Read Hadiyya Yohaannis Kaalta 13 Bible Online

Yohaannis Kaalta 13 - Hadiyya bible

Yohaannis Kaalta 13

¹ Ee lasage mat moochchichchi dambalaqiinsi firukkuuyyi moo'ummo. Ee moochchichchinam tommi buudii lamar horoorii hee'ukko. Ee buudduwwannem tommi adilla'n mare'i hee'ukko. Horoolluwwannem Waa'inne game'llamoo summi hee'ukko.

² Oo an moo'ummi moochchichchim kabeechcho laboohan hee'ukko. Ixxi lokkim tibbekkichchi lokko laboohan hee'ukko. Suumim hobbichchi suume laboohan hee'ukko. Woddaa'i xarakkichchim ee moochchichchina ixxi malaayye, adilla'n barcumaa lobakat gassimmi malaayyee uwwukko.

³Ee moochchichchi horoolluwwiinsi mat horoor halaalisamaa lehaakkoo moo'ummo. Ihukkaarem oo halaalisamaa lehaa hee'u horoor fayye'ukko. Uulli minaadab hundichchim maalalaa ee moochchichcho awwonukko.

⁴Xarakkichchi ee moochchichchina lobakat malaayye uwwu bikkina manni ee xarakkichchina otossukko. Odim «Moochchichchinne gudookkok ayyette? Ixxenne orameena xanookkodu ayyette?» yukkuuyyi moochchichchinam otossukko.

⁵ Ee moochchichchina lobakat amaaxxi woca woconaa Waa'inne game'llamonaa suum uwwamukko. Ixxenam soree lam aganaa baxoo'isina malaayyi uwwamukko.

⁶Oo moochchichchim Waa'inne, Waa'i summinne, Waa'i hee'oo beyyinnee iimanenne hee'llam keeninnee gereero'imminne Waa'a game'llimma asheerukko.

⁷ Ixxim Waa'i minaadabinne oramaa ixxuwwa kaa'oo'isina malaayyi uwwamukko. Odim ixxena minaadabanne, manni wocoo suumenne, manni shumo'i hundichchonnee uulli hundannee malaayyi uwwamukko.

⁸ Heer uulli qooccamoo'n illageen duramu Gereechchaannonne heechchi kitaabanne ixxi summi kitaabamubee'ek uullanne hee'ookkok hundim ee moochchichchina otossookko.

⁹Qoossaa macceesoo macci yookkok macceesona.

¹⁰ Qeefadookkok ayyim qeefadamookko. Bisa'inne shookkok ayyim bisa'innem lehookko. [4] Waa'i minaadaphphek xa'nnimmii amma'nnatii la'amookkok ee ammane.

¹¹Ee lasage odim mulli moochchim uulliinsi firukkuuyyi moo'ummo. Ixxenam geex gereebbi buudo laboo lam buudduwwi hee'ukko. Ixxim woddaa'i xarakkichchisam wocam hee'ukko.

¹²Luxxi moochchichchi malaayyi hundinnem ee luxxi moochchichchi bikkenne ihaa baxam hee'ukko. Uullanne hee'oo minaadab hundichchim halaalisamaa lehaa fayye'u luxxi moochchichchina otossoo'isa issukko.

¹³Oo la'm moochchichchi manni illagenne giira iimaniinsi uullanne dilliiseebe'i afeebe'e maalalsiisoo agannuwwa issukko.

¹⁴Ixxim luxxi moochchichchi illagenne issoo'isina uwwamu agannuwwinne uullanne hee'u minaadab hundichchom huushisukko. Uullanne hee'oo minaadab hundim bisa'inne halaalisamaa lehaa fayye'u moochchichchika misila baxxamisina ijaajukko.

¹⁵Ixxim ee moochchichchik misil wocoo'isinaa ixxena otossoobee'i keeno shisiisoo'isinaa luxxi moochchichchi misilina foore uwwoo'isina malaayyi uwwamukko.

¹⁶Odim hoffok, lobok, goddaanchi, buxichchi, wolabichchii agishshii manni hundichchim ixxuwwi makki anganne te'im ixxuwwi miinenne mare'e issitamisina issukko.

¹⁷Ee bikkina ayyim oo mare'i oohim ee moochchichchi summi te'im ee moochchichchi summi xig bee'ek biteeseena te'im bito aa'eena xanooyyo.

¹⁸Ka beyyonne qooroom hasisookko. Tiir yookkok ee moochchichchi xigo shallagona. Oo xigim manchina uwwamaakko xigo. Xigoomim 666.