Read Hadiyya Yohaannis Kaalta 3 Bible Online

Yohaannis Kaalta 3 - Hadiyya bible

Yohaannis Kaalta 3

¹Yesuus Yohaannisina «Sardeesanne wixxitam amma'nnaa'n beyyo asse'amu Waa'i asse'amaanchina kid yitaa kitaabe. Lamarisinne moo'amu Waa'i Keesammi Ayyaanii lamarem boollaankii yookkok anette. An ki baxo la'oommo; kiikki summi xale'i gataakko bagaan letaatto.

²Ki bax i Waa'i illagenne danaam ihaa moo'umbee'i bikkina baqihe; lehiinsi gataa ki'aa odim daba'llaa leheena ihu keenom qoxxise.

³ Kabadem lossitti losanoo macceessitti luwwaa sawwihe. Ixxom egere; baaxiilo biiraa yihe. Atimdu baqitbeelas ki beyyo gamaanchisa waaroommo. An ki beyyo hinkido'i ammanenne waaroomda'e at laqqooyyo.

⁴Ihukkaarem ixxuwwi eddechcha xussitobee'i kee'nnek Sardeesanne hofqax mannim yo'o. Ixxuwwi iinninne hee'immi laboohan ihu bikkina qadaalli eddechcha edde'lla'a iinninne maqirem hee'llamo.

⁵ Kaa'ukkokim qadaalli eddechcha edde'ookko. Ixxi summam heechchi kitaabiinsi shiinshoommoyyo. Ixxi iihan ihukkisam Iyyanni illagennee Iyyanni asse'amaa'n illagennee naqqasoommo.

⁶Qoossaa macceesoo macci yookkok Keesammi Ayyaan amma'nnaa'n wixxittuwwina kurookkoka macceesona» yukko.

⁷ Odim Yesuus Yohaannisina «Filaadalfe'enne wixxitam amma'nnaa'n beyyo asse'amu Waa'i asse'amaanchina kid yitaa kitaabe, Daawiit adilla'n malaayyi yookkok anette. An fooqaa'ummoka ayyim xufooyyo. Odim an xufummokam ayyim fooqaa'ooyyo. An keesammaa hanqo'anee.

⁸An ki baxo la'oommo. Oono'o! An ki illagenne ayyim xufeena xanoobee'i gooca fooqaa'aammo. Ki malaayyi maham hoffan ihukkaarem an yoommi sagara egettaatto. Odim at eese laggittoyyo.

⁹ Oono'o! Ayihuxxi mannik mat mat qophphanaan Sheexaa'n manni waatta'a ki lokkiinsi woroon ubba'a otossitamisa issoommo. Ixxuwwim an keese iittoommisa laqqamo.

¹⁰At xa'nnitaa an yummi sagara egetti bikkina anim keese ka uullanne yoo minaadab hundam keeneena waaroo keenanchi ayyaamiinsi egeroommo.

¹¹An qaqqisom waaroommo. At kaa'lloo bikkina uwwoommi lombi mare'e ayyim massoobee'isa kiina yookkoka qoxxissaa amade.

¹² Kaa'ukkok i Waa'i mi'n utubbuwwiinsi mat ihoo'isa issoommo. Ixxim ee miniinsi hore'em firooyyo. Ixxonnem i Waa'i summaa i Waa'i beero'i summaa oohim iimaniinsi i Waa'i beyyiinsi dilloo haareechchi Yerusaalee'm summaa i haareechchi summaa kitaaboommo.

¹³Qossaa macceesoo macci yookkok Keesammi Ayyaan amma'nnaa'n wixxittuwwina kurookkoka macceesona» yukko.

¹⁴ Odim Yesuus Yohaannisina «Lodooqe'enne wixxitam amma'nnaa'n beyyo asse'amu Waa'i asse'amaanchina kid yitaa kitaabe, Hanqo'ik, amma'nnamaakkookkok, hanqo'i woshsha kuroommokii Waa'i qooccu luwwi hundam qooccummokii anette.

¹⁵An ki baxo la'oommo. At siggaallayyo te'im iibbaallayyo. At siggaalli te'im iibbaalli ikkaattoota'n eran hee'ukko.

¹⁶Ihukkaarem at siggaalli te'im iibbaalli ikkoo'n longooggi ikki bikkina an keese i suumiinsi tuhaa uroommo.

¹⁷At ‹An goddaancho; iina hasisoo luwwi hundim yookko. Iina hanqatoo luwwi ma'lluchchim bee'e› yitoolla. Ihukkaarem at hawwaancho, ma'lluchchim bee'i adaraachcho, buxichcho, qooqaa umba'adaa ikkittisa laqqittoyyo.

¹⁸Ee bikkina at goddaanchi ikkoo'isina giiranne bukkamaa muccuraakkoo worqa, kiikka tuussiisoo umba'adooma ifiixxiteena qadaalli eddechchaa qoossitaa moo'lloo'isina illi qaraaree iinniinsi bitaa'lloo'isina an keese sogoommo.

¹⁹ An iittoommi keeno axeeroommo; guzumo'oommome. Ee bikkina at baqihe; ki baaxiilo biiraa yitaa daba'lle.

²⁰Oono'o! An goocanne uullaa u'llumma fooqaa'lloo'isina weeshoommuulla. Ayyim i sagara macceesaa u'llumma fooqaa'ulas an ixxi beyyo aagoommo. Ixxenne maqirem hurbaata itoommo. Ixxim iinninne maqire itookko.

²¹An kaa'aa Iyyanni adilla'n barcumanne Iyyanninne maqirem afuurummisam kaa'ookkok hundim iinninne maqirem i adilla'n barcumanne afuuroo'isa issoommo.

²²Qoossaa macceesoo macci yookkok Keesammi Ayyaan amma'nnaa'n wixxittuwwina kurookkoka macceesona» yukko.