Read Hadiyya Gassaa'n Kitaaba 18 Bible Online

Gassaa'n Kitaaba 18 - Hadiyya bible

Gassaa'n Kitaaba 18

¹Ee doollenne Isra'eelanne adil hee'ukkoyyo. Isra'ee'l sulluwwiinsi Daan sulli ixxuwwina gaqqi sharad ihoo uulla siiddobee'i bikkina hee'llam uulla hassu'uuyyi hee'llo'o.

²Ee bikkina Daan sulli ixxuwwi abaroos lambe'iinsi qoxxaalluwwika onti mancho doo'llita'a uulla shaashshita'a waattona Xooraa Eshtaa'oolaa yamantam beero'uwwiinsi asse'llo'o. Ixxuwwim duunaam Efiree'm uulla affa'a Miika'i minenne gatto'o.

³Ixxuwwi ee minenne hee'llu'uuyyim Leewekkichchi woraadichchi hanniinsetda'e ihukkisa wocoo'isinne laqqa'a ixxi kollonne hincita'a «Keese keyye ayyi worukko? Keyye maha baxxoolla?» yita'a xa'mmito'o.

⁴Ixxim ixxuwwina «Miika'ana an qeessichchi ihaa awwaadona ixxim iina hasisoo luwwa hundam miqeena iittammaammo» yaa dabarukko.

⁵Ixxuwwim ixxena «Neese malloommi goog niina makkoohanda'e lanqoommissina Waa'a xa'mme» yito'o.

⁶Oo qeessichchim ixxuwwina «Ka mattakkam googonne ki'nnuwwa Waa'i egeroo bikkina matem hawwim ki'nnuwwanne afooyyo» yaa dabarukko.

⁷Ee lasage oo ontem mannim ee beyyiinsi killa'a Laayisha affo'o. Ee beyyonnem hee'llam manni Siidoo'n mannisam xummanne hee'llam manni ikko'isa moo'llo'o. Oo minaadabim ayyennem wocantoo'nnim xumminne hee'llam xummam iittitam manni hee'llo'o. Odim ixxuwwina hasisoo luwwi hundim yoo bikkina ayyi minaadabinnem mateeyyooma amaddoo'nnim Siidoo'n manniinsi qee'llita'a hee'llam hee'llo'o.

⁸Oo ontem mannim Xoorannee Eshtaa'oolannee hee'llam ixxuwwi abbaayyuwwi beyyo daba'llita'a matto'i ammanenne «Hinkido'i woshsha amaddakka'a waattakko'o» yita'a xa'mmito'o.

⁹Ixxuwwim «Uulloom hore'em danaam ihukkisa moo'nnaammo; kaba ki'llehe, Laayisha mallaa qansoona; ka beyyonne bax bee'eka cawwitakka'a afuuttakkotte. Qaqqissakka'a mattakka'a amaddehe.

¹⁰Ee beyyom Mattakka'a affakkam ammane ee beyyi manni maham malantambee'i xumma iittitam manni ikko'isa laqqakkamo; uulloomim haraaraa mannina hasisoo luwwi hundim wo'mmaakkoohane; Waa'im ka uulla ki'nnuwwina uwwaakko» yito'o.

¹¹Ee bikkina Daan sulliinsi loh xibbi manni orina gudda'a Xooraa'iinsii Eshtaa'ooliinsii ki'lla'a matto'o.

¹²Ixxuwwim matta'a Yihuxxi uullanne hee'oo Qiiriyaatyi'aariimiinsi eelliinchi aagoo kollonne wiiddanto'o. Oo beyyi kaballi afeebe'em Daan wiidda'n beyyo yamamookkok ee bikkinatte.

¹³Ee beyyiinsim matta'a duunaam Efiree'm uullanne hee'oo Miika'i mine affoo'o.

¹⁴Ee lasge Laayish kululleetanne yoo uulla shaashshiteena asse'anto'i ontem mannim ixxuwwi abbaayyuwwina «Ka minneewwanne eefuudii taraafiimii, haqqa cabbarakka'a axisakko'oo misilii bukkakka'a baxakko'oo misilii yoo'isa laqqakkamonnihe? Ee bikkina ki'nnuwwi maha issimmi hasisooda'e laqqehe» yito'o.

¹⁵Oo Leewekkichchi woraadichchi hee'oo Miika'i mine aaggo'o; Leewekkichchim hinkid hee'ooda'e xa'mmito'o.

¹⁶Orina gudda'a Daan sulliinsi waatto'i lohem xibbi mannim ee ammane ooxxi gooc gadanonne uullita'a hee'llo'o.

¹⁷Ee uulla shaashshiteena matto'i ontem mannim Miika'i mine aagga'a cabbarakka'a axisakko'oo misila, eefuuda, taraafiimaa bukkakka'a baxakko'oo misilaa massito'o. Eekka issitu'uuyyi qeessichchi o'l mu'uta lade'llo'i lohem xibbi manninne maqirem oox gooc gadanonne uullaa hee'ukko.

¹⁸Ixxim oo manni Miika'i mine aagga'a cabbarakka'a axisakko'oo misila, eefuuda, taraafiimaa bukkakka'a baxakko'oo misilaa massitu'uuyyi moo'aa «Maha issitakkamuulla?» yaa xa'mmukko.

¹⁹Ixxuwwim «Sa'ihe! Suume amade! At ki gagoomim waattaa niina qeessichchoo sogaanchoo ihe. Mat mi'n abaroosina qeessichchi ihimmiinsi Isra'ee'l sulluwwiinsi matina qeessichchi ihimmi e'llooyyonnihe?» yito'o.

²⁰Eehid yimmi ee qeessichcho lobakata liiransukko. Ixxim cabbarakka'a axisakko'oo misila, eefuudaa taraafiimaa amadaa ixxuwwinne maqirem marukko.

²¹Ixxuwwim ixxuwwi ooso, fooraam diinatee ixxuwwina yoo mu'utaa hundam ixxuwwi illagenne higissa'a ixxuwwi lasinne ikka'a daballita'a elle'llo'o.

²²Miika'i miniinsi qee'llita'a matta'a lasage Miika'i ixxi olla'i manna wixxaa'aa Daan sulliinsi waatto'i manna hollansaa afukko.

²³Ixxuwwannem sharukko. Daan sulli mannim laso daba'llita'a Miika'ana «Maha ikkaate? Ku luchchi hundim mahina wixxaa'llaattoo manna?» yita'a xa'mmito'o.

²⁴Miika'am «An baxisummi waa'uwwaa qeessichchoo boggakka'a mattakko'ookko; iina od mah gataate? Eehannah «Hinkid maha ikkaate yitakamuulla?» yukko.

²⁵Daan sulli mannim «Mogaalli manni keese hawwodoobee'isa, atii ki abaroosim bi'llakkambee'isa maham woccoobee'isa suume amade» yito'o.

²⁶Ee lasage Daan sulli matto'o. Miika'am ixxuwwi hore'em qooxalluwwi ikko'isa moo'u ammanenne daba'llaa ixxi mine elle'ukko.

²⁷Daan sulliinsi waatto'i mannim Miika'a baxu misilaa ixxi qeessichchoo amadda'a ferseyita'a afuutto'oo Laayish manni beyyo affa'a bisa'inne guullito'o. Beero'oomannem shokka uwwito'o.

²⁸Beero'oom Siidooniinsi qee'llonne hee'u bikkinaa ixxuwwim mulli manniinsi annanni ikka'a hee'llo'i bikkinaa ixxuwwina hara'mmookkok hee'ukko. Oo beero'im Betirahoob gadanonne yoo lette'i cebbanne hee'ukko. Daan sullim beero'o baxxa'a ee beyyonne afuutto'o.

²⁹Ee beero'ikam Laayisha yakkam gaassi summa dabassita'a gaassi ixxuwwi lobanni hee'u Yaaqoob beet ihu ixxuwwi anni summanne Daan yita'a weeshsho'o.

³⁰Ee misilluwwam Daan sulli otossiteena ee beyyonne kaasso'o. Muse'e beet Gershooniinsi qaramu Yoonaataan Daan sullina qeessichchi ihaa awwaadimma asheerukko. Ixxi shumo'im minaadab qeefadamaa mareebee'i afeebe'e awwaaddam hee'llo'o.

³¹Ee'isinne Miika'a baxu misil Waa'ina otossakkam dukkaan Seelo'onne hee'u doollenne hundannem ee beyyonne uulla hee'ukko.