Read Hadiyya Ruut Kitaaba 2 Bible Online

Ruut Kitaaba 2 - Hadiyya bible

Ruut Kitaaba 2

¹Naa'oomena aro'i hee'u Abemeeleekina hincixxi qarmanchi Boo'eeza yakkam la'amaakkoo goddaanchi manchi hee'ukko.

²Mat balla Moo'aaphphi Ruuta Naa'oomena «Ayyi la'ukko mat manchi illagenne nuura siidummaare ixxo awwonaa hurbaaxxi qarme'iinsi qiima feereena maronnihe?» yito'o. Isem «I landichche, ihona mare» yito'o.

³Ruutam hurbaata murakkam beyyo matto'o; is gada'isam ihaa Boo'eez hurbaata murakkam beyyo affa'a muroo kee'n laso awwontu'uuyyi qiima feetto'o.

⁴Hofqax ammanniinsi lasage Boo'eez Beetaliheemiinsi ki'aa hurbaata murakkam beyyo waaraa hurbaata muttam keenina «Waa'i ki'nnuwwinne maqir ihona» yukko. Ixxuwwim dabatta'a «Waa'i keesem maasse'ona» yito'o.

⁵Boo'eezim ixxi hurbaata muttam kee'n ijaajaancho «Tu mishissam landichcho ayyetane?» yaa xa'mmukko.

⁶Oo baxaano baxisaanchim «Tute Naa'oomenne maqire Moo'aaphphi uulliinsi waatto'oo Moo'aaphphi uullitane.

⁷Isem hurbaata muttam kee'n lasonne ‹Farshimiinsi ubu qiima fee'llonnihe?› yita'a xa'mmito'o; hofqax ammanem daasanne aagga'a usheexxito'ookko bagaan dariinsim ki'issa'a kabad afeebe'em feettamuulla» yukko.

⁸Ee ammanenne Boo'eez Ruutana «I landichche macceese; keyyenne baxxam landa awwontaa feere bagaan ka qarime'e uttaa mulli beyyo mattitte.

⁹Ixxuwwi hinke'enne hurbaata muttamuulda'e moo'llaa ixxuwwinne maqire ihe; keese hawwissambee'isam an woraada ijaajaammo; at xeebe'llitti ammanem ixxuwwi inkiitta'a dissito'i wo'i haralli beyyo mattaa wo'o age» yukko.

¹⁰Ruutam uullanne aad heeshshita'a «An allaggichchotti ihaa hee'ummuuyyi at iina eroomma issitoo'isna ki illagenne an nuura siideena xanummok hinkidette?» yito'o.

¹¹Boo'eezim isena «Ki aro'i lehu ammaniinsi ki'isaa ki ballona at issitti eroomma hundam an macceesaammo; kiyyannaa kiyyummaa qarantitti uullaa hundam uttaa kanniinsi illageen laqqoobee'i minaadabinne maqire hee'lleena waattittisa la'aammo.

¹²At issitti eroommina hundinam Waa'i kiina bito miqona; ixxi hafiinsi woroon usheexxato siiddeena waattitti Isra'ee'l Moollanni Waa'i kiina eekka miqona» yukko.

¹³Ruutam «I moollanna, ki awwaadaaniinsi matisam ihumbee'i iina qishixxitaa wocimminne eese qoxxissaatto» yito'o.

¹⁴Balli hurbaata itakkam ammanenne Boo'eez Ruutana «Waare, ka hurbaaxxi kollonne hincihe; ka hurbaata hooshechchinne hooshe'llittuuyyi ite» yukko. Isem hurbaata muroo keeninne maqirem afuutto'o; Boo'eezim giiranne saramaakkoo hamaama uwwukkaare itto'o; goddita'ahim kollo gatisso'o.

¹⁵Odim qiima feetteena ki'llo'aare Boo'eez ixxi baxaanina «Farshimmuwwi lambe'iinsettem ihukkaare fee'llitona bagaan hore'em hoottakkotte.

¹⁶Hore'oomam karamu farshimiinsim mat mato huduuddakku'uuyyi gatissehe bagaan hoottakkotte» yaa ijaajukko.

¹⁷Ruutam uulli hiimeebe'e feettu'uuyyi hossa'a lasage feetto'i qiima ganta'a mat qunni so'o fissito'o.

¹⁸Iyyita'ahim beero'o aaggo'o; is ballonam ee qarme'iinsi feetto'oka moo'isso'o; ise itta'a goddita'a gatu hurbaatam is ballona uwwito'o.

¹⁹Is ballom isena «Kaballa hannonnette qiima feettittok? Ayyi uulliinsette feettittok? Ka eroomma kiina issu manchi maasse'amaakkoohan ihona» yito'o. Ruutam «An qiima feerummuuyyi hosummok Boo'eeza yakkam manchi uullannette» yito'o.

²⁰Naa'oomem is beet arena «Foorinne yo'i keeninaa leto'i keeninaa aagu neeyyaxxi sagara wonshoo'n uroobee'i Waa'i ixxo maasse'ona; oo manchi niina hincixxi qarmanchona'e; neese lago gasseena xanoo manniinsi matona'e» yito'o.

²¹Ruutam dabatta'a « ‹Hurbaaxxi murat beeddeebe'i afeebe'e i baxaa'n lasonne hincitaa fee'lle› yaakko» yito'o.

²²Naa'oomem is beet arena «I landichche, Boo'eez hurbaaxxi qarme'enne baxoo meentinne maqire feettittaare eranne; mulli manni hurbaaxxi woro mattittaare ayyi la'ukko keese woraad hawwiseena xanookko» yito'o.

²³Ee bikkina Ruuta so'oo arasaa murakkam agan beeddeebe'e Boo'eezina baxxam meentinne maqirem feetto'o; is balloonsim annanni ikkoo'n maqirem hee'llo'o.