Read Hadiyya Gassaa'n Kitaaba 6 Bible Online

Gassaa'n Kitaaba 6 - Hadiyya bible

Gassaa'n Kitaaba 6

¹Odim Isra'ee'l minaadab Waa'i illagenne jor baxo baxxo'o. Ee bikkina Waa'i Miidiyaa'm manni anganne higisaa uwwukko. Ixxuwwim lamar hiincho gassito'o.

²Miidiyaa'm[3] mannik ciimo'i Isra'ee'l minaadabanne wodu bikkina Isra'ee'l minaadab duunnuwwanne bare, daawwa'uwwaa girbuwwaa axisso'o.

³Isra'ee'l minaadab sire'e wixxam ammane Miidiyaa'mmek, Amaaleeqikii eelliinchi firoo kolli uulli mannii waattu'uuyyi ixxuwwa qassam hee'llo'o.

⁴Ixxuwwi uullannem wiiddantu'uuyyi Gaaza'i afeebe'e wixamu hurbaata bi'issam hee'llo'o; gereebbika, larikaa hallikaa allaachcha ushe'lla'a massitam hee'llo'i bikkina Isra'eelina mahim gatam hee'ukkoyyo.

⁵Larinnee dukkaannuwwinnee waattam hee'llo'i bikkina qawwaawwi waarukkoka labam hee'ukko. Ixxuwwikaa ixxuwwi gaameela'uwwikaa xigo la'akkeena hore'em xanakkambee'an hee'ukko. Waattu'uuyyi uulla bi'issam hee'llo'o.

⁶Ee'isinne Isra'ee'l minaadab Miidiyaa'm minaadaphphi kee'mmaalli hawwonne ubbo'i bikkina hara'mmona Waa'i kollonne laatto'o.

⁷Isra'ee'l minaadab Waa'i ixxuwwa Miidiyaa'm manni angiinsi gatisona laatto'aare

⁸ixxuwwina mat hiraagaancho asse'ukko. Oo hiraagaanchim Isra'ee'l Moollanni Waa'iinsi «Gibxanne agiddanonne hee'llakko'i beyyiinsi fissummo.

⁹An ki'nnuwwa Gibxi uulli manni angiinsii ka uullannem wor amaddam kee'n angiinsii gatisummo. Ixxuwwa ki'nnuwwi illagiinsi hollaa uullooma ki'nnuwwina uwwummo.

¹⁰An ki'nnuwwina Moollanni Waa'i ihummisaa kaba uullooma lago aa'llakka'a hee'llakkam Amoore'i manni qophpha'n waa'uwwina otossitakkambee'isaa kuraa hee'ummo. Ihukkaarem ki'nnuwwi i sagara macceessakko'oyyo» yoo asso amadaa waarukko.

¹¹Ee lasage Waa'ina asse'amaanchi «Oofira yakkam hegeego waaraa Abi'eezer moolliinsette ihoo Yoo'aas hujjuphphi haqqichchi lugumonne afuurukko. Yoo'aas beet Geedewoon Miidiyaa'm manniinsi maaxamaa woyina ciinsakkam beyyonne arasa ganam hee'ukko.

¹²Waa'ina asse'amaanchi ixxena mo'amaa «Kaa, qoxar malaayyaam mancho, Waa'i kiinninnette» yukko.

¹³Geedewoonim «I moollanna, Waa'i niinninnetti ihuta'n ku hawwi hundim neesenne hinkid afookko? Waa'i neese Gibxiinsi fissaakko yitu'uuyyi niyyanno'i kutto'i aganni hannonne yookko? Ihukkaarem kaba Waa'i neese uraakko. Miidiyaa'm manni angannem neese higisaa uwwaakko» yukko.

¹⁴Ee lasage Waa'i «Mare, kiina yoo malaayyi hundinnem Isra'ee'l minaadaba Miidiyaa'm manni angiinsi gatise; an gagim keese asse'ummo» yaa ijaajukko.

¹⁵Geedewoonim «I moolli Minaas sulliinsi hundiinsim hoongaancho; anim i abaroos lambe'enne hore'em hoffan ihummi bikkina Isra'ee'l minaadaba hinkid gatiseena xanoommo?» yukko.

¹⁶Waa'im ixxena «Hanqinam an kiinninne maqire ihaa hara'mmoommi bikkina at Miidiyaa'm manna mexxo'i mat manchisa issitaa aphphissootto» yukko.

¹⁷Geedewoonim «An ki illagenne nuura siidaammoohan ihulas hanqinam at Waa'i ikkittisa la'isoo mare'e moo'ise.

¹⁸An kiina daba'llaa waaraa kitima hicaa'eembe'em hay at ka beyyiinsi mattitte» yukko. Waa'im «At waatteebe'e egeroommo» yukko.

¹⁹Geedewoonim ixxi mine maraa mat fellakkichchi geexa duraa maara gudisukko; tommi kiilo'o ihoo qax qamam aa'aa ursho'i bee'i qorosho'o sarukko; maara leemaatanne, maraqooma qure'enne issaa hujuphphi haqqichchi lugumonne hee'u Waa'i asse'amaanchina hincaa'ukko.

²⁰Waa'i asse'amaanchim ixxena «Maaraa qoroshsho'oo massitaa ee geejji kinanne dissitaa maraqooma ixxi hanenne dune» yaa ijaajukko. Geedewoonim ijaajamukkisam issukko.

²¹Waa'i asse'amaanchim ee kinanne hincaa ixxi anganne ammadu bicci ludinne maaraa qoroshsho'oo nakkukkaare ee kiniinsi giir firaa ee maaraa qorosho'oo itukko. Ee lasage oo asse'amaanchi illiinsi daphphukko.

²²Geedewoonim moo'ukkok Waa'ina asse'amaanchi ihukkisa qoossaa lasage «I Moollanni Waa'a! An ki asse'amaancho moo'ummi bikkina iina aayye!» yukko.

²³Ihukkaarem Waa'i «Xummi kiina ihona; baa'llitte; letooyyo» yukko.

²⁴Geedewoonim ee beyyonne kitti'm beyyo baxaa «Waa'i xummi Waa'a» yaa weeshukko. Oo kitti'm beyyim kaballi afeebe'e Abi'eezeer moolli uullanne Oofiranne uullaa yookko.

²⁵Waa'i ee hiimonnem Geedewoonina «Kiyyannika mooraa mullekam lamar hiinchi mooraa masse; kiyyanni Ba'aala yakkam qophpha'n waa'ina baxisu kiti'm beyyom ginde; ee kiti'm beyyi gadanonnem yoo ‹Asheera› yakkam meentichchi waa'i misilam iiqansitaa uunje.

²⁶Ee gindamu luwwi tuubbanne ki Moollanni Waa'ina kiti'm beyyo danaamisa axissaa baxe. Ee lasage la'm moora massitaa iiqansitaa uunjitti Asheer misi'l hururanne ee moo'l maara hundam shokkiisakka'a hincaa'akkam kitim issitaa hincaa'e» yukko.

²⁷Ee bikkina Geedewoon ixxi awwaadaaniinsi tomminne maqirem Waa'i ixxo ijaajukkisam issukko. Ihukkaarem ixxi moolloo ee beero'i mannaa baddaa hee'u bikkina eekka issukkok ballannette ihoo'n hiimonnette.

²⁸Ee beero'i minaadab la'm balli daram ki'aa Ba'aalina kitima hincaa'akkam beyyi gindamukkisaa Asheer misilim iiqamaa ubukkisaa moo'llo'o. Eehe'ennem haareechcho baxamaakkoo kiti'm beyyonne la'm moor duramaa shokkiisakka'a hincaa'akkam kitim hincaakkoo moo'llo'o.

²⁹Ee bikkina ixxuwwina'i ixxuwwim «Kaka issukkok ayyette?» yaqqanto'o. Eeham lobakata saarayyita'a lasage eekka issukkok Yoo'aas beet Geedewoonatte ihukkisa laqqo'o.

³⁰Ee lasage ee beero'i manni Yoo'aasina «Ba'aalina kitima hincaa'akkam beyyo gindaahii ixxi gadanonnem uullaa hee'u Asheer misilam iiqansaahii ubbuusu bikkina ki beeto shinoommo keyye fisse» yito'o.

³¹Ihukkaarem Yoo'aas nadajjinne ixxo kibitta'a uullitto'i manni hundinam «Ki'nnuwwi fitantakkamok Ba'aalinattennihe? Te'im ixxo gatissakkamonnihe? Ki'nnuwwiinsi ixxi bikkenne fitamookkok hee'ulas soodeebee'e lehona. Ba'aal waa'i ihaakkoolas gindamukkok ixxena kitimakkam beyyi ihu bikkina ixxi gagim fitamona» yukko.

³²Ee lasage Yoo'aas «Gindamaa ubukkok ixxena kitimakkam beyyi ihu bikkina xanoohane ihulas Ba'aal ixxi gagim fitamona yeena hasaa ee balla Geedewoonina Yiruba'aala» yaa summa fissukko.

³³Ee lasage Miidiyaa'mmek, Amaaleeqikii eelliinchi firoo kolli uulli mannii mat ikka'a Yoordaanoos daajje fitta'a Yizra'ee'l cebbanne wiiddanto'o.

³⁴Waa'ik Ayyaan Geedewoonanne dillukko. Ixxim Abi'eezer moolli hundim awwonta'a fittona xurumba fugukko.

³⁵Odim Minaas sullim ixxo awwontamisina manna asse'ukko. Ee'isam Aseerik, Zaabiloonikii Niftaaleem sulluwwii ixxo awwontona asse'ukko. Ixxuwwim mulli keeninne maqirem ixxo awwonteena fitto'o.

³⁶Ee lasage Geedewoon Waa'ina «At Isra'eela iinninne gatisseena eese doo'llittan ihukkisa woccaatto.

³⁷Oono'o, neese arasa gannoommi oodo'onne fintamaakkoo gereebbi odda dissoommo. Sooxxi dara eehanni kululleet hundim gogaalli ihaa xale'i ka oodo'onne qiibat hee'ulas at woccittisam Isra'eela gatisona doo'llittan ihukkisa an eehanninne la'oommo» yukko.

³⁸Ixxi yukkisam ihukko. Geedewoon la'm balla soodaraar daram ki'aa ee gereebbi odda ciinsukkaare mat injaffi wo'i firukko.

³⁹Ee lasage odim Geedewoon Waa'ina «He'i odim mataagge wocoommo; at eesenne quqqitte. Kaba odim ee oddanne mulli mare'i moo'amona xa'mmoommo. Kakore xale'i oo oddi gogaalli ihaa ixxi kululleet hundim aashaalli ihoo'isa isse» yukko.

⁴⁰Waa'im ee hiimom oo mare'i ihoo'isa issukko. La'm balli daranne oo oddi xale'i gogaalli ihaa ixxi kululleet hundim hadaddinne aashaa hee'ukko.