Read Hadiyya Gassaa'n Kitaaba 12 Bible Online

Gassaa'n Kitaaba 12 - Hadiyya bible

Gassaa'n Kitaaba 12

¹Efireem manni orina gudda'a Yoordaanos dajje fitta'a Xaafoona affa'a Yooftaahina «Amoo'n manninne oranteena mattittuuyyi neese weeshshibee'i mashka'i maruchcho? Neesem kaba ki mine ki hanenne shokkiinsoommo» yito'o.

²Yooftaahim ixxuwwina «Anii i minaadabii Amoo'n manninne maqire qoxxaallisa wocammaa hee'nnummi ammane an ki'nnuwwa weeshaa hee'ummo. Ihukkaarem ki'nnuwwi eese ixxuwwi angiinsi gatissakko'oyyo.

³Ki'nnuwwi iina hara'mmitakkeena ee beyyo mattakkobee'isa la'ummi ammanenne i foorina qishixxoo'n ixxuwwinne orameena gabala higaa marummo. Waa'im ixxuwwa i anganne higisaa uwwukko. Kaba ki'nnuwwi iinninne orantakkeena ki'llakko'i mashka'i maruchcho?» yukko.

⁴Ee lasage Yooftaah Gala'aaxxi manna wixxaa'aa Efireem manninne oramaa kaa'ukko. Mashka'oomim Efireem manni «Ki'nnuwwi Efireemaannonnee Minaas manni uullannee hee'llakkam Gala'aaxxi manni Efireem manna laggakka'a waattakko'o keeno» yitam hee'llo'i bikkinatte.

⁵Efireem manni xottambee'isa Yoordaanos daajje firakkam beyyi hundam Gala'aaxxi manni ifiissa'a amadda'a hee'llo'o. Xoreena yakoo ayyi Efireem manchim «Fironnihe?» yuta'n Gala'aaxxi manni «At Efireem kolli manchonnihe?» yita'a xa'mmitam hee'llo'o. «A'a'e» yulas

⁶«Hino'o, ‹Shiibooleeta› yihe» yitam hee'llo'o; ee sagara xabbaa'aa weesheena xanoobee'i bikkina «Siibooleeta» yam hee'ukko. Ee lasage ixxo amadda'a daajje firakkam beyyuwwiinsi matonne shitam hee'llo. Ee ammane ee'isinne sorii lam kum Efireem mannii beeddukko.

⁷Yooftaah loh hiincho Isra'eelanne awwonsaanchi ihaa lasage lehukko. Ixxi qaramu Gala'aaxxi beero'uwwiinsi matonne waammamukko.

⁸Yooftaah lasagenne Beeteelihee'm Ibsaan Isra'ee'l awwonsaanchi ihukko.

⁹Ixxena sad goo'n oosii sad landii hee'ukko. Ixxim landa Isra'eel ikkobee'i mannina ladiisukko; goo'n oosinam Isra'eel ikkobee'i landa eebukko. Ibsaan lamar hiinchina Isra'eela awwonsukko.

¹⁰Ixxim lehukko; Beetaliheemannem waammamukko.

¹¹Ibsaaniinsi lasonne Zaabiloo'n manchi hee'u Eeloon Isra'ee'l minaadaba tommi hiinchina awwonsukko.

¹²Ee lasage ixxi lehukko; Zaabiloo'n uullanne yoo Ayaaloonannem waammamukko.

¹³Eelooniinsi lasage Phiri'aatoo'n Hiileel beet Abdoon Isra'ee'l awwonsaanchi ihukko.

¹⁴Abdoonina lamarayyi hallane saa'llita'a jigissam sor goo'n oosii sad oos oosii hee'llo'o. Abdoon sadeenti hiincho Isra'eela awwonsukko.

¹⁵Ee lasage Phiri'aatooniinsetti ihoo Hiileel beet Abdoon lehukko. Duunaam Amaaleeq manni uullane Efireem sulli gassoo Phiri'aatoonannem waammamukko.