Read Hadiyya Gassaa'n Kitaaba 8 Bible Online

Gassaa'n Kitaaba 8 - Hadiyya bible

Gassaa'n Kitaaba 8

¹Ee lasage Efireem sulli Geedewoonina «Mahina kid issitto? Miidiyaaminne oranteena mattittuuyyi neese mahina weeshshittoyyo?» yita'a ixxonne qaraatta'a quuqqo'o.

²Ihukkaarem ixxuwwina «An issummok ki'nnuwwi issitakko'aanninne akeekamoohaare mahannem xigamooyyo. I sulli hundim baxukkaanniinsi Efreem sulli baxu hoffi luwwim lophphookko. Efireem sullik woyi'n qarme'i Abi'eezer woyi'n mishiinsi e'llooyyoonnihe?

³Waa'i Miidiyaa'm mannika awwonsaano Ooreebaa Zaa'eebaa ki'nnuwwi anganne higisaa uwwukko. Eehaare ki'nnuwwi baxxakko'aanninne akeekamoo baxo an maha baxaate?» yu ammanenne ixxuwwik nadajji billukko.

⁴Ee ammane Geedewoon ixxenne maqire hee'llo'i sasem xibbi manninnem Yoordaanoos daajji eeqidonne firaa hee'ukko. Ixxuwwim mahaa hooggo'aarem ixxuwwi diina'i lasonne aagga'a hollitam hee'llo'o.

⁵Sukoota affo'i ammanenne Geedewoon ee beero'i mannina «Miidiyaa'm adilluwwa Zeebaahaa Xalmuunaa'i laseesummuuyyi eese awwonto'i manni lobakata hooggo'i bikkina he'i ittam qorosho'o uwwehe» yukko.

⁶Ihukkaarem Sukooxxi awwonsaan «Ki gogotina neese ittam luwwa uwwinoommok at Zeebaahaa Xalmuunaa'aa qeefaddaahinnihe?» yito'o.

⁷Geedewoonim «Eehaare danaamo; Waa'i Zeebaahaa Xalmuunaa'aa i anganne higisaa uwwoo ammane udma'i uulli uttinnee halluttinnee ki'nnuwwa loodoommo» yukko.

⁸Ee lasage Geedewoon Phinu'eela maraa Sukoot manna xa'mmikkisam xa'mmukko. Ihukkaarem ixxuwwim Sukoot manni dabatto'isam dabatto'o.

⁹Ee bikkina ixxuwwinam «An kaachchinne xummam daba'lloommi ammane ka kininne baxamaakkoo qoto'akka'a beero'i egerakkam beyyo gindansoommo» yukko.

¹⁰Zeebaahii Xalmuunaa'ii eelliinchi firoo kolli gogotiinsi gatto'i tommoo onti kum gaadaaninnem Qaarqooranne hee'llo'o. Xibbii lamiyyi kum o'l mu'uta lade'llo'oo goon hundim beeddita'a hee'llo'o.

¹¹Geedewoon udma'i uulla massoo googinne maraa Noobaahiinsii Yoogbaahiinsii eelliinchi firinne hee'u gogot jalagaakkoohaannonne dangonnem qasukko.

¹²Miidiyaa'm adilluwwi lamim Zeebaahii Xalmuunaa'ii gibbo'o; ihukkaarem Geedewoon ixxuwwa hollaa qeefadukko. Ixxuwwi gogotam binnaa'ukko.

¹³Yoo'aas beet Geedewoon oriinsi Heerees duu'n googinne daba'llukko.

¹⁴Ixxim Sukoot beero'ika mat woraadichcho qeefadukko; oo woraadichchim ee beero'i gassaa'nnekaa lommannikaa lamarayyikaa lamar manchikaa summa kitaabaa uwwukko.

¹⁵Ee lasage Geedewoon Sukoot manni beyyo waaraa « ‹Zeebaahaa Xalmuunaa'aa kabe'e afeebe'e qeefaddibee'i bikkina kaba sibaaronne hooggo'i ki gaadaanina ittam hurbaata uwwinoommok mahinatte?› yitakka'a gaddakka'a hee'llakko'o. Ihukkaarem kaba Zeebaahii Xalmuunaa'ii kuno'o kaba i angannette» yukko.

¹⁶Ee lasage Geedewoon uttaa halluttaa udma'iinsi massaa Sukoot beero'i awwonsaano loodukko.

¹⁷Phinu'eel beero'o qoto'akka'a egerakkam beyyom gindukko; ee beero'onne hee'oo goon hundam shaa guullukko.

¹⁸Odim ee lasage Geedewoon Zeebaahaa Xalmuunaa'aa «Taabooranne shitakko'i manni hinkido'i keen hee'llo'o?» yaa xa'mmukko. Ixxuwwim «Keese labbam keen hee'llo'o. Hundichchim adi'l ooso labbamane» yita'a dabatto'o.

¹⁹Geedewoonim «Ixxuwwi iyyummoos ikko'i iyyabbaayyuwwi hee'llo'o. Ki'nnuwwi ixxuwwa shitakkobeeta'n anim ki'nnuwwina qishixxoomman hee'ukkisa hanqo'isinne hide'oommo» yukko.

²⁰Ee lasage Geedewoon ixxi won beetina Yeeteerina «Kaba ki'llaa ixxuwwa shihe» yaa ijaajukko. Ihukkaarem ixxi beet ooshshichchi hee'u bikkina bisa'a makkisaa shimma baddukko.

²¹Ee lasage Zeebaahii Xalmuunaa'ii Geedewoonina «At ki gagim shihe! Manchi beetik malaayyi ixxi gaqqi orachchisame» yito'o. Ee bikkina Geedewoon ixxuwwa shaa ixxuwwi gaameela'uwwi gaanjenne hee'u wereeggi mu'uta hundam massukko.

²²Ee lasage Isra'ee'l minaadab Geedewoonina «At neese Miidiyaa'm manni angiinsi gatissaatto. Ee bikkina atii ki oosii ee'isam ki oos oosii neese gassaan ikkehe» yito'o.

²³Geedewoonim «Anim i beetim ki'nnuwwi gassaan inkoommoyyo. Ki'nnuwwi gassaanchi Waa'i ixxi gagoomame» yaa dabarukko.

²⁴Ee lasage Geedewoon ixxuwwina «An mat luwwa ki'nnuwwa xa'mmoommo; ki'nnuwwi annanchim qeefaddakka'a massitakko'i macci gutichcho iina uwwehe» yukko. Isma'eel shumo'ina maccenne worqi gutichcho issimmi losanom hee'ukko.

²⁵Minaadabim «Liiranchinne uwwinoommo» yito'o. Eddechcha dakka'a annannichchim massitto'i macci gutichcho ee eddechchanne wixxaa'llo'o.

²⁶Geedewoon massu macci gutichchi lamiyyi kilo'o ihoo qax hee'ukko. Oohim mulli wereeggi luwwa, gaanji worqaa Miidiyaa'm uulli adilluwwi edde'llam muulli kashar edechchaa ee'isam ixxuwwi gaameela'uwwi ganjenne hee'u wereeggi luwwaa edoo'nnette.

²⁷Geedewoon eehanninne qophpha'n waa'a baxaa qaramu beero'onne Oofiranne dissukko. Isra'ee'l minaadab hundim Waa'a uraa ixxone otossimma asheerukko. Ookkim Geedewooninaa ixxi abaroosinaa qaash ihukko.

²⁸Ee'isinne Miidiyaa'm manni Isra'ee'l minaadabinne kaa'anto'o. Ee lasage od Isra'eela baddisseena xanto'oyyo. Geedewoon leheebe'i afeebe'e sor hiinchi hundoomam uulli xummukko.

²⁹Yoo'aas beet Geedewoon qaramu uulla maraa ixxi minenne afuurukko.

³⁰Ixxi dut meento eebaa hee'u bikkina ixxi gurubbiinsi fitto'oo lamarayyi goo'n oos hee'llo'o.

³¹Ixxenam Seekeemanne hee'llam mat bakki meentichcho hee'llo'o. Isem ixxena mat goonchi beeto qatto'o. Ee beet summam Abemeeleeka yaa weeshukko.

³²Yoo'aas beet Geedewoon umura goddaa lehukko. Ixxi anni Yoo'aas waammannem waammamukko. Oo waammim Abi'eezer moolli beero'i ihu Oofiranne yookko.

³³Geedewoon lehaa lasage Isra'ee'l minaadab odim Waa'ina amma'nnancha hoogimminne Ba'aala yakkam qophpha'n waa'uwwina otossito'o. Ba'aalbariitam ixxuwwi waa'i issito'o.

³⁴Isra'ee'l minaadab ixxuwwi kululleetanne hee'llo'i diina'iinsi hundiinsim gatisu ixxuwwi Moollanni Waa'a xaddo'o.

³⁵Geedewoon ixxuwwina issu er luwwi hundam xadimminne ixxi abaroosina anga dabattam keen ikko'oyyo.