Read Hadiyya Gassaa'n Kitaaba 21 Bible Online

Gassaa'n Kitaaba 21 - Hadiyya bible

Gassaa'n Kitaaba 21

¹Isra'ee'l minaadab Misiphphanne wixxito'i ammane «Ni lambe'iinsi ayyi manchim Biiniyaam sullina landa ladiisoobee'isa» yita'a Waa'i illagenne hide'lla'a hee'llo'o.

²Ee bikkina Isra'ee'l minaadab Beeteela matta'a uulli hiimeebe'e Waa'i illagenne afuutta'a sagara iimaa'lla'a wi'llito'o.

³Ixxuwwim «Isra'ee'l I Moollanni Waa'a! Kaballa Isra'eeliinsi mat sulli bee'ukkok mahinatte? Kuk mahina Isra'eelanne ihukko?» yito'o.

⁴La'm balla daram minaadab Waa'ina kitima hincaa'akkam beyyo baxxa'a shokkiisakka'a hincaa'akkam kitimaa mateeyyoo'm kitimaa hincaa'llo'o.

⁵Isra'ee'l minaadab Waa'i illagenne Misiphphanne siidamubee'ek ayyim lehona hide'anta'a hee'llo'i bikkina «Isra'ee'l sulluwwiinsi Waa'i illagenne firubee'ek ayyette» yita'a xa'mmanto'o.

⁶Ixxuwwi abbaayyuwwi hee'llo'i Biiniyaam sulli bikkina Isra'ee'l minaadab kichche'lla'a hee'llo'i bikkina «Kaballa Isra'ee'l minaadabiinsi mat sullo hoongaammo.

⁷Neesa'i ixxuwwina ayyim landa uwwinoombee'isa hide'nnaammo; ixxuwwiinsi letoo'n gatto'i keenina meento siiddammisina maha issino?» yaqqanto'o.

⁸Ixxuwwim «Isra'ee'l sulluwwiinsi Waa'i illagenne Misiphpha waarubee'ek yoohonnihe?» yaqqanto'o. Yaabeesh Gala'aadiinsi matem manchim ee dummichcha waarukkoyyi hee'ukko.

⁹Gaadaano xigakkeena moollinne moollinne weeshakko'i ammanenne Yaabeesh manniinsi an yoommo yookkok matim hee'ukkoyyo.

¹⁰Ee bikkina oo dummichchi «Yaabeesh manni uulla mattakka'a meentii oosim gatoobee'isa Gala'aaxxi manna hundam shi'llehe» yita'a ixxuwwiinsi qoxar kee'nneka tommoo lam kum manna asse'llo'o.

¹¹Ixxuwwim «Goonaa gooninne edamu meentoo hundam shi'llehe» yita'a ijaajjo'o.

¹²Ee Yaabeeshanne hee'llo'i Gala'aaxxi manniinsi soor xibbi baajaam landa siiddo'i bikkina Isra'ee'l minaadab yo'i Kana'aananne yoo Seelo yakkam beyyo amadda'a waatto'o.

¹³Ee lasage Isra'ee'l minaadab hundim Riimoon geejji kinanne yo'i Biiniyaam sulli beyyo manna asse'lla'a or uulloo'isina iittanto'o.

¹⁴Biiniyaam mannim daba'llita'a waatto'o; Isra'eel Yaabeesh manniinsi qeefadda'a eebbo'i landa ixxuwwina uwwito'o. Ihukkaarem ee landik xig ixxuwwina ihukkoyyo.

¹⁵Waa'i Isra'ee'l minaadabinne hee'u mateeyyooma muraa hee'u bikkina minaadab Biiniyaam sulli bikkina lobakata kichche'llo'o.

¹⁶Ee bikkina dummichchi «Biiniyaam sullonne kanniinsi eehid meenti bee'e; eehannah lehiinsi gatto'i Biiniyaam sulli goonina meento siindeena xannoommok hinkidette?

¹⁷«Isra'ee'l tommiinsii lamem sulliinsii mat sulli bi'aa gatoobee'isa Biiniyaam sulliinsi lago aa'ookkok hee'immi hasisookko.

¹⁸Ihukkaarem ni lambe'iinsi ayyi manchim Biiniyaam sullina landa uwwookkok duumamona hide'nnaammoo bikkina ni landa uwwineena xannoommoyyo» yito'o.

¹⁹Ee lasage «Hiinchonne hiinchonne Seelo'onne Waa'ina gudisakkam ugud hincaakko» yita'a sawwito'o. Seello'i beero'i Beeteeliinsi hanaa'n qarinnee Laabooniinsi woroo'n qarinnee ee'isam Beeteelaa Seekeemaa higakkam googiinsi eelliinchi firinnee hee'oo beero'i hee'ukko.

²⁰Ee bikkina Biiniyaam sullina «Mattakka'a woyi'n kaashshi woronne maaxantakka'a egellehe!

²¹Ee uguxxi ayyaamonne Seelo'i landi kajjina waaroo ammane woyi'n kaashshi woriinsi fittakka'a annanchim ee landiinsi ki'nnuwwi gaqqi meenti issitakkeena gossakka'a Biiniyaam uulla amaddakka'a mallehe.

²²Ixxuwwi anno'i te'im abbaayyuwwi ki'nnuwwi beyyo waatta'a ki'nnuwwinne wocanteena hassota'n ‹Ki'nnuwwi landa massinummok orinnetti ihubee'i bikkina he'i niina haafi'llehe; ki'nnuwwim niina iittitakka'a uwwitakkobee'i bikkina hidiro ginditakka'a bi'isaan ikkakkamoyyo› yitakka'a dabattakkeena xantakkamo» yito'o.

²³Biiniyaam mannim ixxuwwi yito'isam issito'o; annannichchim ixxuwwi xiqqisannem Seelo'onne kaddam landiinsi gossa'a ammadda'a matto'o. Ixxuwwi uullam daba'llita'a matta'a beero'uwwa dabatta'a baxxa'a hee'llo.

²⁴Ee ammanem mulli Isra'ee'l minaadab hundim binnito'o. Annannichchim ixxuwwi gaqqi sulli beyyoo moolli beyyoo ee'isam ixxuwwi gaqqi amaxxii minii yoo beyyoo daba'llito'o.

²⁵Ee doollenne Isra'eelina adil hee'ukkoyyo. Manni hundim ixxena danaamo labaa moo'amu luwwi hundam issam hee'ukko.