Read Hadiyya Gassaa'n Kitaaba 4 Bible Online

Gassaa'n Kitaaba 4 - Hadiyya bible

Gassaa'n Kitaaba 4

¹Eehuud lehaa lasage Isra'ee'l minaadab odim Waa'i illagenne jor baxo baxxo'o.

²Ee bikkina Waa'i Haaxoor beero'onne ihaa gassam hee'u Kana'aa'n adil Yaabiin anganne Isra'ee'l minaadaba higisaa uwwukko. Ixxi gogoxxi awwonsaanchim mulli minaadaphphan ihu Haarosheet beero'onne hee'oo Siisaaratte hee'ukko.

³Yaabiinina honsi xibbi xaa'l faraxxi gaarre'uwwi hee'ukko. Ixxim Isra'ee'l minaadaba monginnee wor amadimminnee lammiyyi hiincho gassukko. Ee bikkina Isra'ee'l minaadab Waa'i kollonne laatto'o.

⁴Ee ammane Lafiidootina aretti ikko'i hiraagaancho Diiboora Isra'ee'l minaadabanne oogattamotan hee'llo'o.

⁵Isem duunaam Efireem uullanne Raaminaa Beeteelinaa lambe'enne yoo Diiboor dimbaaphphi hafanne afuutta'a oogattam hee'llo'i bikkina Isra'ee'l minaadab oogato'ina ise beyyo maram hee'ukko.

⁶Mat balla Abiini'aam beeto Baaraaqa Niftaalee'm uullanne yoo Qaadees beero'iinsi weeshissa'a «Isra'ee'l Moollanni Waa'i ‹Niftaaleem sulliinsii Zaabiloonaanniinsii tommi kum manna doo'llitaa Taaboor duuna awwonsitaa mare.

⁷Adil Yaabiin gogoxxi ijaajaanchi Siisaar Qiishoo'n daajjenne kiinninne orameena waaroo'isa issoommo. Ixxim faraxxi gaarre'uwwaa gaadaanoo awwonsaa waarookko. Ihukkaarem an ixxo ki anganne higisaa uwwoommo› yaa ijaajaakko» yito'o.

⁸Ee lasage Baaraaq «At iinninne maqire mattittaare maroommo. Atimdu iinninne mattoobeelas maroommoyyo» yukko.

⁹Isem «Ihona, hanqinam an kiinninne maqirem maroommo. Ihukkaarem Waa'i Siisaara meenti anganne higisaa uwwoo bikkina kaachchi lomboom kiina ihooyyo» yito'o. Ee bikkina Diiboora Baaraaqinne maqirem Qaadeesa gaaddo'o.

¹⁰Baaraaqim Niftaalee'm sulloo Zaabiloo'n sulloo Qaadeesa weeshisukkaare ixxuwwiinsi tommi kum manni ixxo awwonto'o. Diibooram ixxenne maqirem gaaddo'o.

¹¹Ee ammane Qeene'i manniinsetti ihu Heebeer Muse'ena ballichchi Hoobaab shumo'i ikko'i Qeene'iinsi annanni ihaa Qaadeesa waarukko; Xa'inaayim hujuphphi haqqichchi gadanonnem dukkaana kaasaa hee'ukko.

¹²Abini'eel beet Baaraaq Taaboor duuna marukkisa Siisaar macceesu ammanenne

¹³xaarinne baxamaakkoo honsi xibbi faraxxi gaarre'uwwaa gaadaanoo hundam weeshisaa Haarosheetiinsi Qiishoo'n daajjenne wixxaa'ukko.

¹⁴Ee ammanenne Diiboora Baaraaqina «Ki'e, Waa'i Siisaara ki anganne higisaa uwwu balli kaballa; oono'o, Waa'i ki illagenne higaa firaakko» yito'o. Ee bikkina Baaraaq tommi kum gaadaano awwonsaa Taaboor duuniinsi dillukko.

¹⁵Baaraaq ixxi gogotinne maqirem qasu ammanenne Waa'i Siisaara ixxi faraxxi gaarre'uwwinnee gaadaaninnee maqirem timtimaa'oo hambalaachchanne uboo'isa issukko. Siisaarim gaarre'iinsi dillaa lokkinne gibukko.

¹⁶Baaraaqim Siisaarika faraxxi gaarre'uwwaa ixxi gogotaa mulli minaadaphphi uullanne yoo Haarosheet afeebe'e hollukko. Ee gogotam matem manchim gatoobee'isa hundam guullukko.

¹⁷Haxoo'l adil Yaabiin Heebeer abaroosinne iittinne hee'am hee'u bikkina Siisaar gibaa Qeene'i manniinsetti ihu Heebeer meentichchotte hee'llo'i Yaa'eel dukkaana aagukko.

¹⁸Yaa'eelem Siisaara aa'lleena fitta'a «I moollanna; waallehe! Badditakkotte; i dukkaa'n woro aaggehe» yito'o. Ee bikkina ixxi maraa aagukkaare du'mmoronne maaxxo'o.

¹⁹Siisaarim isena «An lobakata xeebe'aammo wokkichchika uwwe» yukko. Isem axxiharachcho titta'a ado agissa'a lasonne odim gunguussita'a maaxxo'o.

²⁰Ixxim isena «At dukkaa'n goocanne uullitaa ayyim waaraa ‹Keyye aagu manni yoohonnihe?› yaa xa'mmuta'n ‹Ayyim bee'e› yihe» yukko.

²¹Siisaar lobakata qondoodaa hee'u bikkina qallaa diriirukko. Ee ammanenne Yaa'eele dukkaa'n xiribbaa fanxiizaa amadda'a qaphphita'a hincito'o; amaddo'i xiribba macce huruuraa uullanne kaaxxeebe'e aphphisso'o; Siisaarim lehukko.

²²Ee lasage Baaraaq Siisaara hasukkuuyyi waaru ammanenne Yaa'eele ixxo aa'lleena fitta'a «Keyyaare, at hassoo mancho moo'isoommo» yito'o. Ee bikkina isenne maqirem dukkaa'n woro aagaa xiribbi maccenne kaaxxukkisam leesh uullanne ubaakkoo moo'ukko.

²³Ee balla Waa'i Isra'ee'l minaadab Kana'aa'n minaadaphphi adila Yaabiina kaa'llamisa issukko.

²⁴Isra'ee'l minaadab Kana'aa'n adila Yaabiina shita'a hootteebe'i afeebe'e ixxuwwik wod qoxxukkuuyyi marukko.