Read Hadiyya Gassaa'n Kitaaba 15 Bible Online

Gassaa'n Kitaaba 15 - Hadiyya bible

Gassaa'n Kitaaba 15

¹Hofqax ammaniinsi lasage arasa murakkam agananne Somsoon ixxi meentichcho moo'eena fellakkichchika geexa amadaa marukko. Is anninam «I meentichchi beyyo du'm woro aageenatte» yukko. Ihukkaarem is anni aageena hoorukko.

²Somsooninam «At sabbittoka labisaa ki saawwina ladiisummotte. Ihona bagaan iseensi hoffote danonne lophphitamoyyonnihe? he'i at ise elleexxe» yukko.

³Somsoonim ixxuwwina «Ka lasage Filisxee'm manna hawwodoo luwwa maham issumta'n an xa'mmamoommoyyo» yukko.

⁴Ixxim maraa sas xibbi wengereella hochchaa amadaa lam lamika sheerimo matissaa karaa lamem sheeri'm lambe'ennem xomboora karukko.

⁵Ee lasage xomboolluwwanne giira xanqisaa Filisxee'm mannaannonne muramubee'i aras woronne fatakukko. Ee'isinne muramaa naaramu aras xale'i ihoo'n muramubee'i arasaa wee'llekaa woyi'n kaashshaa hundam shokkiisukko.

⁶Filisxee'm manni «Kaka issukkok ayyette?» yita'a xa'mmito'o; ixxuwwim «Ixxi meentichcho ixxi saawwina ladiisanto'i bikkina Tiimi'n beero'i manchi ballichchi Somsoonatte» yito'o. Ee bikkina Filisxee'm manni isee is annaa giirinne shokkiisso'o.

⁷Somsoonim «Ki'nnuwwi kaka issitakko'ookko. An odim ki'nnuwwika baado miqisimma uroombee'isa laqqehe» yaa hide'ukko.

⁸Ee ammanem ixxuwwa jorisa aphphisaa dut keeno shukko. Ee lasage maraa Eexaam yakkam beyyonne daawwa'i woronne afuurukko.

⁹Filisxee'm manni waatta'a Yihuxxi uullanne wiiddanto'o; Leehii yakkam beero'om qasso'o.

¹⁰Yihuxxi mannim «Neese qasakkamok mahinate?» yita'a xa'mmito'o. Ixxuwwim «Neese waallummok Somsoona amandeenaa ixxo kallaa massinaa ixxi neesenne issukkok hundam ixxonnem issineenattee» yita'a dabatto'o.

¹¹Ee bikkina sas kuma ikkam Yihuxxi manni Eexaamanne yoo daawwa'a matta'a «Filisxee'm manni niina gassaan ikko'isa laqqooyyonnihe? Eehare ku neesenne issitoo jolli maruchcho?» yita'a Somsoona xa'mmito'o. Ixxim ixxuwwina «An ixxuwwanne issummok ixxuwwi eesenne issito'aneme» yukko.

¹²Ixxuwwim «Kaba neese keyye waallummok keese kallaa ixxuwwina higinsaa uwwineenatte» yito'o. Somsoonim «Ki'nnuwwi shitakkambee'an ihukkisa hide'llehe» yukko.

¹³Ixxuwwim «Erane; keese usinne kallaa ixxuwwina higinsaa uwwinoommo bagaan neese shinoommoyyo» yita'a dabatto'o. Ee lasage lam haareechchi usinne katta'a daawwa'iinsi fissita'a massito'o.

¹⁴Somsoonam Leehii'e afu ammanenne Filisxee'm manni geettu'uuyyii shuttu'uuyyii ixxi beyyo waatto'o. Dangonnem Waa'ik Ayyaan malaayyaamisa ixxonne dillukko. Ixxi anga karakko'i usseewwam giir nakku haarri fati'llisa muransaa uunjukko.

¹⁵Ee lasage abbis ammane lehaakkoo mat hallichchi gaangeera siidaa heeshaa ki'isaa mat kum manna shukko.

¹⁶Somsoonim «Hallichchi gaangeerinne mat kum manna shummo. Ee gaangeerinnem lesha leshanne tuubummo» yaa diraamukko.

¹⁷Ee lasage amadaa hee'u gangeera darabukko. Ee beyyom «Raamaat Leehii»[4] yaa weeshukko.

¹⁸Ee lasage Somsoon lobakata xeebe'u bikkina «Kido'i lob kaachcha iina ki awwaadaanchina uwwitaatto. Eehaare kaba an wo'i xeebinne lehonannihe? Ka ballachchantobee'i manni angandu ubonannihe?» yaa Waa'a weeshukko.

¹⁹Waa'im ee Leehii'enne hee'u mat wo'i bu'i bare fooqaa'ukko. Ixxeensim wo'i firukko. Somsoonim agaa xeebo mu'llu bikkina qoxxukko. Ee bikkina ee wo'i bu'o «Ayin Haaqoore»[5] yaa weeshukko. Kaballi afeebe'em Leehii'enne yookko.

²⁰Filisxee'm manni Isra'eela gassitam hee'llo'i doollenne Somsoon lamiyyi hiincho hundoomam Isra'ee'l minaadaba awwonsukko.