Read Hadiyya Yohaannis Kaalta 12 Bible Online

Yohaannis Kaalta 12 - Hadiyya bible

Yohaannis Kaalta 12

¹Ee lasage moo'akka'a la'akkambee'i maalalsiisoo mare'i iimanenne moo'amukko. Eelliincho edde'lla'a, aganaa is lokkiinsi woroon issita'a, tommoo lam boollaankam is horoorenne adilla'n mare'oomina issita'a mat meentichcho moo'anto'o.

²Isem lamfoorette hee'llo'o. Qatteena xuuchchi amadu bikkina hawwita'a laattam hee'llo'o.

³ Oono'o! Odim mulli mare'im iimanenne moo'amukko. Oohim lamar horoorii tommi buudii yoo mat geejji kashar xarakkichchi moo'amukko. Ixxi horoolluwwannem adilla'n mare'ik lamar issamaa hee'ukko.

⁴ Ixxi sheeriminnem iima'n boollaankika saxxi suume hixixaa'aa uullanne ubbuusukko. Ixxim woddaa'i xuu'llam hee'llo'i meentichcho qattam ammane ciilichchooma qatto'isam itaa ureena meentichchi illagenne maraa uullukko.

⁵ Ee lasage oo meentichcho minaadab hundichchom xaa'l biccinne ijaajaa gassoo goonchi beeto qatto'o. Ihukkaarem oo meentichcho qatto'i beet Waa'i beyyo oohim Waa'i adilla'n barcu'm beyyo dangonnem massamukko.

⁶Oo meentichchom udma'anne 1,260 ballinaa abooyyakkamisina Waa'i isena gudisaakkoo beyyo gibba'a matto'o.

⁷ Ee lasage iimanenne or ki'ukko. Mika'eelii ixxi asse'amaanii xarakkichchinnee xarakkichchi asse'amaaninnee qasanto'o.

⁸Ihukkaarem xarakkichchii xarakkichchi asse'amaanii kaa'anto'o. Eehanniinsi lasage ixxuwwina od iimanenne beyyi siidamukkoyyo.

⁹ Oo lob xarakkichchi aad darabamukko. Ixxim uulli minaadab hundam huushisu Daabuloosa te'im Sheexaancho yamamoo gaassi hamashshichcho. Ixxi asse'amaanim ixxenne maqirem aad uullanne darabanto'o.

¹⁰ Ee lasage anim iimaniinsi mat geejji sagar «Oono'o! Ballaa hiimoo niyyabbaayyuwwa ni Waa'i illagenne kasasam hee'u kasasaanchi iimaniinsi darabamu bikkina kaba gatisimmi, malaayyii adillanii ni Waa'an ihaakko. Odim adilla'n malaayyim Kiristoosan ihaakko.

¹¹Ixxuwwi Yesuusa ‹Langoommoyyo› yita'a ixxuwwi foore qishixxitoo'n lehina higissa'a uwwito'i bikkina Gereechchi xiiginnee Waa'i sagara kurimminnee ixxo kaa'llo'o.

¹²Ee bikkina iimanii iimanenne yoontakke'i keenii liirammehe. Ihukkaarem ixxena yoo amman hoffan ihukkisa la'aa Sheexaanchi lobakat nadajjinne ki'nnuwwi beyyo waaru bikkina uullinaa dambalaqinaa aayye!» yukkuuyyi macceesummo.

¹³Oo xarakkichchim aad uullanne darabamukkisa la'u ammanenne ee goonchi beeto qatto'i meentichcho hollukkuuyyi laseesukko.

¹⁴ Ihukkaarem oo meentichcho ee hamashshichchiinsi gibba'a sas hiinchoo kolloo udma'anne ise abooyyakkam beyyo baratta'a mattamisina geejji gaaqichchi lad uwwamukko.

¹⁵Hamashshichchim ee meentichcho diris agaa maroo'isina ixxi suumiinsi daajji ihooqax wo'o is lasonne gafarukko.

¹⁶Ihukkaarem uulli ee meentichchona hara'mmaa oo xarakkichchi ixxi suumiinsi gafaru wo'o suume fooqaa'aa xuuxaa urukko.

¹⁷Ee lasage oo xarakkichchi ee meentichchonne lobakata nadadaa gatu is shumo'inne orameena marukko. Oo is shumo'im Waa'i ijaajo egettam keenoo Yesuus bikkina naqqassam keenoo.

¹⁸Oo xarakkichchim dambalaq tochchonne yoo shashsharanne uullukko.