Read Hadiyya Gassaa'n Kitaaba 7 Bible Online

Gassaa'n Kitaaba 7 - Hadiyya bible

Gassaa'n Kitaaba 7

¹La'm balla daram Yiruba'aala yamamu Geedewoonii ixxenne maqire hee'u mannii hundim soodaraar daram ki'aa Harood bu'i gadanonne wiiddanukko. Miidiyaa'm mannim ixxuwwiinsi hanaa'n qaranne Moore'i duu'n gada'n cebbi woronne wiiddanaa hee'ukko.

²Waa'im Geedewoonina «Miidiyaa'm minaadaba ki'nnuwwi anganne higisaa uwwoombee'isa kiinninne yoo minaadab dut ihu bikkina gaqqi malaayyinne kaa'ukkoka labisaa iina lomba uwwooyyo.

³Ee bikkina minaadabina ‹Ki'nnuwwi lambe'iinsi baddoohii muggoohii yoolas ixxi mine daba'llaa marona; neese ka Gala'aaxxi duunanne egelloommo› yitaa kure» yukko. Ee mashka'inne lamiyyii lam kumii daba'llukkaare tommi kum gatukko.

⁴Ee lasagem Waa'i Geedewoonina «Manni kabadem lobakat ihu bikkina ixxuwwa daajje ammaddaa dille; anim ee beyyonne hasoommi keeno annanni issoommo. Ku manchi kiinninne maqire marona yoommok marona; odim daba'llona yoommok daba'llona» yukko.

⁵Ixxim manna amadaa daajje dillukko; Waa'im Geedewoonina «Wish wo'o agoo'isa ixxi allabinne wo'o ki'isaa agookkoka ixxi gurubbinne guruphphaa agoo keeniinsi annanni isse» yukko.

⁶Wo'o ixxuwwi oobo'inne ki'issa'a aggo'i kee'n xig sas xibbi ihukko; ihukkaarem gatto'i qax hundim ixxuwwi gurubbinne guruphphita'a wo'o aggo'o.

⁷Waa'im Geedewoonina «Ixxuwwi oobo'inne ki'issa'a aggo'i sas xibbi manninne ki'nnuwwa gatisoommo. Miidiyaa'm minaadabam ki anganne higisaa uwwoommo. Ihukkaarem gatto'i qax ixxuwwi mine daba'llita'a mattona kure» yukko.

⁸Ee bikkina Geedewoon ee minaadaphphi sinqaa xurumbuwwaa sasem xibbem mannim aa'lla'a mulli Isra'ee'l minaadab ixxuwwi minem daba'llita'a mattamisina geegeesukko. Ee ammane hundam Miidiyaa'm minaadab ixxuwwiinsi woroon yoo cebbanne wiiddanaa hee'ukko.

⁹Ee hiimom Waa'i Geedewoonina «An ixxuwwa ki anganne higisaa uwwoommi bikkina ki'llaa ixxuwwi wiiddanta'a yo'i beyyo dille» yaa ijaajukko.

¹⁰Atimdu dillimma badditlas kiina awwaadaanchi Phuura'anne maqirem ixxuwwi wiidda'n beyyo dille.

¹¹Ixxuwwi woccam woshsham macceessaa lasage ixxuwwa qasseena iggitootto» yukko. Ee bikkina Geedewoonii ixxena awwaadaanchi hee'u Phuura'aa diina'i wiiddanaa hee'u beyyonne hincito'o.

¹²Xig lobakat qawwaawwi qaxa ihoo Miidiyaa'mmek, Amaaleeqikii eelliinchi firoo kolli mannii cebbanne wiiddanaa hee'ukko. Ixxuwwi gaameela'uwwim dambalaq shashsha'llisa xigakkeena xanakkambee'i qax hee'ukko.

¹³Geedewoon ee beyyo afoohaare mat manchi ixxi beshichchina moo'aakkoo haqaawwo kuram hee'ukko. Oohim «Mat xeffo'i so'i qorosho'i duuniinsi onkoroollaa dillaa neese wiiddannummi Miidiyaa'm dukkaana aphphisukko. Ixxim malaayyaamisa aphphisu bikkina dukkaan himbiriiqamaa uullanne biddiqukko» yoohane.

¹⁴Ixxi beshichchim «Kuka'i Isra'eeliinsetti ihu Yoo'aas beet Geedewoon bisa'a bagaan mullaneyyo. Waa'i Geedewoonina Miidiyaa'm minaadabaa ni gogotaa hundam ixxi anganne higisaa uwwaakko» yaa haqaawwo tirukko.

¹⁵Geedewoon haqaawwoo haqaawwi tiratoo macceesaa Waa'ina otossukko. Ee beyyiinsim Isra'ee'l manni wiiddanaa yoo beyyo daba'llaa maraa «Waa'i Miidiyaa'm gogota hundam ki'nnuwwi anganne higisaa uwwu bikkina ki'llehe» yukko.

¹⁶Sasem xibbi manchom sas beyyonne baxxansaa gaadaanina annannichchinam mat mat xurumbaa woronne xomboor yoo mat mat harachchoo uwwukko.

¹⁷Ixxuwwinam «An ni diina'i wiidda'n gadanonne hincaa issoommi luwwa qoxxitakka'a moo'llakka'a ki'nnuwwim ee an issummisa issehe.

¹⁸Anii iinnenne maqire yo'i mannii xurumba fungoommi ammane ki'nnuwwi annannichchim xurumba ee wiidda'n kululleetanne hundannem fuggakku'uuyyi ‹Waa'inaa Geedewooninaa orammehe!› yitakku'uuyyi shuullehe» yukko.

¹⁹Hii'm baqitenne waardiyyuwwi dabassanta'a lasage Geedewoon ixxenne hee'u mat xibbi gaadaaninnem ixxuwwi diina'i wiiddanto'i gadanonne hincita'a ixxuwwi xurumba fuggo'o; amaddo'i harallam iiqansito'o.

²⁰Mulli kollinne hee'llo'i lamem gaalchim ee'isa issito'o. Hundim qeddi anganne aphphoo xomboora, makki angannem xurumba amadda'a «Waa'inaa Geedewooninaa orammoommo» yitu'uuyyi shuutto'o.

²¹Gaadaan annannichchim ixxena qoodamu beyyonne uullukko; diina'i gogoot hundim laarukkuuyyi gibukko.

²²Geedewoonik sasem xibbi mannim xurumba fuggo'i ammanenne diina'i gogot ixxuwwina'i ixxuwwim bisa'inne beeddixxantamisa Waa'i issukko. Gatto'i qaxim «Xireera» yakkam kollonne daba'llita'a Betishiixanne afeebe'ee ee beyyiinsim higga'a Xaabaat gadanonne yoo Aabeelmahool afeebe'ee gibbo'o.

²³Ee lasage Isra'ee'l gaadaan Niftaaleem sulliinsi, Aseer sulliinsii Minaas sulliinsii hundiimii weeccanta'a fitta'a Miidiyaa'm manna laseessu'uuyyi hollito'o.

²⁴Geedewoonim duunaam uullanne hee'llam Efireem sullina «Dillitakka'a Miidiyaa'm gogota qassehe. Miidiyaa'm gogot Yoordaanos daajjee ixxonne exxoo daajjuwwaa Beetbaar afeebe'e yoo goog hundam fitta'a xottambee'isa qassehe» yaa asse'ukko. Ee bikkina Efireem sulli hundim weeccanta'a Yoordaanoos daajjee ixxonne exxoo daajjuwwa firakkam gooccuwwaa hundam Beetbaaranne afeebe'e ifiissa'a amaddo'o.

²⁵Ixxuwwim Miidiyaa'm awwonsaa'nneka lamo Ooreebaa Zaa'eebaa qeefaddo'o. Ixxuwwam Ooreebaa «Ooreeb kina» yakkam beyyi gadanonne Zaa'eebaa «Zaa'eeb woyina ciinsakkam beyyo» yakkam beyyi gadanonne massita'a shito'o. Ee lasage gatto'i Miidiyaa'm manna hollansito'o. Ooreebikaa Zaa'eebikaa horoore mutta'a Geedewoon beyyo eebbo'o. Ee ammane Geedewoon Yoordaanoos daajjiinsi eelliinchi firanne hee'ukko.