Read Hadiyya Yohaannis Kaalta 14 Bible Online

Yohaannis Kaalta 14 - Hadiyya bible

Yohaannis Kaalta 14

¹ Ee lasage Xiyoo'n duunanne Gereechchi uullaakkoo moo'ummo. Ixxenne maqirem ee Gereechchi summii ixxi anni summii ixxuwwi miinenne kitaabamaakkoo 144,000 manni hee'llo'o.

²Anim lobakat wo'i sagaraa malaayyaam banqi sagaraa laboo sagara iimaniinsi macceesummo. Oo macceesummi sagarim diitta lellitam keen macceesissam diitta'i sagara laboohan hee'ukko.

³Oo 144,000 mannii adilla'n barcu'm illagenne, soorem qooccanchuwwi illagennee lommanni illagennee haareechchi mazmuura zammatto'o. Uulliinsi tisso miqakka'a bito aa'akko'i ee 144,000 manniinsii bagaan ee mazmuura ayyim loseena xanukkoyyo.

⁴Ixxuwwim woraadduwwi ikko'i bikkina meentinne edanta'a ixxuwwi gaga haashaassitoo'n yo'i keen hee'llo'o.[5] Ixxuwwim Gereechchi maroo beyyi hundam awwonta'a mattam keeno. Oo keen Waa'inaa Gereechchinaa won keen ikkamisina manni shumo'iinsi tisso miqakka'a bitaa'akko'oo keeno.

⁵ Ixxuwwanne miiqakkam luwwi bee'i keen ikko'i bikkina ixxuwwi suumenne qophphan siidamukkoyyo.

⁶Ee lasage mulli asse'amaanchim uullanne hee'oo keenina, minaadabina, manni shumo'ina, manni wocoo suuminaa uulli hundinaa heer heerina hee'oo mishiraachchi sagara kureena amadaa iima'nnaannonne lambe'enne bararukkuuyyi moo'ummo.

⁷Ixxim sagara iimaa'aa «Waa'i oogatoo amman afu bikkina Waa'a baddehe; ixxom lonsehe! Iimane, uulla, dambalaqaa wo'i bu'uwwaa qooccu Waa'ina otossi'llehe» yukko.

⁸ Ee lasage la'm asse'amaanchim «Waa'i quunqa eeboo is saa'immika jor woyi'n diqaasa minaadab hundinam agisso'i lob Baabiloone ubbo'oo! Ubbo'oo!» yukkuuyyi luxxi asse'amaancho awwonukko.

⁹Odim saxxi asse'amaanchim lobakat sagara iimaa'aa «Moochchichchinaa moochchichchi misilinaa otossukkokii ee moochchichchi summi mare'em ixxi miinenne te'im ixxi makki anganne issookkokii ayyim hee'ulas

¹⁰ qo'anamoo'n Waa'i quunqi humbullonne issamaakkoo woyi'n diqaasa agookko. Odim keesammi asse'amaa'n illagennee Gereechchi illagennee giirinnee diina yakkam luwwinnee [6] barche'e afookko.

¹¹ Ixxuwwa barche'e issoo gii'l wiriirim heer heerinam cawwaa iim firookko. Moochchichchinaa moochchichchi misilinaa otossitam keenina te'im ixxi summi mare'e issito'i keenina hundinam ballaa hiimoo hore'em usheexxat hee'ooyyo» yukkuuyyi ixxuwwa awwonukko.

¹²Waa'i ijaajo egetta'a Yesuusanne qoxxita'a amma'nnito'i Waa'i minaadaphphek xa'nnimmi la'amookkok kannonnette.

¹³Ee lasage odim iimaniinsi mat sagar «Kaka kitaabe; ka lasage Waa'ina awwaaddu'uuyyi letam keen maassaammuwwa» yukkuuyyi macceesummo. Keesammi Ayyaanim «Eeyya, hanqinam ixxuwwi maassaammuwwa. Ixxuwwim badallatiinsi usheexxitamisina ixxuwwi baxim ixxuwwa awwonookko» yukko.

¹⁴ Oono'o! Ee lasage qadaalli umbu'lla moo'ummo. Ee umbu'llannem Manchi Beeto labookkok horoorenne worqiinsi baxamaakkoo kaachchi mare'e issaqqaa odim ixxi angannem qare'aalli jajjara amadaa afuuraa hee'ukko.

¹⁵ Odim mulli asse'amaanchim Keesammi Miniinsi firaa umbu'llanne afuuraa hee'ukkaannina lobakat geejji sagarinne «Hurbaata murakkam amman afu bikkina ki jajjara asse'llaa mure. Mashka'oomim uulli hurbaat gogaakko» yaa kurukko.

¹⁶Ee bikkina oo umbu'llanne afuuraa hee'ukkok ixxi jajjara uulla asse'aa uulli hurbaata murukko.

¹⁷Mulli asse'amaanchim iimanenne yoo Keesammi Miniinsi firukko. Ixxenam qare'aalli jajjar hee'ukko.

¹⁸Ee lasage odim giiranne malaayyi yoo mulli asse'amaanchim aduruusa wiriissimmina worqiinsi baxamu mu'utiinsi[7] firukko. Ixxim qare'aalli jajjara amadu asse'amaanchina lobakata geejji sagarinne «Uullanne yoo woyi'n haqqichchi shogguwwik mish loqu bikkina woyi'n shogguwwa hundam mure» yaa shuurukko.

¹⁹Ee bikkina oo asse'amaanchim ixxi jajjara uulla asse'aa uullanne yoo woyi'n haqqichchika shogguwwa murukko. Ee murukkokam Waa'i quunqaannonne woyi'n diqaasa ciinsakkam haraar beyyonne darabukko.

²⁰ Oo woyinim beero'iinsi biireen woyina ciinsakkam beyyonne ciinsamukko. Ee ciinsamu woyiniinsim xillaalloom faraxxi hakkamma afooqax xiig firaa 296 kiilomeetira ihooqax beyyo daadukko.[8]