Read Hadiyya Gassaa'n Kitaaba 17 Bible Online

Gassaa'n Kitaaba 17 - Hadiyya bible

Gassaa'n Kitaaba 17

¹Duunaam Efiree'm uullanne Miika yakkam mat manchi hee'ukko.

²Miika'am mat ayyaamo ixxi amana «Mat manchi ‹Iikka mat kumaa mat xibbi kin biraa iinniinsi game'aakko› yitaa duuntittuuyyi macceesaa hee'ummo; ee diinate an massummi bikkina i anganne yookko» yukko. Ixxi amam «I beeto, Waa'i keese maasse'ona» yito'o.

³Ixxim ee diinate eebaa ixxi amana uwwukko. Isem «Anim ee bira Waa'ina i beet bikkenne keesamaakkoohan issaa uwwaammo. Oo birim haqqinne baxakka'a kin birinne goolabakkam misila baxisimmina ihona. Ee bikkina ka bira kiina dabaraa uwwoommo» yito'o.

⁴Beetim biirooma amana dabaraa uwwukkaare isem ee bi'lleka lam xibbi kin bira massita'a anga qoor manchina uwwito'o. Haqqa cabbaraa birinne goolabaakkoo misilam baxukko. Oo misilim Miika'i minenne afuurukko.

⁵Miika'a otossoo ixxi gaqqi beyyi yoohane; otossakkam misilluwwaa eefuudaa baxaa ixxi oosiinsi mato qeessichchi ihaa awwaadoo'isa issukko.

⁶Ee doollenne Isra'eelina adil hee'ukkoyyo. Manni hundim ixxena danaamo labaa moo'amu luwwi hundam issam hee'ukko.

⁷Ee ammane Yihuxxi uullanne Beeteelihee'm beero'onne hee'oo Leewi'i sulliinsetti ihaakkoo mat woraadichchi hee'ukko.

⁸Oo manchi hee'oo beyyo hasukkuuyyi Beeteelihee'm beero'iinsi ki'aa marukko. Googonne hee'ukkuuyyim duunaam Efiree'm uullanne hee'oo Miika'i mine afukko.

⁹Miika'am ixxena «At waattittok hanniinsette?» yaa xa'mmukko. Oo manchim «An waarummok Yihuxxi uullanne hee'oo Beetalihee'm beero'iinsette; i moollim Leewi'i sullo; anim hee'oommi beyyo hasoommi mancho» yaa dabarukko.

¹⁰Miika'am «Eehaare iinninne maqire hee'e. Iinam sogaanchoo qeessichoo ihe; anim hiinchonne tommi bira, ee'isam hurbaataa eddechchaa kiina uwwoommo» yukko.

¹¹Ee bikkina oo Leewekkichchi Miika'anne hee'eena iittamukko. Oo woraadichchi Miika'ana qachchisa ihukko.

¹²Miika'am ixxo qeessichchi issaa doo'llukko. Ixxi minennem hee'isukko.

¹³Miika'am «An Leewi'i sulliinsi qeessichcho siidumlas kaba Waa'i hundem luwwam iina makkisoo'isa la'oommo» yukko.