Read Hadiyya Yohaannis Kaalta 19 Bible Online

Yohaannis Kaalta 19 - Hadiyya bible

Yohaannis Kaalta 19

¹Ee lasage lobakat manni sagara laboo geejji sagar iimanenne «Handa Waa'ina! gatisimmi, lombii malaayyii ni Waa'ane!

² Ixxek oogato'i hanqo'anee xabbeenaa ihu bikkina is saa'imminne uulla bi'isso'i lob saa'aanchonne oogataakko. Ixxena awwaaddam kee'n xiigam iseensi miqisaakko» yukkuuyyi macceesummo.

³ Odim «Handa Waa'ina! Ise shokkitu'uuyyi wiriir heer heerinam cawwaa firookko!» yukkuuyyi shuurukko.

⁴Odim lamiyyii soorem lommannii soorem qooccanchuwwii «Ihona; handa Waa'ina!» yitu'uuyyi adilla'n barcumanne afuuru Waa'i illagenne ubba'a otossito'o.

⁵ Ee lasage odim adilla'n barcumiinsi «Waa'a badditakkam ixxi awwaadaan hundim hoffokii lobokii ni Waa'a galaxxehe» yoo sagar firukko.

⁶ Odim lobakat manni sagara, lobakat wo'i sagaraa malaayyaam banqi sagaraa laboo sagar «Handa Waa'ina! Hundam xanoo ni Waa'i adil ihaakko.

⁷Gereechchi bollochcho'i afu bikkinaa ixxi idaayyichchom is gaga gudixxito'i bikkinaa liirammona, ixxo lonsinonaa ixxenam galata uwwinonaa.

⁸Isem edde'llamisina talbiinsi dadamaakkoo danaam muccur belecce'oo eddechchi uwwamukko» yukkuuyyi macceesummo. Oo talbiinsi dadamu muccur belecce'oo eddechchi Waa'i minaadaphphi muccurooma.[12]

⁹ Ee lasage woddaa'i asse'amaanchi iina « ‹Gereechchi bollochcho'i hii'm hurbaatina weeshanto'i keen maassaammuwwa› yitaa kitaabe» yukko. Odim «Kuk hanqo'i Waa'i sagara» yukko.

¹⁰Ee lasage an ixxena otosseena ixxi lokkonne ubummo. Ihukkaarem ixxi iina «An kiinninnee Yesuus bikkina naqqassam kiyyabbaayyuwwinnee maqirem awwaadaanchi ihummi bikkina iina otossititte! Waa'ina otossihe» yukko. Yesuus naqqasu hanqo'i woshshi hiraagaan naqqasso'i woshsha.

¹¹ Ee lasage iiman fooqaakkoo moo'ummo. Oono'o! Qadaalli farashsho moo'ummo. Ee farashshonnem saa'llukkok «Amma'nnamaakkoohanee hanqo'anee» yamamoohane. Ixxi hanqo'isa oogatoohanee qasamoohanee.

¹² Ixxek illim gii'l labana laboohane. Ixxi horoorennem dut adilla'n mare'uwwi yoohane. Odim ixxi gagiinsi bagaan ayyim la'oobee'i summi ixxi hanenne kitaabamaa hee'ukko.

¹³Ixxim xiiganne cefamaakkoo eddechcha edde'aa hee'ukko. Ixxi weeshamoo summim «Waa'i sagara» yamamaatette.

¹⁴Talbiinsi dadamaakkoo qadaalli danaam muccur eddechcha edde'llo'oo iima'n bagadaa'n gogotim qadaalli faradonne saa'llita'a ixxo awwonto'o.

¹⁵ Ixxi suumiinsim minaadaba aphphisoo'isina qare'aalli bisa'i firukko. Ixxim minaadaba xaa'l biccinne ijaajaa gassookko. Odim hundam xanoo Waa'ik malaayyaam quunqi woyi'n diqaasa ciinsakkam beyyonne woyina ciinsookko.

¹⁶Ixxi eddechchannee ixxi gubeedonnee «Adilluwwina Adila! moollanno'inam Moollanna!» yoo summi kitaabamaakko.

¹⁷ Ee lasage odim eelliinchonne uullaakkoo mat asse'amaancho moo'ummo. Ixxim iima'n lambe'enne bararoo ammarina sagara iimaa'aa «Waa'i gudisaakkoo lob maadda

¹⁸oohim adilluwwika, gaadaano awwonsitam kee'nneka, qoxxaalluwwika, faraxxekaa faradaa'nnekaa manni hundikam oohim wolaphphekaa agixxekaa odim hoffi kee'nnekaa lob kee'nnekaa maara ittakkeena waattakka'a wixxi'llehe» yaa shuurukko.

¹⁹Ee farashshaanchoo ixxi gogotaa qasseena woddaa'i moochchichchii uulli adilluwwii ixxuwwi gogotinnem wixxito'oo moo'ummo.

²⁰ Oo moochchichchi qeefadamukko. Ee moochchichchi illagenne aganna issoo «An hiraagaancho» yoo qophphanaanchim ixxenne maqirem qeefadamukko. Ixxim ee moochchichchi mare'e aa'llo'i keenoo ee moochchichchi misilina otossitam hee'llo'i keenoo agannuwwa issukkuuyyi huushisukkane. Oo lamim foorinnem diina yakkam luwwi aphphoo gii'l dambalaqanne darabanto'o.

²¹Gatto'i keenim ee qadaalli farashshonne saa'llukkaanni suumiinsi firoo bisa'inne leto'o. Ixxuwwi maara ammar hundim goddaa itukko.