Read Hadiyya Yohaannis Kaalta 2 Bible Online

Yohaannis Kaalta 2 - Hadiyya bible

Yohaannis Kaalta 2

¹Yesuus Yohaannisina «Efeesoonanne wixxitam amma'nnaa'n beyyo asse'amu Waa'i asse'amaanchina kid yitaa kitaabe, Makki anganne lamar boollaanka amadaa caakka dissimmina worqiinsi baxamu lamar mu'uttuwwi lambe'enne daba'llamoommok anette.

²An ki baxo ookkim ki badallatoo ki xa'nnimmaa la'oommo. Odim asse'antoo'nnim Neese mishiraachchi sagara kulloommisina Yesuusiinsi asse'ammaammoo keeno yitam qophphanaan jor manna saarayyitaa moo'llaa ki woronne amaddaa afuuttibee'isa la'oommo.

³Odim kiikka xa'nnimma, i summi bikkina qoxxittisaa kaa'antibee'isaa la'oommo.

⁴Ihukkaarem an keese gadoommi luwwi yookko. Oohim at eraa'l iitto uttaatto.

⁵At hanniinsi ubbida'e sawwihe. Baaxiilo biiraa yihe; eraare baxxam hee'llitti baxom baxe. Baaxiilomdu biiraa yitbeelas kiikka caakka dissitoo mu'uta beyyiinsi ki'isoommo.

⁶Ihukkaarem an keese galaxxoommi luwwi yookko. Oohim Niqoolaasa yakkam manchi losisu losano awwontam mannika baxo an sabummisam sabbaatto.

⁷ Qoossaa macceesoo macci yookkok Keesammi Ayyaan amma'nnaa'n wixxittuwwina kurookkoka macceesona. Kaa'ukkaannina heechchina Waa'i gudisaakkoo beyyonne yoo heechcha uwwoo haqqichchiinsi misha itona uwwoommo» yukko.

⁸ Odim Yesuus Yohaannisina «Samirneesanne wixxitam amma'nnaa'n beyyo asse'amu Waa'i asse'amaanchina kid yitaa kitaabe, Hundi luchchiinsim illageen hee'ummok, hundi luchchiinsim lasagem hee'oommok, lehaa hee'ummokii lehiinsim ki'ummokii anette.

⁹Ki hawwoo ki buxoomaa an la'oommo. Ihona bagaan at lobakata goddaancho. Ayihuxxi mannik mat mat keen ki summa bi'isseena woccam jor woshsha an la'oommo. Ihukkaarem ixxuwwi Sheexaa'n manna.

¹⁰At abbis ammanenne aa'lleena yoonti hawwo aa'imma baddititte. Macceessehe, Sheexaanchi ki'nnuwwiinsi mat mat keeno keeneena karaxxi minenne aagisookko. Ki'nnuwwim tommi ayyaamo hawwo aa'llakkamo. Letakkeebe'i afeebe'e amma'nnantakko'oo keen ikkehe. Anim ki'nnuwwina kaachchi mare'i ihoo heechcha irifoommo.

¹¹ Qoossaa macceesoo macci yookkok Keesammi Ayyaan amma'nnaa'n wixxittuwwina kurookkoka macceesona. Kaa'ookkok la'm lehonne hawwodamooyyo» yukko.

¹²Odim Yesuus Yohaannisina «Pheergaamoonanne wixxitam amma'nnaa'n beyyo asse'amu Waa'i asse'amaanchina kid yitaa kitaabe. Qare'aalli lam qar bisa'i yookkok anette.

¹³At Sheexaa'nnek adilla'n barcum yoo beyyonne hee'lloo'isa an la'oommo. Ihona bagaan at eesenne qoxxitaattoo amma'nnaancho. Ee Sheexaanchi hee'oo beyyonne ki'nnuwwi lambe'enne hee'u iina amma'nnamaakkoo naqqasaanchi Antiphaasa shakko'i doollennettem ihuta'n at eese laggittoyyo.

¹⁴ Ihukkaarem an keese gadoommi hoffi luwwim yookko. Oohim Isra'ee'l minaadab qophpha'n waa'ina kitimamu kiti'm maara itta'atii saa'lla'atii qolantamisina Baala'aam Baalaaqa sogukkisam

¹⁵odim ki'nnuwwi lambe'ennem Baala'aam sogitano laboo losishsha losisoo Niqoolaasa yakkam manchi losishsha awwontam keen yo'o.

¹⁶Ee bikkina baaxiilo biiraa yitbeelas an ki beyyo waaraa i suumiinsi firoo bisa'inne keese qasoommo.

¹⁷ Qoossaa macceesoo macci yookkok Keesammi Ayyaan amma'nnaa'n wixxittuwwina wocookkoka macceesona. Kaa'ukkaannina maaxamaakkoo maanna'a yakkam hurbaatiinsi uwwoommo. Odim aa'lloo manchiinsi bagaan ayyim la'oobee'i haareechchi summi kitaabamaakkoo qadaalli kinam uwwoommo» yukko.

¹⁸Odim Yesuus Yohaannisina «Tiyaaxiranne wixxitam amma'nnaa'n beyyo asse'amu Waa'i asse'amaanchina kid yitaa kitaabe, Gii'l labana laboo illii shiinshakko'i naas xaa'llisa belecce'oo lokkuwwii yoo Waa'i Beet anette.

¹⁹An ki baxo ookkim ki iitto, ki amma'nnatoo ki xa'nnimmaa la'oommo. Ki bax hundichchim eraa'llaanniinsi lophphukkisa an la'oommo.

²⁰ Ihukkaarem an keese gadoommi luwwi yookko. Oohim ‹An hiraagaanchotte› yitu'uuyyi iina awwaaddam keeno saa'llamisinaa qophpha'n waa'ina kitimamu kiti'm maara ittamisinaa is losishshinne huushansitam meentichcho Eelzaabeele ki woronne amaddaa afuuttaatto.

²¹Saa'imma biiraa yitona an isena ammane uwwaa hee'ummo. Ihukkaarem ise saxxita'a daba'llito'oyyo.

²²Oono'o! An ise dees manchotte issaa ubbuusoommo. Isenne saa'llam keenim ee ixxuwwi baaxiilo biiraa yita'a daba'llitobee'aa'lleensi ixxuwwam jor hawwonne ubbuusoommo.

²³ Ee is losano awwontam keenom shaa guulloommo. Ee lasage amma'nnaa'n wixxittuwwi hundim mannika muroo wodanoo saarayyaa moo'oommok anette ihummisa laqqamo. Ki'nnuwwina annannichchinam ki'nnuwwi baxisam uwwoommo.

²⁴Ihukkaarem mulli keen ‹Sheexaa'n xillaalli woshsha› yitam ee meentichchi jor losano awwontakkoo'n Tiyaaxiranne gattakko'i keenina hundinam mulli iyyo edaa iyyiisoommoyyo.

²⁵Ihukkaarem an waareembe'e ki'nnuwwina yookkoka qoxxissakka'a ege'llehe.

²⁶ Kaa'aa lasaanchi afeebe'e i baxonne qoxxukkaannina minaadaba gassoo malaayye uwwoommo.

²⁷Ixxim an Iyyanniinsi malaayye aa'ummisam iinniinsi malaayye aa'aa xaa'l biccinne buchchi mu'uxxisa iiqansukkuuyyi gassookko.

²⁸Odim soodaraa'l boollaankichchom ixxena uwwoommo.

²⁹Qoossaa macceesoo macci yookkok Keesammi Ayyaan amma'nnaa'n wixxittuwwina kurookkoka macceesona» yukko.