Read Hadiyya Gassaa'n Kitaaba 5 Bible Online

Gassaa'n Kitaaba 5 - Hadiyya bible

Gassaa'n Kitaaba 5

¹Ee balla Diibooraa Abiini'aam beet Baaraaqii kanniinsi woroon yoo mazmuura zammatto'o.

²Awwonsaan Isra'eela awwonsito'i bikkina minaadabim liiranchinne gaga uwwita'a ki'llo'i bikkina Waa'i galaxxamona.

³Ki'nnuwwi adilluwwi, macceessehe! Ki'nnuwwi gassaanim qoossitakka'a macceesseehe! An Waa'ina zammaroommo. Isra'ee'l Moollanni Waa'ina zammaroommo.

⁴Waa'a! Seeyriinsi dillitti ammanee Eedoo'm uullannem taakke'llitti ammanee uulli huxe'ukko. Iimaniinsim xeen ga'nnukko; Eeyya, wo'i duubiinsi aad dillukko.

⁵Siina'i duu'n Moollanni illagenne Isra'ee'l Moollanni Waa'i illagenne duunnuwwi huxe'ukko.

⁶Anaat beet Shaamgaaraannonnee Yaa'eel doollennee goog diihukko; araat maaxamaa mulli googinne marukko.

⁷Diiboora, at ki'lleebee'i afeebe'e Isra'eelinam amatte ikkaa waatteebee'e Isra'ee'l beero'uwwi geedduwwi bee'i diih hee'ukko.

⁸Isra'eel gaassi laqqambee'i qophpha'n waa'uwwina otossito'aare uulli o'llan ihukko. Sor kum Isra'ee'l oosiinsi agiraa bagadoo ayyim amadukkoyyo.

⁹I wodan Isra'ee'l gaaxxi awwonsaaninnette. Ixxuwwi doo'llinne liiranta'a ki'llo'i keeninnette. Waa'i galaxxamona.

¹⁰Ki'nnuwwi, koora issakko'i qadaalli hallanne saa'llitakka'a taakke'llakkam keen ki'nnuwwi, xuroobee'i danaam gilaasanne saa'llitakkam keen lokkinne chiritakkam keen ka bikkina woccehe.

¹¹Oono'o, qoossitakka'a macceessehe! Wo'o inkiirakkam ba'l gadanonne macceesamoo lobakat manni corochchi, Waa'ika kaachcha alallaatoolla. Isra'ee'l minaadaphphekam kaachcha kuroolla. Ee lasage Waa'i minaadab ixxuwwi beero'uwwiinsi wixxita'a dillito'o.

¹²Diiboora, baqihe! Baqihe! Baqihe! Mazmuuram zammare! Abiini'eel beeto Baaraaqa, ki'e! At qeefadditti keeno higgaa awwonse!

¹³Ee lasage gatto'i keen ixxuwwi awwonsaa'n beyyo dillito'o. Waa'i minaadab i bikkina geedduwwa qasseena dillito'o.

¹⁴Illageen Amaaleeq minaadab hee'oo Efireem sulliinsi gaadaan waarukko; mulli keenim Biiniyaam sulliinsi waatto'o. Maakiiriinsi gaaxxi awwonsaan waatto'o; ee'isam adi'l bicco amaddam keenim Zaabilooniinsi waatto'o.

¹⁵Yisaakoor awwonsaan Diibooranne maqirem waatto'o. Eeyya, Yisaakoorim Baaraaqa awwonaa cebbi uulla marukko. Ihukkaarem Roobeel sulli lam tiir ihukko; waarimmaa hosimmaa malamukko.

¹⁶Mahina gereebbi lambe'enne ikkaa dassitto? Gereebbina allaaraan fiinqeesoo fiinqeeshsha macceesseenattennihe? Roobeel sulli waarimmaa hosimmaa malamukko.

¹⁷Gaad sulli Yoordaanoos daajji eeqidonne afuurukko. Daan sulli markaphphi woronne mahina gatukko? Aseer sullim dambalaq gadanonne afuurukko; ee beyyonnem hee'ukko.

¹⁸Ihukkaarem Zaabiloo'n sulli ixxuwwi gaga lehina higissa'a uwwito'o. Niftaaleem sullim ee uulli duunnuwwanne ee'isa ikko'o.

¹⁹Adilluwwi waatta'a oranto'o; Kana'aa'n adilluwwi Magiido'i wo'i bu'i gadanonne yoo Taa'inaakanne oranto'o. Ihukkaarem ni bira bogga'a massito'oyyo.

²⁰Boollaanki iimaninne ixxuwwi taakkisinne Siisaarinne oramukko.

²¹Qiishoo'n diris ixxuwwa fii'aa massukko. Gaassi Qiishoo'n daajjim ixxuwwa massukko. I foore, qoxxitaa mare!

²²Siisaar faradaan jigisukkuuyyi waarukko; ixxuwwi konte'im banqisa gugukko.

²³Waa'ina asse'amaanchim «Meerooza duummehe. Ee beyyonne hee'oo keeno hundam guullitakka'a duummehe. Ixxuwwi Waa'i kollonnetti ikka'a ixxi diina'inne oranto'oyyo» yukko.

²⁴Qeene'i uulli Hebeer meentichcho Yaa'eela meenti hundiinsim maasse'anto'ookkotan ikkona. Dukkaananne hee'oo meenti hundiinsim maasse'anto'ookkotan ikkona.

²⁵Siisaar isena «Wo'o agise» yukko. Ihukkaarem ise ado uwwito'o. Danaam injaffanne issita'a gi'ina uwwito'o.

²⁶Isem mat anganne dukkaana kaasakkam xiribba makki angannem baxaa'n fanxiiza amaddo'o. Siisaarikam horoore aphphisso'o; macqontannem kaasso'o.

²⁷Ixxim is lokki beyyonne tuude'aa ubukko. Is lokkiinsi woroonim qubbukko. Qubbu beyyonnem lehukko.

²⁸Siisaar ama maskootinne moo'llo'o. Hoffi afokkichchinnem xuxxita'a moo'lla'a «I beetik faraxxi gaarre'i mahina dasukko? Faraxxi gaarre'i gug mahina qaqqisaa waarukkoyyo?» yita'a xa'mmito'o.

²⁹Isenne yoo qoor landi dabachcha uwwukko; ihukkaarem ise tiironne dabaransitu'uuyyi

³⁰«Malonnem ixxuwwi boggam luwwa siidda'a baxxantu'uuyyatte ihookko? Mato te'im lam baajaam landa mat manchina, Siisaarinam hagaraam doo'l eddechchi afaatette. I gaanjinam wereeggi eddechcha siidaakkatetti ihookko» yito'o.

³¹Waa'a! Ki diina'i hundim eehido'isinne lehaa beeddona. Ihukkaarem ki besh da'l eelliinchisa bololhona. Ee lasage uulli sor hiinchi hundoomam xummukko.