Read Hadiyya Yohaannis Kaalta 18 Bible Online

Yohaannis Kaalta 18 - Hadiyya bible

Yohaannis Kaalta 18

¹Ee lasage lobakat malaayyi yoo mulli asse'amaanchim iimaniinsi dillukkuuyyi moo'ummo. Ixxi nuuriinsi ki'ukkok uulli caakkukko.

² Ixxim lobakat malaayyaam sagarinne «Lob Baabiloone ubbo'oo! Ubbo'oo! Isem habus hee'oo beyyo, jor ayyaan hundim cicciissoo beyyoo moo'akkeena shigigaa'oo jor cii'i hundim garoo beyyoo ikko'o.

³ Mashka'oomim minaadab hundim is jor saa'immi woyi'n diqaasinne ubaakko. Uulli adilluwwim isenne maqirem saa'aakko. Odim ka uulli daddaraanim is mixxam er luwwa isena biteesimminne ki'ukkok goddaan ihaakko» yaa shuurukko.

⁴ Ee lasage odim mulli sagarim iimaniinsi «Is baaxiil tuubamaa iimane afu bikkinaa Waa'im is boqqooma sawwu bikkinaa is baaxiilonne hamaarantakka'a isenne afoo boobana baxxamaan ikkakkambee'isina i minaadaba, iseensi annanni ikkehe.

⁶ Ise issito'isam issitakka'a baado daballehe. Ise baxxo'i baxika lam suume eddakka'a baado daballehe. Ise diddiffo'i humbullonne lam suume qoxxaalli issitakka'a diddiffehe.

⁷ Ise is gaga lonsaqqito'i qaxaa heellisso'i qaxaa ise barche'e issehee kichche'issehee. Odim is wodanonne ‹An Adilatte, busaratteyyo. Kichchechchi eesenne hore'em afooyyo› yitam bikkina

⁸lehik, kichchechchikii qaanne'ikii booban dangonnem mexxo'i ballannem isenne ubookko. Isenne oogatoo Waa'i malaayyaam ihu bikkina ise giiranne shokkiisookko» yukkuuyyi macceesummo.

⁹ Isenne maqire saa'imminnee wereeggimminnee hee'llam uulli adilluwwi hundim ise shokkitu'uuyyi firoo wiriira moo'lla'a «Aayye! Aayye!» yitu'uuyyi wi'llitamo.

¹⁰Ixxuwwim isenne afu barche'e moo'lla'a baddito'i bikkina qee'llonne uullita'a «Baabiloone! Aayye! Aayye! Ate ka lob beero'o, malaayyaam beero'o! Oono'o! Keesenne oogato'i matem sa'aatannem afukko» yitamo.

¹¹ Uullanne hee'llam daddaraan iyyiissa'a eebbo'i dadda'l mu'uta bito aa'ookkok od bee'i bikkina is bikkina kichche'llamoo wi'llitamoo.

¹² Daddarina eebbam luwwim worqa, bira, bito xee'aalli kina, inqu yakkam bito xee'aalli luwwa, talbiinsi dadamoo danaam eddechcha, biishshi heemachchi eddechcha, haarra yakkam fatirinne dadamaakkoo eddechcha, kashar eddechcha, enje'oo haqqi hunda, daane'i inqiinsi baxamoo mu'ut hundichcho, bito xee'aalli haqqiinsi, naasiinsi, xaariinsii bito xee'aalli kiniinsii baxamu mu'ut hundichcho,

¹³enja, qarafa yakkam enja, enje'oo aduruusa, karbe'e yakkam bito xee'aalli enja, aduruusi'nnoo'i aqoomaada, woyi'n diqaasa, zayta, danaam qama, arasa, laro, gereebba, farado, gaare'ee manni fooree oohim agido.

¹⁴Aayye! At mixxitti mish kiinniinsi qee'llaakko. Ki amaxxii ki nuurii hundim bi'aakko. Oo keen ka lasage keesenne hore'em siidamooyyo.[10]

¹⁵ Ee mu'ut hundam isena biteessu'uuyyi goddito'i daddaraan hundim isenne afu barche'e moo'lla'a baddito'i bikkina qee'llonne uullitamo. Ixxuwwim geejji sagarinne

¹⁶«Talbiinsi dadamoo eddechcha, biishshi heemachchi eddechchaa kashar eddechchaa edde'llam hee'llittaante! Worqinne, bito xee'aalli kininnee inqu yakkam bito xee'aalli luwwinnee Wereeggitaa hee'llitti lob beero'o Aayye! Aayye!

¹⁷ Oo amaxxi hundim matem sa'aatichchonnem bi'aa xa'aakko» yitu'uuyyi kichche'llamoo wi'llitamoo. Markaphphi ushe'aan, markabinne mattam keen, markaphphi woronne baxxam keenii markabinne daddattam keenii hundim qee'llonne uullita'a

¹⁸ ise shokkitu'uuyyi firoo wiriira moo'lla'a «Ka lob beero'o laboo mulli beero'i hee'ukkonnihe?» yitu'uuyyi laattamo.

¹⁹Odim ixxuwwi horoorennem dira issaqqita'a «Dambalaqanne markabbuwwi yoo keen hundam is goddinne goddaan issito'i oo lob beero'o matem sa'aatichchonnem bi'llo'i bikkina aayyee! Aayyee!» yita'a laattu'uuyyi kichche'lla'a wi'llito'o.

²⁰ Oono'o! Iiman, Waa'i minaadab, Waa'i sagara kurimmina asse'antakko'i keenii hiraagaanii ki'nnuwwi bikkina Waa'i isenne oogatu bikkina liirammehe.

²¹ Ee lasage odim mat malaayyaam asse'amaanchi geejji liitimqax kina ki'isaa dambalaqanne darabaa «Lob Baabiloo'n beero'o malaayyaamisa darabanta'a ka'isa ubbamo. Ka lasage od hore'em siidantamoyyo.

²² Diitta lellitam kee'nnek, azmaare'ik, gambaabiyyinne lellitam kee'nnekii xurumbulla fuggam kee'nnekii sagar od keesenne macceesamooyyo. Mah baxom baxxam angi qoor manni ka lasage keesenne od siidantamoyyo. Liitimmi sagarim keesenne od macceesamooyyo.

²³Sha'i caakkim ka lasage keesenne od caakkooyyo. Idaayyichchikii idaayyichchokii sagar keesenne od macceesamooyyo. [11] Ki daddaraan ka uulli adilluwwi hee'llo'o. At gennitti genninne minaadab hundim huushamaakko.

²⁴ Hiraagaa'nnek, Waa'i minaadaphphekii uullanne duranto'i kee'nnekii hundikim xiig ki woronne siidamaakko» yukko.