Read Hadiyya Yohaannis Kaalta 16 Bible Online

Yohaannis Kaalta 16 - Hadiyya bible

Yohaannis Kaalta 16

¹Ee lasage Keesammi Miniinsi geejji sagar lamarem asse'amaaninam «Mattakka'a injaffuwwanne yoo Waa'i quunqa uullanne dunnehe» yaa kurukkuuyyi macceesummo.

² Ee bikkina luxxi asse'amaanchi maraa ixxi injaffika uullanne dunukkaare moochchichchi mare'i yoo keenonnee ee moochchichchi misilina otossitam mannannee jorisa bararaa'oo omar firukko.

³La'm asse'amaanchim ixxi injaffika dambalaqanne dunukkaare dambalaq lehu manchi xiiqqisa ihukko. Dambalaq woronne hee'oo fooraam luwwi hundichchim lehukko.

⁴ Saxxi asse'amaanchim ixxi injaffika daajjuwwannee wo'i bu'uwwannee dunukkaare oo daajjuwwii wo'i bu'uwwii xiiganne daba'llukko.

⁵Wo'onne malaayyi yoo asse'amaanchim «Yoontaannoo hee'llittaannoo, keesamma! ka oogato'o oogatti bikkina at hanqo'ane!

⁶Mashka'oomim ki minaadaphphekaa hiraagaa'nnekaa xiiga dunto'i keenina atim xiiga agissaatto. Oohim ixxuwwina laboohane» yaa wocukkuuyyi macceesummo.

⁷Odim aduruusa wiriissimmina worqiinsi baxamu mu'utiinsi «Eeyya, Hundam xantoo Moollanni Waa'a! At oogatti oogato'i hanqo'anee xabbeenaa» yoo sagara macceesummo.

⁸Ee lasage odim soo'l asse'amaanchi ixxi injaffika eelliinchonne dunukkaare manna gii'llisa shokkiisoo malaayyi eelliinchina uwwamukko.

⁹Mannim malaayyaam iibbinne shokkaa ee boobannuwwanne malaayyi yoo Waa'i summa duumukko. Ixxuwwim baaxiilo biiraa yita'a daba'llita'a Waa'ina lomba uwwito'oyyo.

¹⁰ Ee lasage odim onti asse'amaanchi ixxi injaffika moochchichchi adilla'n barcumanne dunukkaare oo moochchichchi gassoo beyyi tuunsukko. Mannim barche'e affo'i bikkina ixxuwwi allabo inqinne ga'mmaqqito'o.

¹¹Odim barche'e affo'i bikkinaa ixxuwwanne firu oma'l bikkinaa iima'n Waa'a qangito'o bagaan baaxiilo biiraa yita'a daba'llito'oyyo.

¹² Ee lasage odim loh asse'amaanchi ixxi injaffika Efiraaxiisa daajjenne dunukkaare eelliinchi firoo kolliinsi waattam adilluwwina goog fooqoo'isina daajji wo'i xoo'ukko.

¹³Woddaa'i xarakkichchi suumiinsi, moochchichchi suumiinsii «Hiraagaanchi anette» yoo qophphanaanchi suumiinsii luga labbam sas ayyaannuwwi fittu'uuyyi moo'ummo.

¹⁴Oo sasem jor ayyaannuwwim aganna issitam habus ayyaannuwwa. Ixxuwwim hundam xanoo Waa'i lob o'l ayyaamina uullanne hee'llam adilluwwi hundam wixxaa'lleena mattamo.

¹⁵ Oono'o! An gamaanchisa waaroommo; umba'ada maraa ixxeka tuulli orachcho manni moo'oobee'isa baqaa ixxi eddechcha ege'llookkok maassaamo.

¹⁶ Oo jor ayyaannuwwi Ibro'isinne Armaageedoona yakkam beyyonne adilluwwa wixxaa'llo'o.

¹⁷Ee lasage odim lama'l asse'amaanchi ixxi injaffika hafachchanne dunukkaare Keesammi Minenne yoo adilla'n barcumiinsi «Beeddaakko» yoo geejji sagar firukko.

¹⁸ Ee beyyonnem banqi belellaat, sagar, banqi gugii malaayyaam uulli huxechchii ihukko. Uullanne manni qooccamukkaanniinsi ki'isaa eehido'i uulli huxechchi hore'em ihubee'i bikkina ookki hundiinsim lophphaakkoohane.

¹⁹ Oo lob beero'im sas beyyi ihaa diqamukko. Minaadaphphi beero'uwwim ubukko. Waa'im Baabiloona yakkam lob beero'o tiiraa ixxi malaayyaam quunqi yoo humbulli diqaasa aggamisa issukko. [9]

²⁰ Wo'i kibbamu uulli hundim beyyiinsi bi'ukko. Ee'isam odim duunnuwwi hundim beyyiinsi bee'ukko.

²¹ Odim matichchim ontayyi kiilo'o kee'mmoo baraxxi kin iimaniinsi mannanne ga'nnukko. Oo baraxxi booban lobakata kee'mmaalli ihu bikkina manni Waa'a qangukko.