Read Hadiyya Gassaa'n Kitaaba 13 Bible Online

Gassaa'n Kitaaba 13 - Hadiyya bible

Gassaa'n Kitaaba 13

¹Isra'ee'l minaadab odim Waa'i illagenne jor luwwa baxxo'o. Ee bikkina Waa'i sor hiincho hundam Filisxee'm manni anganne higisaa uwwukko.

²Ee doollenne Xoori'a yakkam beero'onne hee'oo Maanuhe yakkam manchi hee'ukko. Ixxim qaramukkok Daan sulliinsetti hee'ukko; ixxi meentichchom ooso qatobee'i alceennatti hee'llo'o.

³Waa'i asse'amaanchi isena moo'amaa «Oono'o, at alceennatti ikkitti bikkina kiina oos bee'e. Ihukkaarem lamfooretti ikkaa goonchi beeto qattootto.

⁴Ee bikkina woyi'n diqaasaa dinbisoo aggaa ma'llichchom agimmiinsii haashaarammi hurbaata maham itimmiinsii ki gaga ege'lle.

⁵Hanqinam at lam fooretti ikkootto; goonchi beetom qattootto. Oo beetim qaramu balliinsi ki'isaa Waa'ina annanni ihaa Naaziraawekkichchi ihoo bikkina ixxek horoor hore'em hogoossamoone. Ixxim Isra'ee'l minaadaba Filisxee'm manni angiinsi gatisimma asheerookko» yukko.

⁶Ee lasage oo meentichcho waatta'a is aro'ina «Mat Waa'i manchi i beyyo waaraa hee'ukko. Ixxim Waa'ina asse'amaanchisa hore'em baddisoohan hee'ukko. Anim hanniinsi waarude'e xa'mmummoyyo. Ixxi summam kurukkoyyo.

⁷Ihukkaarem ixxi iina ‹At lamfooretti ikkootto; goonchi beetom qattootto; oo qaramoo beetim ixxi umu'l doolli hundoomannem Waa'ina annanni ihaakkoo Naaziraawekkichchi ihoo bikkina woyi'n diqaasaa mulli dinbisoo agga maham agimmiinsii ee'isam haashaarammi hurbaatam itimmiinsii egge'lle› yaa kuraakko» yito'o.

⁸Ee lasage Maanuhe Waa'ina «Moollanna, oo ciilichchi qaramoo ammane neese maha issimmi hasisooda'e kuroo'isina ee at asse'llitti Waa'i mancho la'mmaaggem ni beyyo daba'llaa waaroo'isa isse» yaa uunxukko.

⁹Waa'im Maanuheka uunxatto macceesukko. Waa'i asse'amaanchim la'mmaaggem oo meentichcho abuulli woronne afuutto'oohaannonne moo'amukko. Ee ammane Maanuhe iseenne hee'ukkoyyo.

¹⁰Is aro'i beyyom qaqqissa'a geetta'a matta'a «Oono'o, oonballa i beyyo waaraa hee'u manchi odim iina moo'amukko» yito'o.

¹¹Maanuhem afuuru beyyiinsi ki'aa ixxi meentichcho awwonaa marukko. Ixxim ee manchi beyyo hincaa «Ka meentichchonne atoorattaa hee'llittok atettennihe?» yaa xa'mmukko. Manchim «Eeyya; anette» yaa dabarukko.

¹²Maanuhem «At woccitti woshshi wo'mmoo ammane ee qaramoo ciilina maha issimmi hasisookko?» yaa xa'mmukko.

¹³Waa'i asse'amaanchim «An kurammi luwwi hundam ki meentichcho qoxxita'a ege'llitona.

¹⁴Woyi'n mishaa ixxeeniinsi siidamoo luwwaa maham ittoone. Woyi'n diqaasam ihukko te'im dimbisoo agga maham agoone; haashaarammi hurbaatam ittoone. An ise ijaajummi luwwi hundam egettona» yukko.

¹⁵Oo hundim ihukkuuyyi Maanuhe oo manchi Waa'i asse'amaanchi ihukkisa la'ukkoy hee'ukko. Ee bikkina «Mat fellakkichchi geexa dullaa gudinseembe'i he'i qaqqissaa mattitte» yaa uunxukko. Ihukkaarem oo asse'amaanchi «An egerummaarem ki hurbaata itoommoyyo. Ihoona bagaan gudisseena shokkiisakka'a hincaa'akkam kitima gudisseena hassilas Waa'ina hincaa'e» yukko.

¹⁷Odim Maanuhe «At yitti luwwi wo'mmoo ammane keese galaxxinoommisina ki summi ayyette?» yaa xa'mmukko.

¹⁸Oo asse'amaanchim «I summa mahina xa'mmitto? I summi maalalisiisootte» yaa dabarukko.

¹⁹Ee lasage Maanuhe mat fellakkichchi geexaa hurbaatiinsi Waa'ina uwwakkamokaa massaa kiti'm kinanne Waa'ina kitim issaa hincaa'ukko. Maanuhee ixxi meentichchoo moo'amukkuuyyim Waa'i maalalsiisoo luwwa baxukko.

²⁰Ee kiti'm beyyiinsi laban iim firu ammanenne oo Waa'ina asse'amaanchi ee kiti'm laba'n worinne iimane firukko. Ixxuwwim eekka moo'amaa illillaachcha uullanne ubamukko.

²¹Waa'ina asse'amaanchi Maanuhenaa ixxi meentichchonaa od moo'amukkoyyo. Ee ammanenne Maanuhe ookki Waa'ina asse'amaanchi ihukkisa la'ukko.

²²Maanuhe ixxi meentichchona «Neese Waa'a moo'nnummi bikkina hanqinam lenoommo» yukko.

²³Ihukkaarem ixxi meentichcho «Waa'i neese shoota'n niikka shokkiisakka'a hincaa'akkam kitimaa hurbaaxxi kitimaa ni angiinsi aa'am hee'ukkoyyo. Odim ka luwwi hundam moo'isam hee'ukkoyyo. Kido'i luwwam niina kuram hee'ukkoyyo» yito'o.

²⁴Meentichchom goonchi beeto qatto'o. Beet summam «Somsoona» yita'a weeshsho'o. Beetim li'ukko; Waa'im ixxo maasse'ukko.

²⁵Xoora'inaa Eshtaa'oolinaa lambe'enne yoo Daan sulli hee'oo gattenne hee'ukkuuyyi Waa'ik Ayyaan ixxo naashaaxisimma asheerukko.