Read Hadiyya Yohaannis Kaalta 5 Bible Online

Yohaannis Kaalta 5 - Hadiyya bible

Yohaannis Kaalta 5

¹ Ee adilla'n barcumanne afuurukkaanni makki anganne mat hanennee woronnee kitaabamaa fooqoobee'isa lamar koobo'inne koobamaakkoo kitaaba moo'ummo.

²Odim Waa'ik mat malaayyaam asse'amaanchi malaayyaam sagarinne «Ee koobo'o fooqaa'eenaa kitaaba biddiqaa'eenaa labookkok ayyette?» yaa shuurukkuuyyi moo'ummo.

³Ihukkaarem iimanenne te'im uullanne te'im uulliinsi woroon ee kitaaba biddiqaa'eenaa ixxi wororo moo'eenaa labookkok matim hee'ukkoyyo.

⁴Anim ee kitaaba biddiqaa'eenaa ixxi wororo moo'eenaa labookkok matim bee'u bikkina shikkaa wi'llummo.

⁵ Ee lasage woddaa'i lommannik mat «Wi'llititte! Oono'o! Daawiit moollik Yihuxxi shumo'iinsi qaramu hobbichchi kaa'u bikkina ee lamarem koobo'om fooqaa'eenaa kitaaba biddiqaa'eenaa xanookko» yukko.

⁶ Odim ee lamiyyaannonnee soorem lommannaannonnee lambe'enne yo'i soorem fooraam qooccanchuwwinaa adilla'n barcuminaa lambe'enne mat Gereechchi duramu gereechcho labaa uullaakkoo moo'ummo. Ee Gereechchinam lamar buudii lamar illii hee'ukko. Oo keenim uulli hundam asse'amu Waa'i lamar ayyaannuwwa.

⁷Oo Gereechchim maraa ee adilla'n barcumanne afuurukkaanni makki anganne hee'u kitaaba massukko.

⁸ Ixxim ee kitaaba massukkaare oo soorem fooraam qooccanchuwwii lamiyyii soorem lommannii ee Gereechchi illagenne ubba'a otossito'o. Ixxuwwi annannichchim diitta'aa worqiinsi baxakka'a aduruusa wonshakko'oo muude'ee amadda'a hee'llo'o. Oo aduruusim keesammi keen Waa'a uunxitam uunxato.

⁹ Ixxuwwim «At durantaa ki xiiginne shumo'i hundiinsi, wocakkam suum hundiinsi, minaadab hundiinsii moolli hundiinsii Waa'ina manna bitaa'l bikkina kitaaba massimmii fooqaa'immii kiina laboohan ikkaatto.

¹⁰ Odim at ixxuwwa Waa'i gassoo minaadabaa qeessuwwaa issitaatto. Ixxuwwim ka uulli minaadaba gassitamo» yitu'uuyyi haareechchi mazmuura zammatto'o.

¹¹ Ee lasage odim ee adilla'n barcuma, soorem fooraam qooccanchuwwa, lommannaa kululaa'lla'a uullito'oo lobakat Waa'i asse'amaanoo moo'ummo. Ee asse'amaa'nnekam sagara macceesummo. Ixxuwwikim xig kum ko'l kum afeebe'ee miliyoon ko'l miliyoon afeebe'ee hee'ukko.

¹²Ixxuwwim lobakat malaayyaam sagarinne «Duramu Gereechchina malaayyi, amaxxi,[1] qooroom, qoxallan, lombi, nuur, galatii maassii labookko» yitam hee'llo'o.

¹³Odim iimanenne, uullanne, uulliinsi woroonii dambalaqannee hee'llam qooccanchi hundim «Adilla'n barcumanne afuurukkaanninaa Gereechchinaa galat, lombi, nuurii malaayyii heer heerinam ihona» yitu'uuyyi macceesummo.

¹⁴Oo soorem fooraam qooccanchuwwim «Aameen» yito'o. Lommannim ubba'a otossito'o.