Read Hadiyya Yohaannis Kaalta 11 Bible Online

Yohaannis Kaalta 11 - Hadiyya bible

Yohaannis Kaalta 11

¹ Ee lasage bicco laboo keennaanchi shuuyyi iina uwwamukko. Eesem «Ki'e, Waa'i minee Waa'ina kitima hincaa'akkam beyyoo keene. Odim ee minenne otossitam keenom xige.

² Ihukkaarem Keesammi miniinsi biireen yoo qash wor mulli minaadabina uwwamu bikkina keentitte. Ixxuwwim keesammi Yerusaalee'm beero'o soree lam aganaa hance'antamo.

³Ee ammane lamem i naqaashshuwwim xiddi eddechcha edde'lla'a mat kumaa lam xibbee lohayyi ballaa hiraago kuttamisina malaayye uwwoommo» yukko.

⁴ Oo lamem naqaashshuwwim uullina Moollanni illagenne uullitam zayti firoo lam wee'l haqquwwaa lam caakka dissakkam mu'uttuwwaa.

⁵Ayyim ixxuwwa hawwodeena hasuta'n ixxuwwi suumiinsi giir firaa ixxuwwi maso'o itaa urookko. Ixxuwwa hawwoddeena hassam keen hundichchim ee'isinne letamo.

⁶ Oo keen hiraaggam ammane xeen ga'nnoobee'isa hoottam malaayyi yookko. Odim wo'o xiiganne dabattam malaayyii hasso'i amman hundam ihu booban hundinnem uulla aphphissam malaayyii yookko.

⁷ Ixxuwwi kuttam luwwa kutta'a guullita'a lasage tungibee'i baalliinsi firoo moochchichchi ixxuwwinne oramaa ixxuwwa kaa'aa shookko.

⁸ Ixxuwwi leeshim kobi'llishshinne Soddoma te'im Gibxa yamamaa weeshamoo lob beero'i googonne ubookko. Oo beero'im ixxuwwi Moollanni saqalamu beero'o.

⁹Annanni annanni moolliinsi, shumo'iinsi, annanni annanni suume woccam keeniinsii minaadabiinsii hee'llo'i manni sas ballaa kolloo ee kee'nneka leesha moo'llamo; leeshim waammamoobee'isa hoottamo.

¹⁰Oo lamem hiraagaanim uulli minaadaba lobakata barche'e issita'a hee'llo'i bikkina ixxuwwi leto'aare uulli minaadab lobakata liiranta'a uguda issita'a irfo'o luwwa uwwaqqantamo.

¹¹ Ihukkaarem sas balliinsii kolliinsii lasage foore uwwoo fooshshi Waa'iinsi waaraa ixxuwwi leeshanne aagukkaare lokkinne uullito'o. Ixxuwwa moo'llo'i mannim lobakata baddito'o.

¹² Ee lasage oo lamem hiraagaanim iimaniinsi «Kid iim fillehe» yoo sagara macceesso'o. Ixxuwwim ixxuwwi maso'i moo'llu'uuyyim umbu'llanne ikka'a iimane fitto'o.

¹³ Ee ammanchom uulli malaayyaamisa huxe'ukkaare beero'ik tommi suum gindamukko. Minaadaphphekim lamar kum lehukko. Eehanniinsi gatto'i manni lobakata baddita'a iima'n Waa'ina lomba uwwito'o.

¹⁴«Aayye» yisiisoo la'm hawwi higaakko. Oono'o! «Aayye» yisiisoo saxxi hawwi qaqqisom waarookko.

¹⁵ Ee lasage lama'l asse'amaanchi ixxi xurumbulla fugukko. Iimanenne dut geejji sagar «Kaba uulla gassimmik malaayyi ni Moollannanee ixxi doo'llu Kiristoosanee ihaakko. Ixxim heer heerina gassookko» yukko.

¹⁶Odim Waa'i illagenne ixxuwwi adilla'n barcumanne afuutto'i lamiyyii soor lommannim illillaachcha qubbita'a Waa'ina otossito'o.

¹⁷Otossitu'uuyyim «Hee'llittaannoo yoontaannoo, Hundam xantoo Moollanni Waa'aa! At kiikka lobakat qoxxaalli malaayye aa'llitti bikkinaa adil ikkitti bikkinaa galat kiina ihona.

¹⁸ Keese laqqambee'i minaadab lobakata nadaddo'o. Ihukkaarem kiikki malaayyaam quunqi ammanii leto'i keenonne oogattoo ammanii afukko. Odim kiina awwaaddam keenina oohim ki hiraagaanina, ki summa lonsitam keenina, hoffi keeninaa lob keeninaa ki minaadab hundinam irifo'o uwwitoo amman afukko. Odim ka uulla bi'isso'i keenom bi'issoo amman afukko» yitam hee'llo'o.

¹⁹Ee lasage iimanenne yoo Keesammi Min fooqukko. Ee Keesammi Minennem Waa'ik tommi ijaaj yoo saaxin moo'amukko. Odim banqi belellaat, sagar, banqi gug, uulli huxechchii malaayyaam baradii ihukko.