Read Hadiyya Yohaannis Kaalta 7 Bible Online

Yohaannis Kaalta 7 - Hadiyya bible

Yohaannis Kaalta 7

¹ Ee lasage Waa'i asse'amaa'nnek soor asse'amaan uullaannonne soorem tochchonnem uullito'oo moo'ummo. Ixxuwwim soorem uulli tochchuwwiinsim hafachchoo hafachchi uullanne, dambalaqannee ihu haqqannee hafachchoobee'isa hootto'o.

²Ee lasage odim hee'oo Waa'ika koobo'o amadaakkoo Waa'i asse'amaanchi eelliinchi firoo kolliinsi waarukkuuyyi moo'ummo. Ixxim uullaa dambalaqaa hawwoddamisina Waa'i malaayye uwwu soorem asse'amaanina sagara iimaa'aa

³ «Ni Waa'ina awwaaddam kee'n miinenne koobo'o issineembe'e uulla, dambalaqaa haqqaa hawwoddakkotte» yukko.

⁴Odim Isra'ee'l tommiinsii lamem sulliinsii ixxuwwi miinenne Waa'ik koobo'i issamu kee'n xigo macceesummo. Ixxuwwi xigim xibbee soree soor kum hee'ukko. Isra'ee'l minaadabiinsim miinenne koobo'o issamu keen

⁵Yihuxxi moolliinsi tommoo lam kuma. Oroobeel moolliinsi tommoo lam kuma. Gaad moolliinsi tommoo lam kuma.

⁶Aseer moolliinsi tommoo lam kuma. Niftaaleem moolliinsi tommoo lam kuma. Minaas moolliinsi tommoo lam kuma.

⁷Simi'oon moolliinsi tommoo lam kuma. Leewi'i moolliinsi tommoo lam kuma. Yisaakoor moolliinsi tommoo lam kuma.

⁸Zaabiloon moolliinsi tommoo lam kuma. Yooseef moolliinsi tommoo lam kuma. Biiniyaam moolliinsi tommoo lam kum hee'llo'o.

⁹Oono'o! Ee lasage odim ayyim xigeena xanoobee'i lobakat manna moo'ummo. Ixxuwwim minaadab hundiinsi, moolli hundiinsi, shumo'i hundiinsii wocakkam suum hundiinsii doo'llanto'oo manni hee'llo'o. Ixxuwwim qeeraa'l qadaalli eddechcha edde'lla'a ixxuwwi angannem dimbaaphphi buyya amadda'a adilla'n barcu'mmaannonnee Gereechchaannonnee illagenne uullito'o.

¹⁰Ixxuwwim sagara iimaa'lla'a shuuttu'uuyyi «Neese gatisukkok adilla'n barcumanne afuuru ni Waa'aa Gereechchoo» yitam hee'llo'o.

¹¹Odim iimanenne Waa'ina asse'antam keen hundichchim adilla'n barcuma, lommannaa soorem fooraam qooccanchuwwaa kululaa'lla'a uullita'a «Ihona; maassi, lombi, galat, qooroom, hibbi, malaayyii qoxallanii ni Waa'ina heer heerinam ihona! Aameen» yitu'uuyyi ee adilla'n barcu'm illagenne illillaachcha qubbita'a Waa'ina otossito'o.

¹³Odim ee lommanniinsi mat i kollonne daba'llaa «Ku qeeraa'l qadaalli eddechcha edde'llo'i keen ayyayyaamo? Waatto'odu hanniinsette?» yaa eese xa'mmukko.

¹⁴ Anim ixxena «I moollanna, at laqqootto» yummo. Ixxim iina dabaraa «Ku keen lobakat hawwiinsi fitta'a waatto'oo keeno. Ixxuwwim ixxuwwi eddechcha Gereechchi xiiginne aanshita'a qadaallisso'ookko.

¹⁵Ee bikkina ixxuwwi Waa'i adilla'n barcu'm illagenne uullita'a ballaa hiimoo Keesammi Minenne ikka'a Waa'ina awwaaddamuulla. Adilla'n barcumanne afuurukkokim ixxuwwinne maqire ihimminne ixxuwwina agir ihookko.

¹⁶ Ee adilla'n barcu'm illagenne yoo Gereechchim ixxuwwi allaaraanchi ihaa heechcha uwwoo bu'i beyyo awwonsaa massoo bikkina ixxuwwi od sibaattamoyyoo xeebe'llamoyyoo. Eelliinchii iibbii ixxuwwa aphphisooyyo. Waa'im ixxuwwi illiinsi indiidda guullaa shiinshookko» yukko.