Read Hadiyya Yohaannis Kaalta 20 Bible Online

Yohaannis Kaalta 20 - Hadiyya bible

Yohaannis Kaalta 20

¹Ee lasage tungi bee'i baalle fooqaa'aanchoo malaayyaam geejji chimchimaa amadaakkoo mat asse'amaanchi iimaniinsi dillukkuuyyi moo'ummo.

² Ixxim woddaa'i xarakkichcho oohim gassi hamashshichcho amadaa mat kum hiincho kurukko. Oo xarakkichchim Daabuloosatte te'im Sheexaancho.

³Oo kum hiinchi beeddeebe'i afeebe'e minaadaba od huushisoobee'isina oo asse'amaanchi ee xarakkichcho amadaa tungi bee'i baallenne darabaa koobo'o issaa ifiisukko. Oo kum hiinchi beeddaa lasage hofqax ammaninam ixxi tiramimmi hasisookko.

⁴ Ee lasage adilla'n barcummuwwa moo'ummo. Ee adilla'n barcummuwwannem daannoom uwwamaakkoo keen afuutta'a hee'llo'o. Odim Yesuus bikkina wocco'i bikkinaa Waa'i sagara kutto'i bikkinaa horoore murakko'i mannika foore moo'ummo. Oo manni ee moochchichchinaa moochchichchi misilinaa otossitobee'i keeno. Ee moochchichchi mare'em ixxuwwi miinenne te'im anganne issitobee'i keeno. Ixxuwwi lehiinsi ki'lla'a Kiristoosinne maqirem kum hiinchina adilluwwi ikko'o.

⁵Ee ammane lehiinsi ki'lloo'n gatto'i keen oo kum hiinchi beeddeebe'i afeebe'e lehiinsi ki'llo'oyyo. Oohim lehiinsi kichchina luxxane.

⁶Ee luxxi kichchanne lehiinsi ki'immi gada'a siixxitam keen maassaammuwwa. La'm lehik malaayyi ixxuwwanne bee'e. Ihukkaarem oo keen Waa'inaa Kiristoosinaa qeessuwwi ikka'a Kiristoosinne maqirem kum hiincho gassitamo.

⁷Oo kum hiinchi beeddoo ammane Sheexaanchi karatiinsi tiramookko.

⁸ Ixxim uullanne hee'oo minaadab hundam oohim Googaa Maagoogaa [13] huushiseenaa orina wixxaa'eenaa firookko. Ee minaadaphphekim xig dambalaqanne yoo shashsha'llisa.

⁹Ixxuwwim uulli hundannem binnita'a Waa'i minaadaphphi gattee iittamaakkoo beero'oo kolli hundinnem kibbito'o. Ihukkaarem giir Waa'i beyyiinsi iimaniinsi dillaa ixxuwwa itaa urukko.

¹⁰Ixxuwwa huushisu Sheexaanchim woddaa'i moochchichchii «An hiraagaancho» yoo qophphanaanchii yo'i diina yakkam luwwi aphphoo gii'l dambalaqanne darabamukko. Ixxuwwi ee beyyonne ballaa hiimoo heer heerinam barche'e affamo.

¹¹ Ee lasage qadaalli geejji adilla'n barcumaa ee barcumanne afuuraakkookkokaa moo'ukko. Uullii iimanii ixxi illagiinsi gibukko. Ee lasage od ixxuwwik beyyim bi'ukko.

¹²Leto'i keenim hoffokii lobokii adilla'n barcu'm illagenne uullito'oo moo'ummo. Kitaabbuwwim fooqukko. Mullekim heechchi kitaab fooqukko. Leto'i keenim ee kitaabbuwwanne kitaabamaa yoo ixxuwwi baxisam oogato'o aa'llo'o.

¹³Dambalaqim ixxi woronne yo'i leto'i keeno uwwukko. Lehii Si'oolim ixxuwwi beyyonne yo'i leto'i keeno uwwito'o. Hundichchim baxxo'i baxisam oogato'o aa'llo'o.

¹⁴Lehii Si'oolii gii'l dambalaqanne darabanto'o. Oo gii'l dambalaqim la'm leho.

¹⁵Ixxi summi heechchi kitaabanne kitaabamaa siidamubee'i hundim gii'l dambalaqanne darabamukko.