Read Hadiyya Yohaannis Kaalta 21 Bible Online

Yohaannis Kaalta 21 - Hadiyya bible

Yohaannis Kaalta 21

¹ Eraa'l iimanii eraa'l uullii higaa hee'u bikkina haareechchi iimanee haareechchi uullaa moo'ummo. Dambalaqim ee lasage od siidamukkoyyo.

² Odim haareechchi Yerusaalee'm keesammi beero'i is goonchina wereeggita'a guddo'i idaayyichcho labaa iimaniinsi Waa'i beyyiinsi dillukkuuyyi moo'ummo.

³ Odim adilla'n barcumiinsi geejji sagar «Oono'o! Waa'ik heechchi beyyi manni lambe'ennette. Ixxim ixxuwwinne maqire hee'ookko. Ixxuwwim ixxi minaadab ikkamo. Waa'i ixxi gagim ixxuwwinne maqire ihaa ixxuwwina Waa'i ihookko.

⁴ Waa'im ixxuwwi illiinsi indiiddi hundichchom shiinshookko. Eraa'l luwwi hundim higu bikkina ee lasage od leh hee'ooyyo. Odim kichchechchi te'im wi'llimmi te'im hawwi hee'ooyyo» yukkuuyyi macceesummo.

⁵Adilla'n barcumanne afuurukkokim «Oono'o! An hundem luwwam haareechchi issoommo» yukko. Odim «Ku sagar amma'nnamaakkoohanee hanqo'anee ihu bikkina kitaabe» yukko.

⁶ Ee lasage odim «Beeddaakko; hundi luchchiinsim illageen hee'ummokii hundi luchchiinsi lasagem hee'oommokii anette. Xeebe'ukkaannina heechcha uwwoo wo'i bu'iinsi bit bee'em uwwoommo.

⁷ Kaa'ukkok eekka laga'llookko; anim ixxena Waa'i ihoommo. Ixxim iina beet ihookko.

⁸Woshshi ihukkaarem baddoo kee'nnek, amma'nnoobee'i kee'nnek, haashaarammuwwik, manna shitam kee'nnek, saa'llam kee'nnek, gennitam kee'nnek, qophpha'n Waa'ina otossitam kee'nnekii qophphanaa'nnekii hundikim saam diininne aphphoo gii'l dambalaqanne ihookko. Oohim la'm leho» yukko.

⁹Ee lasage lasaanchi lamarem boobannuwwi wo'mmaakkoo lamarem injaffuwwa amaddo'i lamarem asse'amaaniinsim mat i beyyo waaraa «Gereechchina arette ikko'i idaayyichcho moo'isoommo; waare» yukkuuyyi wocukko.

¹⁰ Ixxim eese Keesammi Ayyaaninne mat lob qeeraa'l duunanne fissaa keesammi Yerusaalee'm beero'i iimaniinsi Waa'i beyyiinsi dillukkuuyyi moo'isukko.

¹¹Ee beero'onnem Waa'i lombi hee'u bikkina oo beero'i gagmoo'ixxa laboo lobakata bito xee'aalli belecce'oo ki'nnisa caakkisam hee'ukko. Odim muccur gagmoo'ixxisam belecce'am hee'ukko.

¹² Ee beero'inam tommii lam goocii yoo lobakata qeeraa'l qash hee'ukko. Ee tommonnee lamem gooccuwwannem tommii lam asse'amaanii hee'llo'o. Odim ee gooccuwwannem tommikii lamem Isra'ee'l sullikim summi kitaabamaa hee'ukko.

¹³Ee gooccuwwikim eelliinchi firinne sas gooc, hanaa'n qarinne sas gooc, woroo'n qarinne sas gooc, eelliinchi aagginne sas gooc hee'ukko.

¹⁴Ee beero'i qashim tommonnee lam kinannee uullaa hee'ukko. Ee kinneewwannem Gereechchi asse'amaa'nnek tommikii lamikim summi kitaabamaa hee'ukko.

¹⁵ Ee iinninne wocam hee'ukkaannina ee beero'o, gooccuwwaa qashaa keenoo worqi bicci hee'ukko.

¹⁶Ee beero'ik uullichchii midaadii gudaanchi ihaa soor midaad yoohan hee'ukko. Ixxim ee beero'o ee biccinne keenukkaare uullichchi 2,220 kiilomeetira ihooqax beyyi ihukko.[14] Ixxekim qeeraa'lloom, haraaroomii uullichchii gudaanchi hee'ukko.

¹⁷Odim ee beero'i qasham keenukkaare manchi keennaanchonne mat xibbee soree soor angaa hee'ukko.[15] Oohim ee asse'amaanchaannonnette.

¹⁸ Beero'oomim baxamukkok gagmoo'ixxi'nnoo'i muccur worqiinsette hee'ukko. Ihukkaarem qash baxamukkok shaano'i kininnette.

¹⁹Ee beero'i qash uullu kinneewwim lobakata bito xee'aalli kinneewwi hundinnem wereeggaakkoohan hee'ukko. Ee kinneewwikim luxxek gagmoo'ixxa laboo shaano'i kina, la'mmek cuquluusa laboo kina, saxxek heemachchi lab shaano'i kina, soo'llek aduu'n ille laboo kina,

²⁰ontik haxaraam heemachchi kina, lohik boobeet kashar kina, lama'llek worqa laboo kina, sadeentik shaano'i kina, honsik baar kina, tommik baar shaano'i kina, tommikii matikii sandaab kina, tommikii la'mmekii kuul kin hee'ukko.[16]

²¹Oo tommii lam gooccuwwim baxamukkok inqu yakkam tommiinsii lam kiniinsette. Oo gooccuwwi annannichchim ee inqu yakkam kinneewwinne matinne matinnem baxamaakkoohan hee'ukko. Ee beero'i googim burcuqo'isa worinne caakka higisoo muccur worqi hee'ukko.

²²Hundam xanoo Moollanni Waa'ii Gereechchii ee beero'ina Keesammi Min ikko'i bikkina ee beero'onne Keesammi Mine moo'ummoyyo.

²³ Ee beero'ina Waa'i lombii Gereechchii caakki ikko'i bikkina ee beero'o caakkisoo'isina eelliinchi te'im agan hasisooyyo.

²⁴ Minaadabim ee beero'i caakkanne daba'llamookko. Uulli adilluwwim ixxuwwi lomba ee beero'o eebbamo.

²⁵ Ee beero'i gooccuwwi ballanne hore'em xufamooyyo. Hiimim ee beero'onne hee'ooyyo.

²⁶Minaadaphphekam lombaa nuuraa ee beero'i eebbamo.

²⁷ Ihukkaarem Gereechchaannonne heechchi kitaabanne kitaabanto'i keeniinsi bagaan haashaassoo luwwik ma'lluchchim ee beero'o aagooyyo. Odim shigigaa'oo luwwa issitam keenii qophphanaanii ee beero'o hore'em aaggamoyyo.