Read Hadiyya Ruut Kitaaba 3 Bible Online

Ruut Kitaaba 3 - Hadiyya bible

Ruut Kitaaba 3

¹Ee lasage Naa'oome Ruutana «I landichche, an keese usheexxisoo goonanne affona hasoommo.

²Qiima feettittuuyyi kiinninne maqire hee'u meenti awwaadoo Boo'eez niina hincixxi qarmanchi ihukkisa la'e; an kabadem kiina kuroommi woshsha macceese; kaballi maaro'o ixxi so'o ganukkuuyyi oodo'onne garoohane.

³Ee bikkina at kaba aanshaqqitaa shitto'o laphphe; ki eddechcham edde'llaa ixxi hurbaata ganoo beyyo odo'o mare; ihukkaarem ixxi hii'm hurbaata itaahii agaahii ki'eebe'e ixxena moo'antitte.

⁴Hinke'enne iinse'ooda'e moo'llaa lasage diriiroo ammane hincitaa ixxi lokki kolli eddechcha fooqaa'llaa iinse'e; ee lasagem ixxi at issitoo luwwa kiina kurookko» yito'o.

⁵Ruutam «At yitti luwwi hundam issoommo» yito'o.

⁶Ruutam oodo'o matta'a is ballo yito'i luwwi hundam issito'o.

⁷Boo'eez itaa agaa ixxi wodano liiransaa lasage hurbaaxxi atooxxi gadanonne iinse'eena marukko; Ruutam qaphphita'a matta'a ixxi lokki kollinne eddechcha fooqaa'lla'a iinse'llo'o.

⁸Luxxi baqitenne Boo'eez diriiriinsi baqaa midaado daba'lloohaare mat meentichcho ixxi gadanonne inse'llo'oo moo'aa muggukko.

⁹Ixxim «Taa at ayyette?» yaa xa'mmukko. Isem «I moollanna, an Ruutatte; iina hincixxi heereechchi ikkitti bikkina ki eddechcha eesenne ki awwaadaanchonne ambe» yito'o.

¹⁰Boo'eezim isena «I landichche, Waa'i keese maasse'ona; at kanniinsi illageen ki ballona issittaanniinsi loboka ka abaroosina issimminne lophphaakkoo iitto moo'issaatto; goddaancho te'im buxichcho yitaa woraada awwontittoyyo.

¹¹Kabadem ihukkaare i landichche at baddititte; at xa'mmitti luwwi hundam an issoommo; mashka'oomim at er meentichchotti ikkittisa beero'i manni hundim la'ookko.

¹²An kiina heereechchi ihimmi hanqame; ihukkaarem kiina hincoo heereechchi yookko.

¹³Ka hiimo at keyyem gare; uulli soodoohaare oo kiina hincoo heereechchi keese gassooda'e te'im sabooda'e xa'mmoommo; ixxi keese laggassoohan ihulas danaamo; ihukkaarem ixxi keese lago gasseena hasubeelas an keese lago gasseena hee'oo Waa'i summinne sagara aagoommo; uulli soodeebe'e keyyem iinse'e» yukko.

¹⁴Ee bikkina Ruuta Boo'eez lokki gadanonne iinse'llo'o; ihukkaarem Boo'eez ise ixxenne gatto'isa matim la'ona hasubee'i bikkina ayyim qoossaa moo'eena xanoobee'i soodaraar daranne iinsiinsi ki'llo'o.

¹⁵Boo'eezim isena «Ki weyyakka kid biddiqaa'e» yukko; isem biddiqaa'lla'a amaddo'o; Boo'eezim mat qunna ihoo qax so'o keenaa is afarenne iyyiisukko; isem ee so'o iyyita'a beero'o daba'llito'o.

¹⁶Is balli beyyom waatto'o; is ballom «I landichche, oo mattitti woshshi hinkidette?» yita'a xa'mmito'o; isem Boo'eez issu luwwi hundam kutto'o.

¹⁷Odim « ‹Ki balli beyyo kora'i angam mattitte› yaa ka lamiyyi kilo'i so'o uwwaakko» yito'o.

¹⁸Naa'oomem isena «Oo manchi kaballa ka woshsha guulloo'n usheexxoobee'an ihu bikkina lasaancho laqqeebe'e egere» yito'o.