Read Hadiyya Ruut Kitaaba 1 Bible Online

Ruut Kitaaba 1 - Hadiyya bible

Ruut Kitaaba 1

¹Isra'ee'l uullanne daannuwwi gassitam hee'llo'i doollenne ee uullanne sibaar aagukko; ee mashka'inne Yihuxxi uullanne yoo Beetalihee'm beero'iinsi mat manchi ixxi meentichchoo lamem ixxi oosoo amadaa Moo'aaphphi uullanne hee'eena marukko.

²Ee manchi summim Abemeeleekatte; ixxi meentichchi summim Naa'oomette[1]; ixxuwwi lamem oos summim Mahiloonattee Keelwoonattee; ixxi qaramu uullim Efiraat ihukkuuyyi Beetalihee'm beero'onne hee'am hee'ukko; ixxim abaroosinne maqirem Moo'aaphphi uulla maraa afuurukko.

³Ihukkaarem Naa'oom aro'i Abemeeleek eekke'em lehukko; isem is lamem oosinne maqirem gatto'o.

⁴Ixxuwwim Moo'aaphphi uulliinsi landa eebbo'o; ee kee'n summim matekii Orfa'atte; la'mmaantekkim Ruutatte hee'ukko; ixxuwwim ee uullanne tommi hiinchi qaxa hee'lla'a lasage

⁵Maahiloonii Keelwoonii lamim leto'o; Naa'oomem is aro'oo is lamem goo'n oosoo hoogga'a mullam gatto'o.

⁶Naa'oome Moo'aaphphi uullanne hee'llu'uuyyim Waa'i Isra'ee'l minaadabina qishixxato issukkisaa lobakat atootam uwwukkisaa macceessa'a lamem is oos meentinne maqirem Isra'ee'l uulla daba'lliteena ki'llo'o.

⁷Ixxuwwim Yihuxxi uulla marimma asheetto'o; ihukkaarem googonne hee'llu'uuyyim

⁸Naa'oome is oos meentina «Mallehe; ki'nnuwwi mine daba'llitakka'a ki'nnuwwi amo'innem hee'llehe; iinaa lehu i oosinaa eroomma issitakko'isam Moollanni ki'nnuwwinam biijooma issona.

⁹Moollanni ki'nnuwwina er saamo uwwona; ee minennem usheexxato uwwona» yito'o. Ee lasage Naa'oome «Xumma hee'llehe» yita'a suunqito'o; ihukaarem ixxuwwi sagara iimmaa'lla'a wi'llitu'uuyyi

¹⁰«Ihooyyo; kiinninnem ki moollo malloommo» yito'o.

¹¹Naa'oomem «I ooso, mahina iinninne mattakkamane? An ki'nnuwwina goon ihoo ooso la'mmaagge qareena xanoommoka labissakka'atennihe?

¹²I landa, hay ki'nnuwwi mine daba'llehe; an goonanne afoombee'isa lobakata lo'mma'nnaammo; an ayyi la'ukko qaroommoo yaa ka hiimo goonanne afumta'nnii goo'n oosom qarumta'nnii

¹³ixxuwwi li'lla'a affeebe'e egattakkamonnihe? Ee bikkinaa yitakka'adu mulli goonanne affakkoo'n egattakkamonnihe? I landa ee'isayyo; an ki'nnuwwanne afu luwwanne lobakata qaraaraammo; mashka'oomim Moollanni angi i hanenne kee'mmaakko» yito'o.

¹⁴Ixxuwwim sagara iimaa'lla'a la'mmaagem wi'llito'o; ee lasage Orfa'a is ballo suunqita'a xumma hee'e yita'a daba'llito'o; ihukkaarem Ruuta hincito'o.

¹⁵Naa'oomem Ruutana «Ki heereechchi are is moolli beyyoo ise otossitam waa'uwwi beyyoo daba'llito'i bikkina atim issenne maqirem daba'lle» yito'o.

¹⁶Ihukkaarem Ruuta isena «An keese awwonoombee'isa hoottitte; at mattoo beyyo hundam maroommo; gattoo beyyonnem garoommo; keese uronaa ki beyyiinsi daba'llonaa eese hawwissitte; ki qarmanni iinam qarmanna; ki Waa'i iinam Waa'a.

¹⁷At letoo beyyonne anim lehoommo; waammantoo beyyonnem waammamoommo; lehiinsi bagaan eesee keesee annanni issoo luwwi hee'ukkaare Waa'i eese bi'isona» yita'a hide'llo'o.

¹⁸Naa'oomem Ruuta issenne maqire matteena murte'llo'isa moo'lla'a ee woshsha od wocimma utto'o.

¹⁹Lamim Beetaliheem afeebe'e maqirem matto'o; Beetalihee'm beero'o afamaa lasagem ee beero'i manni hundim ixxuwwanne maalalto'o; ee beero'i meentim «Hanqoomam tute Naa'oomattennihe?» yitu'uuyyi coro'llam hee'llo'o.

²⁰Naa'oomem «Hundam xanoo Waa'i i heechcha qaraaraalli issaakkoo bikkina eese Maara'a [2] yi'llehe bagaan ‹Naa'oome› yitakka'a weeshshakkotte.

²¹Ka uulliinsi marummi ammane abaroosinne marummo; ihukaarem Waa'i eese murugatti issaa dabaraakko; Waa'i eese sholliisaakko; hundam xanoo Waa'i eese u'nnisaakko; ee bikkina mahina eese ‹Naa'oome› yitakkamane? yito'o.

²²Naa'oome is beet aretti hee'llo'i Moo'aaphphi uulli Ruutanne maqirem Moo'aaphphi uulliinsi Beeteeliheema daba'llito'ok so'o murimma amadakko'oo ammanennetti hee'ukko.