Read Hadiyya Gassaa'n Kitaaba 9 Bible Online

Gassaa'n Kitaaba 9 - Hadiyya bible

Gassaa'n Kitaaba 9

¹Geedewoon bet Abemeeleek ixxi eeshimmuwwi hee'llam Seekee'm beero'o maraa ixxuwwina hundinam

²«Seekee'm manni hundinam ‹Geedewoonik lamarayyem oosiminnii mat manchi ki'nnuwwa gassutta'n e'llookko? Odim an ki'nnuwwina miqee maaraa ihummisam xaddakkotte› yitakka'a kullehe» yukko.

³Eeshimmuwwim ixxo bikkita'a ee woshsha Seekee'm manni hundinam kutto'o. Ixxuwwim «Ixxi niyyabbaayyo» yita'a Abemeeleeka awwonteena tiiro woncaa'llo'o.

⁴Ba'aalbariit miniinsi lamarayyi kin bira aa'lla'a uwwito'aare awwaad bee'i keenoo funaanaanoo bitaa'ukko. Ixxuwwim ixxo awwonto'o.

⁵Ixxim ixxi anni mi'n beyyo Oofira maraa Geedewoonina oos hee'llo'i lamarayyem ixxi abbaayyuwwam mat kinanne durukko. Ihukkaarem Geedewoonina ilmuchchi hee'u Yoo'aataam maaxamaa hee'u bikkina lehiinsi gatukko.

⁶Ee lasage Seekee'mmekii Beetimiilo'i mannii hundim wixxita'a Seekeemanne yoo hujuphphi haqqichchi lugumo matta'a Abemeeleeka adil issito'o.

⁷Yoo'aataamim eekka macceesaa Gariizaa'n duu'n ludonne firaa sagara iimaa'aa Seekee'm mannina awwonaa yoo woshsha wocukko. Ki'nnuwwi i woshsha macceessakko'aare Waa'im ki'nnuwwika macceesookko.

⁸Mat ayyaamo huqquwwi mat haqqichcho adil issiteena wixxita'a matta'a weerina «Neesenne adil ihe» yito'o.

⁹Ihukkaarem weer «Waa'uwwinaa manninaa awwaadoo i zayta uwwimma uraa haqquwwanne adil ihonnihe?» yukko.

¹⁰Odim ee lasage haqquwwi odakkichchina «Ni beyyo waattaa neesenne adil ihe» yito'o.

¹¹Ihukkaarem oda'i «Iikka xee'aallaa danaamoo ihu misha mishimma uraa ki'nnuwwanne adil iheena maronnihe?» yukko.

¹²Odim haqquwwi woyinina ‹Waattaa neesenne adil ihe› yito'o.

¹³Ihukkaarem woyin «An waa'uwwaa mannaa liiransoommi misha uwwimma uraa haqqanne adil ihonannihe?» yukko.

¹⁴Ee bikkina haqquwwi uttina «Waattaa neesenne adil ihe» yito'o.

¹⁵Uttim «Hanqinam eese ki'nnuwwanne adil issitakkeena hassakkolas waattakka'a i hafanne usheexxehe. Ee'isa issitakkobeelas iihaanniinsi uttaam caaffuwwiinsi giir firaa Liibaanoos digibbuwwa shokkiisookko» yaa dabarukko.

¹⁶Yoo'aataam odim «Abemeeleeka adil issitakko'ok hanqinnee xabbee'n googinnettennihe? Geedewoon ki'nnuwwina issu luwwa tiittakka'a ixxi abaroosa laboo'isinne abooyyitakkahinnihe?

¹⁷Iyyanni ki'nnuwwi bikkina oramukkisa sawwi'llehe. Ki'nnuwwa Miidiyaa'm angiinsi gatiseena ixxi gaga lehina higisaa uwwaa hee'ukko.

¹⁸Ihukkaarem kaballa ki'nnuwwi iyyanni mininne diina'oominne ki'llakko'ookko; ixxeka lamarayyem oosom matem kinanne duttakko'ookko. Eeham issitakko'ok Geedewoon ixxi mi'n baxaanchonne qaru Abemeeleek ki'nnuwwina qarmanchi ihu bikkinatte; ixxom Seekeemanne adil issitakko'o.

¹⁹Eehaare kaballa Geedewooninaa ixxi abaroosinaa issitakko'ok hanqinnee xabbee'n googinnettee ihulas Abemeeleekinnem liirammehe. Odim ixxim ki'nnuwwinne liiramona.

²⁰Eehid ihubeelas Abemeeleekiinsi giir firaa Seekee'mmekaa Beetimiiloo'n mannaa itona. Ee'isam Seekeemiinsii Beetimiilooniinsii giir firaa Abemeeleeka itona» yukko.

²¹Yoo'aataam eekka wocaa lasage ixxi abbaayyo Abemeeleeka baddu bikkina gibaa maraa Ba'eeranne afuurukko.

²²Abemeeleek Isra'ee'l minaadaba sas hiincho gassukko.

²³Ee lasage Waa'i Abemeeleek lambe'ennee Seekee'm manni lambe'ennee jor ayyaana asse'ukko. Ee bikkina Seekee'm manni Abemeeleeka laggo'o.

²⁴Oohim ihukkok ixxuwwi abbaayyi Abemeeleek shu Geedewoon lamarayyem oosikam xiigaa ixxuwwa shihona ixxo iggisso'i Seekee'm mannika baadoo miqisimminatte.

²⁵Seekee'm manni Abemeeleekanne diina'oominne ki'lla'a hofqax mannam doo'llita'a duunnuwwi ludonne daphphita'a egetto'o; ixxuwwim ee googinne higoo arata hundam boggo'o. Abemeeleekim ee woshsha macceesukko.

²⁶Ee lasage Eebeed beet Gaa'aal ixxi abbaayyuwwinne maqirem Seekeema waarukko. Seekee'm mannim ixxonne amma'nnanto'o.

²⁷Ixxuwwi hundim woyi'n kaashshi beyyo matta'a ixxuwwi woyi'n misha feetto'o. Woyi'n diqaasam lubba'a lob uguda issito'o. Ixxuwwi waa'ina otossitam mine aagga'a ee beyyonne ittu'uuyyii aggu'uuyyii Abemeeleeka game'llitam hee'llo'o.

²⁸Eebeed beet Gaa'aalim «Abemeeleek ayyette? Neese Seekee'm manni Abemeeleekina ho'llammoommok mahinate? Ixxi Geedewoon beetoyyonnihe? Zeebuldu ixxi gaaxxi awwonsaanchoyyonnihe? Hore'em ki'nnuwwina lugu'm anni ihu Seekee'm annina Hamoorina ijaajammehe.

²⁹Ka minaadaba awwonsoommok anetti ihumta'n Abemeeleeka haniinsi hooram hee'ummo. Odim ‹Ki gogota qoxxissaa fittaa orame!› yaa kuram hee'ummo» yukko.

³⁰Ee beero'i gassaanchi Zeebuul Eebeed beet Gaa'aal wocu woshsha macceesaa hore'em lobakata quuqukko.

³¹Ixxim Aruumanne hee'oo Abemeeleekina «Eebeed beet Gaa'aal ixxi abbaayyuwwinne maqirem Seekeema waaraakko. Beero'i mannim keesenne ki'oo'isa issaakko.

³²Ee bikkina at ki manninnem hiimonne ki'llaa biir beyyonne maaxantakka'a egellehe.

³³Soodo daram eelliinchi firukkuuyyi ki'llakka'a dangissakka'a beero'o qassehe. Gaa'aalii ixxenne yo'i keenii ki'nnuwwa qasseena fittam ammane xantakkoqaxinne qoxxitakka'a qassehe» yitakka'a kullehe yaa manna asse'ukko.

³⁴Ee bikkina Abemeeleekii ixxi mannii baqitenne ki'lla'a Seekeemiinsi biireen soor beyyonne baxxamanta'a maaxanta'a egetto'o.

³⁵Abemeeleekii ixxenne yo'i keenii Eebeed beet Gaa'aal beero'i ooxxi goocanne firaa uullaakkoo moo'lla'a maaxanto'i beyyiinsi fitto'o.

³⁶Gaa'aalim ixxuwwa moo'aa Zaabuulina «Moo'e, manni duu'n luddiinsi dilloolla» yukko. Zeebulim «Ookki duunnuwwanne moo'amoo awkare'e bagaan mannayyo» yaa dabarukko.

³⁷Odim Gaa'aal dabaraa «Moo'e; manni duuniinsi aad dilloolla. Mat qooxo'i gennaa'n qilxo'i googinne waaroolla» yukko.

³⁸Ee lasage odim Zeebul « ‹Neese ixxena ijaajammeena Abemeeleek ayyette?› yaa wocu ki suum kaba hannonnette? Kuk oo at gadditti minaadabayyonnihe? Kaba mattaa ixxuwwinne orame» yukko.

³⁹Gaa'aalim Seekee'm manna awwonsaa maraa Abemeeleekinne oramukko.

⁴⁰Gaa'aal gibukko; Abemeeleekim lasonne aagaa hollukko; beero'i ooxxi goocanne afeebe'e dut keen hawwodanto'o.

⁴¹Abemeeleek Aruuma heechchi beyyi issukko. Ihukkaarem Zeebul Gaa'aalaa ixxi abbaayyuwwaa Seekeemiinsi hollaa fissukko. Ee lasage ixxuwwi Seekeemanne hee'lleena xanto'oyyo.

⁴²La'm balla Seekee'm manni ixxuwwi abuulli uulla matto'isa Abemeeleek macceesukko.

⁴³Ixxenne yo'i mannam sas beyyonne baxxansaa hax beyyuwwanne maaxanta'a egettamisa issukko. Ixxim beero'iinsi Seekee'm manni firookkoka moo'aa maaxamu beyyiinsi firaa shukko.

⁴⁴Abemeeleekii ixxenne hee'llo'i mannii beero'i gooca egetteena geetta'a fitta'a goocanne uullito'o. Gatto'i lamem qooxo'im abuulli beyyika manna hundam shita'a guu'llito'o.

⁴⁵Abemeeleek qasanchinne mat balli hundoomam hosukko. Beero'ooma ixxi anganne issaa mannooma hundam shaa guullukko. oomam gindaa uulloommanne sooqido wixukko.

⁴⁶Seekee'm gimbi woronne hee'llo'i maanni eekka macceesso'i ammanenne Ba'aalbaariitina otossakkam mi'n woronne yoo giribanne aaggo'o.

⁴⁷Abemeeleekim Ixxuwwi ee beyyonne maaxanta'a wixxito'isa macceesukko.

⁴⁸Ee bikkina ixxi awwonaaninne maqirem Xaalmoo'n duunanne firukko; ee lasage heeda aa'aa haqqa muraa gudumonne iyyukko. Ixxi awwonaanim qaqqissa'a ee'isa issitona kurukko.

⁴⁹Ee bikkina annanchim haqqika caafa muraa iyyaa Abemeeleeka awwonaa maraa ee girbanne dissukko. Ixxuwwim oo maaxanto'i manni girbi woronne hee'llonam ee haqqanne shokka uwwito'o. Ee bikkina girbanne hee'llo'i manni hundim letto'o. Ee girbanne hee'llo'i goo'nnekii meentikii xig mat kuma ihoo qax hee'ukko.

⁵⁰Ee lasage Abemeeleek Toobeex beero'o maraa kibbukko.

⁵¹Ihukkaarem ee beero'i woronne beero'o qoto'akka'a egerakkam qoxxaalli gimbi hee'u bikkina goonii meentii gibaa ixxonne maxamukko; xufam issita'a ixxi iimanenne fitto'o.

⁵²Abemeeleek oramukkuuyyi ee gimba afaa shokka uwweena goocanne hincukko.

⁵³Ihukkaarem mat meentichcho liitimmi ifichcho hanaanaad fatakita'a Abemeeleekika sammo anto'o.

⁵⁴Ixxi o'l mu'uta amadu woraadichchina «Qaqqissaa waattaa eese ki bisa'inne shihe; meenti anganne lehukko yimma hasoommoyyo» yukko. Ixxim bisa'ine aphphisaa shukko.

⁵⁵Isra'ee'l minaadab Abemeeleek lehukkisa laqqo'i ammanenne annanchim ixxi gaqqi mine marukko.

⁵⁶Ee'isinne Abemeeleek lamarayyem ixxi abbaayyuwwam shaa ixxi annanne baxu hantaarina Waa'i baado miqisukko.

⁵⁷Ee'isam Seekee'm manni issito'i jollina hawwitamisa issukko. Ee'isam Geedewoon beet Yoo'aataam duumu duunchi afoo'isa kurukkok hundim wo'mmukko.