Read Hadiyya Yohaannis Kaalta 10 Bible Online

Yohaannis Kaalta 10 - Hadiyya bible

Yohaannis Kaalta 10

¹Ee lasage duuba weyyakkisa edde'aakkoo malaayyaam mulli asse'amaanchi iimaniinsi dillukkuuyyi moo'ummo. Ixxi horoo'l agannem waadamuunchi hee'ukko. Odim illi kollim eelliincho laboohan hee'ukko. Lokkuwwim gii'l utubbuwwa laboohan hee'ukko.

²Ixxi angannem mat biddiqaakkoo hoffi kitaabichcho amadaa hee'ukko. Ixxim makki lokkinne dambalaqa qeddi lokkinne uullaa hance'aa

³hobbichchi sagari'nnoo'i geejji sagarinne shuurukko. Shuuru ammanenne lamar banquwwi guggu'uuyyi wocco'o.

⁴Oo lamarem banquwwim wocca'a ki'llo'aare ee wocco'i luwwa kitaabeena ihummo. Ihukkaarem iimaniinsi mat sagar «Lamarem banquwwim wocco'i luwwam koobbaa xufe bagaan kitaabbitte» yookkoka macceesummo.

⁵ Odim dambalaqaa uullaa hance'aa uullaakkoohaannonne moo'ummi asse'amaanchi ixxi makki anga iim ki'isaa

⁶iimanee iimanenne yoo luwwaa, uullaa uullanne yoo luwwaa, dambalaqaa dambalaqanne yoo luwwaa qooccu heer heerina hee'oo Waa'i summinne hide'aa «Ka lasage dasooyyo.

⁷Ihukkaarem lama'l asse'amaanchi ixxi xurumbulla fugoo ayyaamo Waa'i ixxena awwaadaan hee'llo'i hiraagaanina kurukkisam Waa'ik misxir wo'mmookko» yukko.

⁸ Odim iina woddaa'i iimaniinsi wocukkuuyyi macceesummi sagar «Ee dambalaqannee uullannee uullu asse'amaanchi anganne yoo biddiqaakkoo kitaaba mattaa aa'e» yukkuuyyi macceesummo.

⁹Ee bikkina anim ee asse'amaanchi beyyo maraa «Kitaabamaa xaaxamu hoffi kitaabichcho iina uwwe» yummo. Ixxim iina «Massitaa ite. Ittoo ammane ki suumenne maraphphisa xee'ookko. Ihukkaarem liqicitoohaare ki godabo qaraassookko» yukko.

¹⁰Anim ee kitaabamaa xaaxamu hoffi kitaabichcho ee asse'amaanchi angiinsi aa'aa itummaare i suumenne maraphphisa xee'ukko. Ihukkaarem liqicaa lasage i godabo qaraassukko.

¹¹Ee lasage iina «Dut manni bikkina, minaadaphphi bikkina, adilluwwi bikkinaa annanni annanni suuminne wocoo kee'n bikkinaa at odim Waa'i sagara wocimmi hasisookko» yukko.