Amaaleeqikii Maa'oo'n mannii kanniinsi illageen ki'nnuwwa u'nnissu'uuyyi gassito'aare i kollonne laattakko'i ammane an ixxuwwi angiinsi ki'nnuwwa gatisummoyyonnihe?

¹³Ihukkaarem ki'nnuwwi kabad afeebe'em eese uttakka'a qophpha'n waa'uwwina otossitakko'o. Ee bikkina od ki'nnuwwa gatisoommoyyo.

¹⁴Ki'nnuwwi otostakkeena doo'llitakko'i waa'uwwi kolli mattakka'a laallehe. Ixxuwwim ki'nnuwwanne hawwi afoo ammane gatissona» yaa dabarukko.

¹⁵Ihukkaarem Isra'ee'l minaadab Waa'ina «Hanqinam neese keese hawwondaammo; at neesenne doo'llitti luwwi hundam isse; kaballa neese gatise» yito'o.

¹⁶Ee bikkina qophpha'n waa'uwwa ixxuwwi lambe'iinsi fissita'a uunjita'a Waa'ina otossito'o. Waa'im Isra'ee'l adaraalla'n bikkina lobakata kichche'ukko.

¹⁷Ee lasage Amoo'n uulli gogot oranteena gudda'a Gala'aadanne wiiddanto'o. Isra'ee'l mannim wixxita'a Gala'aadanne Misiphpha yakkam beyyonne wiiddanto'o.

¹⁸Ee beyyonnem minaadabii Gala'aadanne Isra'ee'l sulluwwi awwonsaan hundimii «Amoo'n manninne orammummuuyyi neese awwonsookkok ayyette? Ka orina awwonsaanchi ihookkok Gala'aadanne hee'oo manni hundinam awwonsaanchi ihookko» yaqqanto'o.