Read Hadiyya Gassaa'n Kitaaba 20 Bible Online

Gassaa'n Kitaaba 20 - Hadiyya bible

Gassaa'n Kitaaba 20

¹Hanaa'n qariinsi woroo'n qaranne oohim Daaniinsi Beersaabe'enne afeebe'e ee'isam eelliinchi firinne Gala'aadanne yoo Isra'ee'l minaadab hundim orina gudda'a mat ikka'a Misiphphanne Waa'i illagenne wixxito'o.

²Isra'ee'l sulli hundiinsim awwonsaanii bisa'a lade'llo'oo soor xibbi kum lokkaanii Waa'i minaadaphphi illagenne uullito'o.

³Ee ammane Isra'ee'l minaadab Misiphphanne wixxito'isa Biiniyaam sulli macceesso'o. Isra'ee'l minaadabim «Kido'i jor luwwi hinkid iheena xanuda'e kullehe» yaqqanto'o.

⁴Ixxi bakki meentichcho shakko'i Leewekkichchi «Anii i bakki meentichchoo Biiniyaam manni uullanne yoo Giibi'anne hiimukkaare galleena mallummo.

⁵Giiba'i mannim eese shiteena waatta'a an garummi mine hiimonne kibbito'o. Luxxeka eese shiteena sawwita'a hee'llo'o. Ihukkaarem lasonne i bakki meentichchonne korkore iinse'llo'o; ee bikkina ise leto'o.

⁶Ee lasge i bakki meentichchoka leesha massaa muransummo; ixxuwwi kido'i jor baxo baxxo'i bikkina muransummi qaamafeettuwwa Isra'ee'l sullina annanninchinam asse'ummo.

⁷Ee bikkina ka beyyonne yoontakke'i Isra'ee'l minaadab hundim ki'nnuwwi sawwitee oogatoo uwwehe» yukko.

⁸Minaadab hundim mateeyyoomanne uullita'a «Ni lambe'iinsi ayyim ixxi dukkaana te'im ixxi mine daba'llaa maroone.

⁹Kaba neese issinoommok kane. Giibi'a maraa qasoo manna saaminne doo'llinoommo.

¹⁰Hundem Isra'ee'l sulliinsim gaadaanina hurbaata gudissona xibbiinsi tommi mancho, kumiinsi xibbi mancho, tommi kumiinsi odim mat kum mancho massinoommo. Gaadaanim Biiniyaam gassonne hee'oo Giibi'a affa'a Giiba'i manni Isra'eelanne baxxo'i jor bax bikkina laboo guzumo'i uwwitamo» yukko.

¹¹Ee bikkina Isra'ee'l minaadab hundim mexxo'i mat manchisa ihaa ee beero'onne wixxukko.

¹²Isra'ee'l sulli Biiniyaam gassi uullanne hundannem daba'llantu'uuyyi «Ku ki'nnuwwi issitakko'i jor luwwi maha?

¹³Ixxuwwi shinaa ka jor luwwa Isra'eeliinsi qeessinoommisina Giiba'anne ee teeda'a baxxo'i keeno niina fissitakka'a uwwehe» yita'a kuttam manna asse'llo'o. Ihukkaarem Biiniyaam sulli Isra'ee'l minaadab kutto'i woshsha aa'llo'oyyo.

¹⁴Hore'oomam ixxuwwa qasseena beero'i hundiinsim weeccanta'a Giiba'i beero'o waatto'o.

¹⁵Ee balla beero'uwwiinsi waatto'i Biiniyaam sulli manni xigakko'aare Giiba'i keeno exxoo'n bisa'a lade'llo'oo lamiyyii loh kum manni hee'llo'o. Giiba'iinsim lamar xibbi manni doo'llanto'o.

¹⁶Ee minaadabanne hundannem lamar xibbi doo'llanto'oo qeddi angi manni hee'llo'o. Oo keen hundichchim wombarashe'inne kina darabbam ammane matichchi horoo'l saraatam yakkota'n haare'llam keen hee'llo'o.

¹⁷Isra'ee'l minaadab Biiniyaam sulli exxoo'n soor xibbi kum lade'llo'oo gogota gudisso'o.

¹⁸Isra'ee'l minaadab Beeteelanne Waa'ina otossakkam beyyonne «Biiniyaam sullinne gaassaa oramookkok hinka'i sullo» yita'a Waa'a xa'mmito'o. Waa'im ixxuwwina «Yihuxxi sulli gaassaa gaadona» yukko.

¹⁹Ee bikkina Isra'eel la'm balla soodarar daram killa'a Giiba'i beero'i hegeego matta'a wiiddanto'o.

²⁰Isra'ee'l mannim Biiniyaam sullinne oranteena fitto'o. Giiba'i beero'i illagennem gudda'a uullito'o.

²¹Biiniyaam gogot Giiba'iinsi fitta'a ee balla Isra'ee'l minaadabiinsi lamiyyee lam kum mannaa shito'o.

²²Isra'ee'l gogot odim qoxxixxanta'a illageen ullito'i beyyonnem waatta'a gudda'a uullito'o.

²³Isra'ee'l minaadab fitta'a Waa'i illagenne uulli hiimeebe'e wi'llito'o. Ixxuwwim «Niyyabbaayyuwwi Biiniyaam sullinne orammeena odim gaandonnihe?» yita'a Waa'a xa'mmito'o. Waa'im «Eeyya, ixxuwwanne gaaddehe» yukko.

²⁴Isra'ee'l gogot la'm balla Biiniyaam sullinne oranteena hincito'o.

²⁵La'm ayyaamom Biiniyaam sulli Isra'ee'l minaadabinne oranteena Giiba'iinsi fitta'a odim orancha laqqam mannika tommoo sadeenti kumaa shito'o.

²⁶Ee lasage Isra'ee'l minaadabii ixxuwwi gaadaanii hundim Beeteela matta'a wi'llito'o. Ee beyyonnem Waa'i illagenne afuutta'a uulli hiimeebe'e soommanto'o; shokkiisakka'a hincaa'akkam kitimaa xummi kitimaa hincaa'llo'o.

²⁷Ee doollenne Waa'ik Hidi'l Saga'l Saaxin Beeteelanne hee'u bikkina Isra'ee'l minaadab Waa'a xa'mmito'o.

²⁸Aaroon beet Ali'aazariinsi qaramu Finihaas Waa'i illagenne awwaadaanchi hee'ukko. Isra'ee'l minaadabim «Waa'a! Niyyabbaayyuwwi ikko'i Biiniyaam sullinne orammeena odim fillonnii ullo?» yita'a Waa'a xa'mmukko. Waa'im ixxuwwina «Mallehe, orammehe! Soodo an ixxuwwa ki'nnuwwi anganne higisaa uwwoommo» yaa dabarukko.

²⁹Ee bikkina Isra'ee'l minaadab hofqax gaadaanom Giiba'i kululleetanne daphphita'a egettamisa issito'o.

³⁰Kanniinsi ellageen issito'isam saxxi ballanne Biiniyaam gogotanne gaaddo'o; ixxuwwi gaadaanom Giiba'i beero'i illagenne gudissa'a uullisso'o.

³¹Biiniyaam mannim oranteena fitto'o. Awwonanta'ahim beero'iinsi qee'llita'a matto'o; illagee'nnisam Isra'ee'l minaadaphpheka sad manna Beeteelaa Giiba'aa massoo googonne shito'o.

³²Biiniyaam mannim «Kanniinsi illageen issinummisam kumaandummo» yito'o. Ihukkaarem Isra'ee'l gaadaan «Lasinne gimbona; beero'iinsim qee'llinsaa lob bobba'anne fissinona» yito'o.

³³Ee lasage Isra'ee'l googot Ba'aaltaamaaranne afeebe'e lasinne matto'o; ee ammanenne Giiba'anne biir beyyonne maaxanta'a hee'llo'i gogot dangonne bulluqito'o.

³⁴Isra'ee'l minaadabiinsi doo'llanto'i tommi kum manni Giiba'i beero'o qasso'o. Oranchoomim lobakata kee'mmaalli hee'ukko. Ihukkaarem Biiniyaam manni ixxuwwina beeddichchi amman afukkisa laqqo'oyyi hee'llo'o.

³⁵Waa'im Isra'eel Biiniyaam sullo kaa'llamisa issukko. Isra'ee'l minaadab ee balla bisa'a lade'llo'oo Biiniyaam gogotiinsi lamiyyee onti kumaa mat xibbee shito'o.

³⁶Ee ammanenne Biiniyaam sulli kaa'anto'isa laqqo'o. Ihukkaarem Isra'ee'l minaadab Giiba'i biir beyyonne maaxamaa hee'u gogotanne amma'nnanta'a kaa'anto'aannisa ikka'a lasinne gibbo'o.

³⁷Daphphita'a hee'llo'i gaadaan Giiba'i beero'o aagga'a beero'i woronne binnita'a eekke'e siiddo'oka hundam shito'o.

³⁸Maaxanto'i keenii mulli Isra'ee'l gogotii beero'iinsi kee'mmaalli wiriir firoo mare'e egetta'a edanteena atooratta'a hee'llo'o.

³⁹Isra'ee'l minaadab lasonne gibbo'aare Biiniyaam manni sad manna shito'i bikkina «Kanniinsi illageen issinummisam kabadem kummaandummo» yitu'uuyyi diraantam hee'llo'o.

⁴⁰Ee lasage mare'i moo'amukko; oohim wiriir umbu'llisa beero'iinsi firam hee'ukko; Biiniyaam gogot laso qerephita'a moo'llo'i ammanenne ee beero'i hundoomannem shokki aphphaa gii'l laban firukkuuyyi moo'llo'o.

⁴¹Isra'ee'l minaadab daba'llita'a qasso'i ammanenne Biiniyaam sulli ixxuwwina beeddichchi afukkisa laqqa'a baachchinne u'nnanto'o.

⁴²Ixxuwwim afa'llaachcha daba'llita'a Isra'ee'l illagiinsi udma'i uulli kollonne gibbo'o. Ihukkaarem lasinne hollitam keenii beero'iinsi illaginne waatto'i keenii lambe'enne amadda'a guullito'o.

⁴³Isra'eel ixxuwwi diina'a kibbita'a Giiba'iinsi eelliinchi firoo kollonne hollitu'uuyyi guullito'o.

⁴⁴Biiniyaam sulli doo'llanto'oo gaadaaniinsi 18,000 beeddito'o.

⁴⁵Gatto'i qax lasonne daba'llita'a mat udma'i uulla mutta'a ‹Riimoon geejji kina› yakkam beyyonne fitto'o. Ixxuwwiinsim 5,000 googonnem beeddito'o. Odim gatto'i qaxam Isra'ee'l gaadaan Giidi'oom yakam beyyi afeebe'e hollita'a 2,000 manna shito'o.

⁴⁶Ee balla Biiniyaam sulliinsi leto'i qax hundoomim 25,000 doo'l gaadaanoo hee'llo'o.

⁴⁷Ihukkaarem 600 manni udma'i uullanne yoo ‹Riimoon geejji kina› yakkam beyyo gibba'a xotto'o. Ixxuwwim ee beyyonne soor agana afuutto'o.

⁴⁸Isra'ee'l minaadab lasonne daba'llita'a gatto'i Biiniyaam sullinne oranta'a goona, meento, ooso, fooraam diinatee ixxuwwi siiddo'i luwwaa hundam guullita'a shito'o; ee hegeegonne hee'u beero'uwwi hundam shokkiisso'o.