Read Hadiyya Yohaannis Kaalta 4 Bible Online

Yohaannis Kaalta 4 - Hadiyya bible

Yohaannis Kaalta 4

¹Ee lasage iimanenne fooqaakkoo gooca moo'ummo. Odim luxxeka xurumbulli sagara laboo sagarinne iinninne wocukkuuyyi macceesummok «Ka lasage ihoo luwwa an kiina moo'isoommo; keyye iim waare» yukko.

² Ee ammanchom Ayyaan eesenne dillukko. Oono'o! Iimanenne adilla'n barcuma moo'ummo. Ee barcumannem mat afuuraa hee'ukko.

³Ee afuuraa hee'ukkaannikim hagar belecce'llam bito xee'aalli kuul kinaa bito xee'aalli boobeet kashar kinaa laboohan hee'ukko. Ee adilla'n barcu'm kululleetannem bito xee'aalli shaano'i kina laboo waadamuunchi hee'ukko.

⁴Ee'isam odim ee barcu'm kululleetanne lamiyyii soor adilla'n barcummuwwi hee'ukko. Ee barcummuwwannem qadaalli eddechcha edde'lla'a ixxuwwi horoorennem worqiinsi baxamaakkoo kaachchi mare'e issaqqita'a lamiyyii soor lommannii afuutta'a hee'llo'o.

⁵ Ee adilla'n barcumiinsim banqik belellaat, sagarii gugii firam hee'ukko. Odim ee adilla'n barcu'm illagennem lamar caakkuwwi aphphukkuuyyi caakkisam hee'ukko. Ixxuwwim Waa'ik lamar ayyaannuwwi hee'llo'o.

⁶ Odim ee barcu'm illagennem gagmoo'ixxi'nnoo'i dambalaqa laboo luwwi hee'ukko. Ee barcu'mmaannonne soorem midaadonnem illageenii lasageenii illi wo'mmaakkoo soor fooraam qooccanchuwwi hee'llo'o.

⁷Ee kee'nnekim luxxek hobbichcho laboohan hee'ukko. La'mmek odim mirgo'o laboohan hee'ukko. Saxxaannik illi kolli mannika laboohan hee'ukko. Soo'llek odim bararoo gaaqichcho laboohan hee'ukko.

⁸ Ixxuwwina annannichchinam loh loh laddeewwi hee'ukko. Ixxuwwaannonnem hanennee woronnee illi wo'mmaa hee'ukko. Ixxuwwim ballaa hiimoo «Hee'llittok, yoontokii waattoottokii Hundam xantoo Moollanni Waa'i keesammaa, keesammaa, keesammaa!» yitam hee'llo'o.

⁹Oo soorem fooraam qooccanchuwwim ee adilla'n barcumanne afuuru heer heerina hee'oohaannina lombaa galataa uwwitam amman hundam

¹⁰oo lamiyyii soorem lommannim ee adilla'n barcumanne afuuru heer heerina hee'oohaannina ubba'a otossitam hee'llo'o. Ixxuwwikam kaachchi mare'e ixxi adilla'n barcu'm illagenne dissita'a

¹¹«Ni Moollanni Waa'a! At hundem luchchom qooccitaatto; hundem luchchim ki doo'llisa ihaa qooccamaakko. Kiina lombi, nuurii malaayyii laboohane» yitam hee'llo'o.