Read Hadiyya Gassaa'n Kitaaba 14 Bible Online

Gassaa'n Kitaaba 14 - Hadiyya bible

Gassaa'n Kitaaba 14

¹Mat balla Somsoon Tiimina yakam beero'o dillukko. Eehe'em Filisxee'm landiinsi mate moo'ukko.

²Ixxim mine daba'llaa ixxi anninaa amanaa «Tiiminanne Filisxee'm manniinsi mat landichcho moo'aa ise iittaammo. Ee bikkina xeekkakka'a ise iina eebbehe» yukko.

³Ihukkaarem annii amaa «Landina ballachchamubee'i Filisxee'm manni beyyo mattoottok ki moollonne te'im ni minaadaphphi lambe'enne landa hooggaatennihe?» yita'a xa'mmito'o. Ihukkaarem Somsoon annina «I illenne aaggo'i bikkina ise iina eebe» yukko.

⁴Somsoon eekka issoo'isina awwonsam hee'ukkok Waa'i ihukkisa ixxi annii amaa laqqo'oyyi hee'ukko. Ee ammane Filisxee'm manni Isra'ee'l minaadaba ijaajja'a gassitam hee'llo'i bikkina Waa'i Filisxee'm manninne orameena mashka'a hasam hee'ukko.

⁵Ee lasage Somsoon ixxi anninnee amannee maqirem Tiimina dillukko. Ee beyyonne yoo woyi'n kaashshi worinne higamukkuuyyim mat hobbichchi geex muunukkuuyyi ixxi beyyo afukko.

⁶Dangonnem Waa'ik Ayyaan ixxonne malaayyaamisa dillukko. Ee bikkina ee hobbichcho mat fellakkichchi geexisa xigaa ixxi anganne ma'lluchchom amadoo'n masharansaa ubbuusukko. Ixxi issu luwwa ixxi anninaa amanam kurukkoyyo.

⁷Ee lasage landichchi beyyo maraa atoorassukko. Isem lobakata iittukko.

⁸Hofqax balliinsi lasage ise eebeena is beyyo daba'llaa marukko. Maru kkuuyyim ee shu hobbichchi duuha'a moo'eena googiinsi koratukko. Leeshoomanne diishshi dummaa hee'ukko; woronnem marab hee'ukko.

⁹Marabiinsim anginne hofqaxam aa'aa itukkuuyyi marukko. Ixxi anni beyyoo am beyyoo afaa ammadu marabiinsi uwwukkaare ixxuwwim itto'o. Ihukkaarem ee marabo lehu hobbichchiinsi massukkisa ixxuwwina kurukkoyyo.

¹⁰Ixxi anni ee landichchi mine maru ammane Somsoon danaam maadda gudisukko. Eehido'i maadda gudisimmi woradduwwina losanome hee'ukko.

¹¹Filisxee'm manni ixxo moo'llo'i ammanenne ixxenne maqire afuuttona sad woraada doo'llita'a asse'llo'o.

¹²Somsoonim ixxuwwina «Huno'o, laqqakkamlas mat heesso heesse'oommo. Eekkam ka lamarem bollochcho'i uguxxi ayyaammuwwannem tittakka'a iina kuttakko'aare sad wereeggi eddechchaa sad lago'i eddechchaa uwwoommo.

¹³Ihukkaarem tittakkeenamdu xantakkobeellas sad wereeggi eddechchaa sad lago'i eddechchaa iina uwwitakkamo» yukko. Ixxuwwim «Hino'o heessooma kure, macceensoommo» yito'o.

¹⁴Ixxim ixxuwwina «Itoohaanniinsi itakkam luwwi siidamukko. Qoxariinsim xee'aalli luwwi firukko» yukko. Ixxuwwim sas balli afeebe'e ee heesso titteena xanto'oyyo.

¹⁵Soo'l ballanne Somsoon arena «Ki aro'o qawwisansitaa heessika tirato kuroo'isa isse; eebeelas keesennee kiyyaanni minennee shokka uwwinoommo. Neese maaddina weeshshakko'ok adaa boggakkeenannihe?» yito'o.

¹⁶Ee bikkina Somsoon are wi'llitu'uuyyi ixxi kollonne hincita'a «Adaa'nnaarenne at eese iittitooyyo. Hore'em sabboolla. Mashka'oomim ni uulli ooso heesso xa'mmitaa iina tiratooma kuttittoyyo» yito'o. Ixxim isena «Moo'e, an kaka iyyanninaa iyyummanam kurumbee'ane; eehaara'i an kiina kuroommi mashka'i mahinatte?» yukko.

¹⁷Ee bikkina bollochcho'i uguxxi lamarem ballam wi'llimminne higisso'o. Xa'mta'a hawwisso'i bikkinam heessoo'm tirato lama'l ballanne isena kurukko. Isem eehanni tirato is uulli oosina kutto'o.

¹⁸Ee bikkina ee beero'i manni lama'l ballanne eelliinchi aageena illageen «Marabiinsi lophphaa xee'ookkokii hobbichchiinsi lophphaa qoxarookkokii mah yookko?» yita'a heessoo'm tirato kutto'o. Somsoonim ixxuwwina «I addichchinne abuullitakkobeeta'n dabachcha siiddakkeena xantakkam hee'llakko'oyyo» yukko.

¹⁹Waa'i Ayyaanim Somsoonenne malaayyaamisa dillukko. Asqaloona yakkam beyyom maraa sad manichcho shukko. Mishisoo eddechcha maxaraa eebaa heessika tirato kutto'i keenina uwwukko. Ee ihu luwwanne hundannem lobakata nadadaa ixxi moolli beyyo daba'llukko.

²⁰Ixxi arem ixxi bollochcho'i ayyaamonne saawwi hee'u mulli beshichchina ladiisanto'o.