Read Hadiyya 3Yohaannis Asso 1 Bible Online

3Yohaannis Asso 1 - Hadiyya bible

3Yohaannis Asso 1

¹ Hanqinam iittoommi Gaayoosina lommanchi asse'ummi asso.

²Iittantaattoo iyyabbaayyo, ki foor fayya'i ihukkisa an la'oommo. Odim at fayya'i ikkoo'isinaa hee'lloo heechchi hundim kiina makkoo'isinaa Waa'a uunxoommo.

³Kiristoosanne amma'nnito'i abbaayyuwwik mat mat keen waatta'a at amma'nnantaattoohan ikkittisaa hanqi googonne qoxxitaa hee'lloo'isaa iina kutto'i bikkina lobakata liiramaammo.

⁴Mashka'oomim i oos hanqi googonne qoxxita'a hee'llamisa macceesimmiinsi lophphaa eese liiransoo luwwi bee'e.

⁵Iittantaattoo iyyabbaayyo, mahaa koyyi ikko'aarem amma'nnaan abbaayyuwwina hara'mmitoo luwwi hundinnem at amma'nnantaattoohane.

⁶At ixxuwwina moo'issitti iitto ka beyyi amma'nnaa'n wixxixxi illagenne kutto'ookko. Kabadem Waa'i awwaadina laboo'isinne ixxuwwina hara'mmitaa geegeessittaare danaamo.

⁷Mashka'oomim ixxuwwi Kiristoosina awwaaddeena fittu'uuyyi Kiristoosanne amma'nnitobee'i manniinsi maham hara'mmato siixxiteena hasso'oyyo.

⁸Ee bikkina amma'nnaan inkummi keen hanqo'i baxo mat inkaa banxoommisina eehido'i manna hara'mmimmi hasisookko.

⁹Kanniinsi illageenim amma'nnaa'n wixxitina mat luwwa kitaabaa hee'ummo. Ihukkaarem ixxuwwi awwonsaanchi iheena hasoo Diyootireefiis i woshsha aa'ukkoyyo.

¹⁰Ee bikkina an ki'nnuwwi beyyo waaroommi ammane ixxi ni summa bi'isukkuuyyii hamukkuuyyii wocu jor woshsha ki'nnuwwina kuroommo. Ixxi baxukkok xale'i eeqax ihoo'n amma'nnaano aa'oobee'ane. Odim aa'eena hasoo mulli keenom amma'nnaa'n mateeyyoomiinsi fissoolla.

¹¹Iittantaattoo iyyabbaayyo, eroka awwone bagaan jora awwontitte. Er baxo baxookkok hundim Waa'iinsette. Ihukkaarem jor baxo baxookkok Waa'a hore'em la'ooyyo.

¹²Dimeexiroos eroomma mannii hanqi ixxi gagimii hundim kuroolla. Anim edaa kuroommo; i naqqasimmim hanqi ihukkisa laqqakkamo.

¹³An kiina kitaabeena hasoommok dut luwwi hee'ukko. Ihukkaarem woraqatanne kitaaboommaanniinsi

¹⁴abbis ammanenne keese moo'eena neeyyato issoommi bikkina ee ammane maqirem atooralloommo.

¹⁵Xummi kiinninne maqire ihona; ka beyyonne yo'i amma'nnaan abbaayyuwwi kiina xummaato asse'llo'ookko. Ee beyyonne yo'i amma'nnaan abbaayyuwwi hundinam ni xummaato kure.