Read Hadiyya Gassaa'n Kitaaba 11 Bible Online

Gassaa'n Kitaaba 11 - Hadiyya bible

Gassaa'n Kitaaba 11

¹Gala'aaxxi uulli Yooftaahe mat buubbeesaanchoonsi qaramaakkoo geed gaadaanchi hee'ukko. Ixxi annikim summi Gala'aadatte hee'ukko.

²Gala'aad gaassaa eebaakkoo meentichcho ixxena qatto'oo mulli goo'n oos hee'ukko; ixxuwwim li'lla'a lasage ixxuwwi abbaayyi hee'u Yooftaahina «At mulli meentichchoonsi qarantitti bikkina niyyanni luwwika maham lago aa'lleena xantooyyo» yita'a Miniinsi hollito'o.

³Yooftaahem abbaayyuwwiinsi gibaa Xooba yakkam uullanne hee'ukko. Ee beyyonnem ixxo awwaad bee'i hofqax mannim wixxita'a awwonto'o.

⁴Hoffi ammaniinsi lasage Amoo'n manni Isra'ee'l manna qasseena gaaddo'o.

⁵Ookki ihu ammanenne Gala'aaxxi awwonsaan Yooftaaha Xoobiinsi dabatta'a wotteena matto'o.

⁶Ixxuwwim Yooftaahina «Amoo'n minaadabinne orammona waattaa neese awwonse» yito'o.

⁷Ihukkaarem Yooftaahe «Eese ceentakka'a iyyanni miniinsi hollitakko'ok ki'nnuwwayyonnihe? Kaba ki'nnuwwanne hawwi afukkaare i beyyo waattakko'ok mahinatte?» yukko.

⁸Ixxuwwim Yooftaahina «Kaba neese ki kollonne daba'llinaa waallaammo; niinninne gaaddaa Amoo'n manna qassonaa Gala'aaxxi minaadab hundinam awwonsaanchi ikkonaa hansoommo» yito'o.

⁹Yooftaahim Gala'aaxxi lommannina «An Amoo'n manninne oramona mine dabattakka'a massitakka'a lasage Waa'i kaachcha iina uwwoo ammane ki'nnuwwina awwonsaanchi issitakkamonnihe?» yukko.

¹⁰Ixxuwwim «Neese eehannonne iittammaammo; Waa'i neessenne naqaash ihona» yito'o.

¹¹Ee bikkina Yooftaah Gala'aaxxi awwonsaaninne maqirem marukko. Minaadabim ixxo ixxuwwi gassaanchoo awwonsaanchoo issukko. Yooftaahim Misiphpha yakkam beyyonne ee woshshanne iittamukkisa Waa'i illagenne caakkisaa la'isukko.

¹²Ee lasage Yooftaah Amoo'n adi'l beyyo «At niinne wocantittok mahinatte? Ni uulla qassittokdu mahinatte?» yita'a xa'mmitam asse'amaano asse'ukko.

¹³Amoo'n adilim Yooftaah asse'amaanina «Isra'ee'l minaadab Gibxiinsi fitto'i ammane Arnoo'n daajjiinsi ki'isaa Yaabooq daajji afeebe'e yoo i uullaa Yoordaanoos daajjee iinniinsi massitto'o. Ihukkaarem kaba xumminne iina dabarimmi hasisookko» yaa dabarukko.

¹⁴Yooftaahim Amoo'n adi'l beyyo la'mmaaggem asse'amaano asse'ukko.

¹⁵Yooftaahim ixxena «Isra'ee'l minaadab Moo'aaphphanem ihukko Amoo'nneka uullaa massito'oyyo.

¹⁶Isra'ee'l minaadab Gibxiinsi fitto'i ammane udma'i uulla huruutta'a Ertiira'i dambalaqa affo'o. Ee beyyiinsim Qaadeesanne higgo'o.

¹⁷Ee lasage odim ixxi uullinne higimmina Eedoo'm adi'l beyyo asse'amaano asse'llo'o. Ihukkaarem Eedoo'm adil higgeena hoorukko. Ee'isam Moo'aaphphi adilam xa'mmito'o; ixxim higgeena hoorukko. Ee bikkina Isra'ee'l minaadab Qaadeesanne afuutto'o.

¹⁸Udma'i uulla huruutta'a mattu'uuyyi Eedoo'mmekaa Moo'aaphphekaa uulla do'lla'a Moo'aabiinsi eelliinchi firinne Arnoo'n daajji eeqidonne yoo beyyonne waatta'a wiiddanto'o. Ihukkaarem Arnoo'n daajji Moo'aabina gabal ihu bikkina ee daajje fitto'oyyo.

¹⁹Ee lasage Isra'ee'l minaadab Haseeboo'n uullanne ihaa gassoo Amoore'i uulli adil hee'u Siihoon beyyo «Ki uullinne ni gaqqi uulla hingonnihe?» yita'a asse'amaano asse'llo'o.

²⁰Ihukkaarem Siihoon Isra'ee'l minaadab uullinne higga'a mattambee'isa hoorukko. Eehanniinsim Yahaax yakkam beyyonne ixxi googota hundam wixxaa'a Isra'ee'l minaadaba qasukko.

²¹Ihukkaarem Isra'ee'l Moollanni Waa'i, Isra'ee'l minaadab Siihoonaa ixxi googotaa hundam kaa'llamisa issukko. Ee'isinne ee uullanne hee'llam hee'llo'i Amoore'i mannika uulla hundam ixxuwwi gulummi issito'o.

²²Woroo'n qarinne Arnoo'n daajjiinsi ki'isaa hanaa'n qarinne Yaabooq daajjenne afeebe'ee ee'isam eelliinchi firinne udma'iinsi ki'isaa eelliinchi aagganne Yoordaanoos daajjenne afeebe'ee Amoore'i uulla hundam amaddo'o.

²³Ee bikkina ixxi minaadabina Isra'ee'l bikkina Amoore'i manni hollaa fissukkok Isra'ee'l Moollanni Waa'i ixxi gagoomame. Eehaare at dabattaa massiteena hassaatennihe?

²⁴Kiina waa'i Kaamoosh uwwukkoka ammaxxitaa afuuttooyyonnihe? Ihukkaarem ni Moollanni Waa'i niina uwwu luwwi hundam lagidachchinaa hee'nnoommo.

²⁵At Moo'aaphphi adil hee'u Siifoor beet Baalaaqiinsi lophphoommo yitaa sawwitoollannihe? Ixxim Isra'ee'l minaadabinne hore'em uullixamukkoyyo; orameenam iggukkoyyo.

²⁶Ee bikkina sas xibbi hiinchi hundoomam Isra'ee'l minaadab Haseeboonaa ee hegeegoo Aro'eeraa ee hegeegoo ee'isam Arnoo'n daajji gadanonne yoo beero'uwwaa hundam lago aa'lla'a hee'llam hee'llo'o. Eehaare ee doollenne hundannem mahina dabattakka'a hoottakko'oyyo?

²⁷An keese hawwodummoyyo. Ihukkaarem eesenne bagado ki'issaa hawwoddeena ki'llittok atette. Oogataanchi Waa'i Isra'ee'l minaadaphphi lambe'ennee Amoo'n manni lambe'ennee kaballa oogato'o uwwookko» yukko.

²⁸Ihukkaarem Yooftaahika asso Amoo'n adil mahannem xigukkoyyo.

²⁹Ee lasage Waa'i Ayyaan Yooftaahanne dillukko. Yooftaahim Gala'aadaa Minaas uullaa higaa odim Gala'aadanne yoo Misiphphinne aa'aa eeheenim Amoo'n uulla marukko.

³⁰Ixxim Waa'ina «Hanqinam Amoo'n manna i anganne higissaa uwwitlasii

³¹kaachchinne gaadiinsi i mine xumminne daba'llumlasii i miniinsi firaa eese aa'ookkok kiihan ihookko. Ixxo an shokkoo kitim issaa kiina uwwoommo» yaa uga'a aagukko.

³²Ee lasage Yooftaah Amoo'n manninne orameena marukko. Waa'im ixxena kaachcha uwwukko.

³³Aroo'eeriinsi ki'isaa Miiniit kululleetanne yoo lamiyyem beero'uwwaa ee'isam Aabeel karamimmanne afeebe'e yoo beyyuwwaa hundam bi'isukko. Ee'isinne Isra'ee'l minaadabina Amoo'n minaadab ho'llamo.

³⁴Yooftaah Misiphphanne yoo ixxi mine daba'llu ammanenne ixxi landichcho dibbe'inne kaddu'uuyyi ixxo aa'lleena fitto'o. Ixxenam iseensi bagaan landam ihukko goon mulli oos mahim hee'ukkoyyo.

³⁵Ixxim ise moo'u ammanenne lobakata kichche'aa eddechcha dereeraa «Aayye, i landichche! Kichchechchinne i tiiro bi'issitto; eesem u'nnissitto. Mashka'oomim an Waa'ina ‹Uga'a uwwoommo› yaa hide'aammo; ee sagara dabareena xanoommoyyo» yukko.

³⁶Isem ixxena «Iyyanna, uga'a aaggaattoolas Waa'i ki diina'i ikko'i Amoo'n manna baado miqisu bikkina uga'a aaggittisinne eesenne isse!» yito'o.

³⁷Ihukkaarem anna «Kaba an mine isseena xanoombee'i bikkina i beshinne maqirem duunanne firaa daba'llamummuuyyi i baajoo'm bikkina wi'lloona lam agana ihoo qax ammane uwwe» yita'a uunxito'o.

³⁸Ixxim lam aganina mattona geegeesukko. Isem beshinne landinne maqirem duunnuwwanne fitta'a eekke'enne mine issiteena xantambee'i bikkina ixxuwwinnem wi'llito'o.

³⁹Lamem aganim beeddaa lasage is anni mine daba'llito'o; annim Waa'ina aagu uga'a isenne wonshukko. Isem baajaam landichchotte hee'llo'o. Ee ammaniinsi ki'isaa

⁴⁰Isra'ee'l baajaam landi hiinchina hiinchina soor balla ixxuwwi miniinsi qee'llita'a mattu'uuyyi Gala'aaxxi Yooftaah landichchi bikkina kichche'immii wi'llimmii losamaakkoon ihukko.