Read Hadiyya Yohaannis Kaalta 6 Bible Online

Yohaannis Kaalta 6 - Hadiyya bible

Yohaannis Kaalta 6

¹Ee lasage Gereechchi lamarem koobo'iinsem luxxeka fooqaa'ukkuuyyi moo'ummo. Moo'ummuuyyim ee fooraam qooccanchuwwiinsi mat banqi gugi'nnoo'i sagarinne «Waare» yukkuuyyi macceesummo.

² Oono'o! Qadaalli farashsho moo'ummo. Ee qadaalli farashshonnem saa'llaa hee'ukkok xiyya amadaa hee'ukko. Ixxenam kaachchi mare'i uwwamukkaare kaa'eena murte'aa kaa'ukkuuyyi marukko.

³Odim Gereechchi la'm koobo'o fooqaa'u ammanenne ee fooraam qooccanchuwwiinsi la'mmek «Waare» yukkuuyyi macceesummo.

⁴ Oono'o! Mulli baar kashar farashshi firukko. Ee farashshonnem saa'llukkaannina manni ixxuwwina'i ixxuwwim shaqqantamisina uulliinsi xumma hooroo malaayyi uwwamukko. Odim geejji bisa'im uwwamukko.

⁵ Odim Gereechchi saxxi koobo'o fooqaa'u ammanenne fooraam qooccanchuwwiinsi saxxek «Waare» yukkuuyyi macceesummo. Oono'o! Odim heemachchi farashsho moo'ummo. Ee farashshonnem saa'llukkok hurbaata keenakkam keennaancho amadaa hee'ukko.

⁶Ee soorem qooccanchuwwi lambe'iinsi sagari'nnoo'i luwwi «Mat manchi mat balla baxu malaayyina aras ihulas lam burcuqo'i ihona. So'i ihulas loh burcuqo'i ihona. Ihukkaarem zaytaa woyinaa hawwoddakkotte» yukkuuyyi macceesummo.

⁷Odim Gereechchi soo'l koobo'o fooqaa'u ammanenne fooraam qooccanchuwwiinsi soo'llek «Waare» yukkuuyyi macceesummo.

⁸ Oono'o! Shiire'i farashsho moo'ummo. Ee farashshonnem saa'llaa hee'ukkaannik summi leho. Ixxom Si'ool awwonukko. Ixxuwwim uullika soo'l suume bagadinne, sibaarinne, jor jabbinnee moochchinnee shitamisina malaayyi uwwamukko.

⁹Odim Gereechchi onti koobo'o fooqaa'u ammanenne Waa'i sagara kutto'i bikkinaa amma'nnanto'oo keen ikko'i bikkinaa shakko'i keeno Waa'ina kitima hincaa'akkam mu'utiinsi woroon moo'ummo.

¹⁰Ixxuwwim sagara iimaa'lla'a «Hundam xantoo Moollanni Waa'a! At keesammaa hanqo'anee. Uullanne hee'llam minaadab neese shito'i bikkina ixxuwwanne oogattaa ni xiiga miqissoobee'ek hinkaa'n balli afeebe'e?» yitu'uuyyi laatto'o.

¹¹Ee lasage ixxuwwina annannichchinam qeeraa'l qadaalli eddechchi uwwamukko. Ixxuwwisam Waa'ina awwaaddam ixxuwwi besha oohim ixxuwwi abbaayyuwwa shakka'a xigo wonshakkeebe'i afeebe'e hoffi ammanem iyyaqqitamisina kuramukko.

¹² Odim Gereechchi loh koobo'o fooqaa'u ammanenne lobakat malaayyaamisa uulli huxe'ukkuuyyi moo'ummo. Eelliinchim xiddi eddechchisa heemachchukko. Aganim xiiqqisa kasharukko.

¹³ Malaayyaam hafachchi heekkeesoohaare oda'i mish giggiraa uboo'isa iima'n boollaanki uullanne ubukko.

¹⁴ Iimanim hirfa'nnisa xaaxamaa beyyiinsi bee'ukko. Odim duunnuwwii wo'i kibbu uullii hundim beyyiinsi laa'ukko.

¹⁵ Ee lasage odim uulli adilluwwi, gassaan, gaaxxi manna awwonsaan, goddaan, malaayyaammuwwi, agidii wolabii hundim daawwa'uwwannee duunnuwwannee yoo geejji geejji kinneewwi kolo'uuwwanne maaxanto'o.

¹⁶ Ixxuwwim «Kee'mmaalli quunqi ayyaam waaru bikkina geejji geejji kinneewwii duunnuwwii ni hanenne ubbakka'a adilla'n barcumanne afuurukkaanni illiinsii Gereechchi quunqiinsii neese maaxxehe. Ixxuwwi illagenne ayyi uulleena xanookko?» yito'o.