Read Hadiyya Yohaannis Kaalta 8 Bible Online

Yohaannis Kaalta 8 - Hadiyya bible

Yohaannis Kaalta 8

¹Gereechchi lama'l koobo'o fooqaa'u ammanenne mat sa'aaxxi kollo ihooqax ammanina iimanenne saga'llek ma'lluchchim hee'ukkoyyo.

²Ee lasage Waa'i illagenne uullitam lamar asse'amaano moo'ummo. Ixxuwwinam lamar xurumbulluwwi uwwamukko.

³ Odim aduruusa wiriissimmina worqiinsi baxamaakkoo muude'e amadaakkoo mulli asse'amaanchim waaraa aduruusa wiriissimmina worqiinsi baxamaakkoo mu'uxxi gadanonne uullukko. Oo mu'utim adilla'n barcu'm illagenne hee'ukko. Oo Waa'i asse'amaanchi ee mu'utanne Waa'i doo'llu minaadab Waa'a uunxito'i uunxatinne hamaaroo'isina lobakat aduruus uwwamukko.

⁴Waa'i illagenne uullu ee asse'amaanchi angiinsi aduruus wiriirii Waa'i doo'llu minaadaphphi uunxatii iim firukko.

⁵ Ee lasage oo asse'amaanchim ee muude'e massaa aduruusa wiriissimmina worqiinsi baxamu mu'utiinsi giira wonshaa issaa uullanne darabukkaare banqi gug, belellaat, sagarii uulli huxechchii ihukko.

⁶Ee lasage lamar xurumbulluwwa amadda'a hee'llo'i lamarem asse'amaanim xurumbulluwwa fuggeena guddo'o.

⁷ Ee lamarem asse'amaaniinsim luxxek ixxi xurumbulla fugu ammanenne baradii giirii xiiginne hamaaramaa uullanne ga'nnukko. Uullik saxxi suum, haqqik saxxi suumii hixii hundichchim shokkukko.

⁸Ee lasage odim la'm asse'amaanchi ixxi xurumbulla fugukkaare mat lob duuna laboo luwwi aphphukkuuyyi dambalaq wo'onne darabamukko. Dambalaq wo'ikim saxxi suum xiiganne daba'llukko.

⁹Dambalaq woronne hee'oo fooraam luwwikim saxxi suum lehukko. Markabbuwwikim saxxi suum bi'ukko.

¹⁰ Odim saxxi asse'amaanchim ixxi xurumbulla fugukkaare geejji boollaankichchi xomboo'llisa aphphukkuuyyi wo'i bu'uwwannee daajjuwwi saxxi suumennee ubukko.

¹¹ Ee boollaankichchi summim Geneeno'o yamamoohane. Ixxi ubaa wo'ika saxxi suume qaraassu bikkina dut manni lehukko.

¹² Soo'l asse'amaanchim ixxi xurumbulla fugukkaare eelliinchik saxxi suum, aga'nnek saxxi suumii boollaankik saxxi suumii aphphisamukko. Ee bikkina ixxuwwi caakkik saxxi suum tuunsukko. Odim ballik saxxi suum tuunsukko; ee'isam hii'mmekim saxxi suum tuunsukko.

¹³Eehanniinsi lasage mat gaaqichchi lobakat geejji sagarinne «Gatto'i sasem asse'amaanim xurumbulluwwa fuggam ammane uullanne hee'llam mannina aayye, aayye, aayye!» yukkuuyyi iima'n lambe'enne bararookkoka moo'ummo.