Read Hadiyya Yohaannis Kaalta 17 Bible Online

Yohaannis Kaalta 17 - Hadiyya bible

Yohaannis Kaalta 17

¹ Ee lasage lamarem injaffuwwa amadda'a hee'llo'i asse'amaaniinsi mat i beyyo waaraa «Waare! Lobakat wo'uwwanne afuutta'a yo'i la'anto'oo saa'aanchi meentichchonne afoo oogato'o moo'isoommo.

² Uulli adilluwwi saa'ukkok isennette. Odim uullanne hee'llam keen dimbito'ok is saa'immi woyi'n diqaasinnette» yaa iina kurukko.

³ Ixxim eese Ayyaaninne udma'a massukko. Anim orachchi hundoomannem Waa'inne game'llamoo summi wo'mmaakkoo mat kashar moochchichchonne saa'llito'oo meentichcho moo'ummo. Ee moochchichchinam lamar horoorii tommi buudduwwii hee'ukko.

⁴ Oo meentichchom biishshi heemachchi eddechchaa kashar eddechchaa edde'lla'a hee'llo'o. Odim worqinne, bito xee'aalli kininnee inqu'u yakkam bito xee'aalli luwwinnee wereeggita'a hee'llo'o. Odim shigigaa'oo luwwii is saa'immik haashaassoo luwwii wo'mmaakkookkoka worqiinsi baxamaakkoo humbullo is anginne amadda'a hee'llo'o.

⁵Is miinennem «Saa'aaninaa uullanne yoo haashaassoo luwwi hundinaa ama lob Baabiloone» yoo mat misxir woshshi yoo summi kitaabamaa hee'ukko.

⁶Oo meentichchom Waa'i minaadaphphi xiiginnee Yesuus bikkina wocco'aare shakko'i kee'n xiiginnee dimbito'oo moo'ummo. Anim ise moo'ummi ammanenne lobakata maalalummo.

⁷Ihukkaarem woddaa'i asse'amaanchi iina «Mahina maalaltoolla? Ee meentichchokaa ise saa'llito'i lamar horoorii tommi buudduwwii yoo moochchichchokaa maaxammi woshsha an kiina kuroommo.

⁸ At moo'llitti moochchichchi eraare hee'ukko. Kaba bee'e. Lasage tungibee'i baalliinsi firaa bichchina marookko. Uulli qooccamukkaanniinsi ki'isaa heechchi kitaabanne ixxuwwi summi kitaabamubee'i keen uullanne hee'llam minaadab hundim oo moochchichchi illageen hee'aa kaba bee'aa lasage waaroo'isa moo'lla'a maalaltamo.

⁹Qoossoo tiir hasisookkok ka beyyonnette. Oo lamarem horoolluwwim meentichcho afuutto'i lamar duunnuwwa.

¹⁰Ee'isam odim oo horoolluwwi lamar adilluwwa. Ixxuwwiinsi ontoom ubaakko. Matoom kabadem yookko. Odim mat waaroo'nnim yookko. Ixxim waaraa hoffi ammanina gassoo'isa Waa'i issookko.

¹¹Oo hee'u moochchichchi kabadooma bee'ek sadeentane. Ihukkaarem ixxim ee lamariinsi mato. Ixxim bichchina marookko.

¹² Oo at moo'llitti tommem buudduwwim adilla'n malaayye aa'lloo'n yo'i tommi adilluwwa. Ihukkaarem moochchichchinne maqirem hoffi ammanina adilluwwi ikkamisina adilla'n malaayye siiddamo.

¹³Ee tommem adilluwwikim tiir mato. Ixxuwwim ixxuwwi gassimmi malaayyee daannoomaa ee moochchichchina uwwitamo.

¹⁴Ixxuwwim Gereechcho qassamo. Ihukkaarem Gereechchi moollanno'ina Moollannaa adilluwwina Adilaa ihu bikkina ixxuwwa kaa'ookko. Gereechchinne maqire yo'i keenim weeshanto'i keeno, doo'llanto'i keenoo amma'nnanto'i keenoo» yukko.

¹⁵Odim iina oo asse'amaanchi «Oo saa'aanchi meentichcho afuutta'a moo'llitti wo'uwwi minaadaba, manna, manni shumo'oo manni wocoo suummuwwaa.

¹⁶Oo moochchichchii at moo'llitti tommem buudduwwii ee saa'aanchi meentichcho sabbamo. Ixxuwwim ise bogga'a umba'adatte issitamo. Iseka maaram ittamo, giirannem shokkiissamo.

¹⁷Waa'i yu luwwi wo'mmeebe'i afeebe'e ixxuwwi tiiro mat issimminnee ixxuwwi adilla'n malaayye moochchichchina uwwimminnee ixxi tii'lleka issitamisina eekka ixxuwwi wodanonne issukkok Waa'a.

¹⁸Oo at moo'llitti meentichcho uulli adilluwwa gassitam lob beero'otte» yukko.