Read Hadiyya Yohaannis Kaalta 15 Bible Online

Yohaannis Kaalta 15 - Hadiyya bible

Yohaannis Kaalta 15

¹Ee lasage maalalsiisoo mulli malaayyaam mare'e iimanenne moo'ummo. Oo moo'ummokim Waa'i quunqi beeddoo lasaanchi lamar boobannuwwa ubbuussam lamar asse'amaan hee'llo'o.

²Ee lasage odim gagmoo'ixxi'nnoo'i dambalaqa laboo luwwa giirinne hamaaramaakkookkoka moo'ummo. Odim woddaa'i moochchichchina, moochchichchi misilinaa ee moochchichchi summi xiginaa otossimma sabba'a kaa'llo'i keeno moo'ummo. Ixxuwwim Waa'iinsi uwwamu diitta amadda'a ee gagmoo'ixxi dambalaq gadanonne uullita'a hee'llo'o.

³ Odim ixxuwwi «Hundam xantoo Moollanni Waa'a! Ki bax malaayyaamoo maalalsiisoohanee! Minaadaphphi adila, ki goog xabbeenaa hanqo'anee!

⁴ Moollanna! Keesammi xale'i atette ikkitti bikkina keese baddoobee'ekii ki summa lonsoobee'ekii ayyette? Hanqo'i ki bax moo'amu bikkina minaadab hundim waatta'a kiina otossitamo» yitu'uuyyi Waa'ina awwaadaanchi Muse'ekaa Gereechchi mazmuuraa zammatto'o.

⁵ Ee lasage iimanenne Waa'i mi'nnek keesammi beyyi fooqaakkoo moo'ummo.

⁶Ee Keesammi Miniinsim woddaa'i lamarem boobannuwwa amadda'a hee'llo'i lamarem asse'amaanim fitto'o. Ixxuwwim talbiinsi baxamaakkoo muccur qadaalli eddechcha edde'lla'atii ixxuwwi biqem worqiinsi baxamaakkoo sabbatinne lade'lla'atii hee'llo'o.

⁷Soorem qooccanchuwwiinsim mat heer heerina hee'oo Waa'ik quunqi wo'mmaakkookkoka worqiinsi baxamaakkoo lamar injaffuwwa lamarem asse'amaaninam uwwukko.

⁸ Ee Keesammi Minennem Waa'i lombiinsii Waa'i malaayyiinsii ki'ukkok wiriir wo'mmukko. Oo lamarem asse'amaanim amaddo'i lamarem boobannuwwim beeddeebe'i afeebe'e ee Keesammi Mine ayyim ageena xanukkoyyo.