Read Hadiyya Ruut Kitaaba 4 Bible Online

Ruut Kitaaba 4 - Hadiyya bible

Ruut Kitaaba 4

¹Boo'eez beero'o aagakkam goocanne yoo wixxixxi beyyonne maraa afuuraakkoohaannonne gaassaa Boo'eez Ruutana kuraa hee'u Abemeeleekina abbis qarmanchi ee beyyo waarukko; Boo'eezim «Iyyabbaayyo, hino'o kid waattaa i gadanonne afuure» yukko. Oo manchim eekke'e maraa afuurukko.

²Odim Boo'eez ee beero'i lommanniinsi tommi mancho weeshaa ee dummichchi beyyonne afuutamisa issukko; oo maanni afuutta'a lasage

³ixxi ee lago aa'eena xanoo hincixxi qarmanchina «Moo'aaphphi uulliinsi daba'llita'a waatto'i Naa'oome niyyabbaayyi Abemeeleek uulla biteesseena hassamuulla.

⁴Ee woshsham at la'immi hasisookko yaa sawwummi bikkina kaba keyyenne afuuru lommanni illagenne lago aa'llona tiissiiseena hasoommo; at hassoobee'an ihulasim murte'i woshsha kure; mashka'oomim ee uulla lago aa'lleena xantoo hincixxi qarimanchi atette; at hassoobee'an ihulas kiinniinsi lasonne lago aa'eena xanoommok anette» yukko. Oo manchim «An lago aa'oommo» yukko.

⁵Boo'eezim «Erane; ihukkaarem Naa'oomeensi uulla aa'lloo ammane uulli lehu manchi summinne weeshamona is aro'i lehu Moo'aaphphi uulliinsetti ikko'i Ruutam eddaa lago aa'lloohan ihukkisa la'e» yukko.

⁶Oo hincixxi qarmanchim Boo'eezina dabaraa «Ee'isa ihulas an lago aa'eena hasoommoyyo; mashka'oomim ixxi i gaqqi uullanne hawwo qoocceena xanoohan ihu bikkina an i hanqa kiina uwwaammo at lago aa'e» yukko.

⁷Ee doollenne mat luwwa biteesakkam ammane te'im dabassamakkam ammane biteesaanchi bitaa'aanchina mare'i ihona kobe'e fissaa uwwimmi Isra'ee'l uullanne losamaakkohan hee'ukko.

⁸Ee bikkina oo manchi Boo'eezina «At ki gagim bito aa'e» yaa ixxi kobe'e lokkiinsi fissaa uwwukko.

⁹Ee lasage Boo'eez lommanninaa ee beyyonne hee'llo'i manninaa hundinam «Kaballa an Abemeeleekikaa ixxi oos hee'llo'i Keelwoonikaa Maahloonikaa amaxxa hundam Naa'oomeensi lago aa'ummisina ki'nnuwwi hundim naqaashshuwwa.

¹⁰Odim lehu manchi summi ixxi moolli lambe'ennee ixxi uullannee la'amaa hee'onaa ixxi amaxxim ixxi summinne weeshamoo'isnaa Maahloonina aretti hee'llo'i Moo'aaphphi uulliinsi waatto'i Ruutam iina aretti ikkona eebaammo; ki'nnuwwim ee luwwi hundinam kaballa naqaasha» yukko.

¹¹Ee wixxixxi beyyonne wixxaa hee'u lommannii mulli minaadabii hundim «Eeyya; neese naqaasha; Waa'i ka ki mine aaggam meentichcho Yaaqoobina lobakat ooso qaramu Raaheelisaa Liya'isaa issona; Waa'i keese Efiraatanne goddaanchi issona; Beetaliheemannem ki sado la'amaakkoohan issona.

¹²Waa'i ka mishissam landichchoonsi kiina uwwoo ooso Ti'imaare Yihudina qatto'i Faarees abaroosisa issona» yito'o.

¹³Ee bikkina Boo'eez Ruuta ixxi aretti isseena ixxi mine massukko; ixxim isenne maqire iinse'ukko; Waa'im ise maasse'u bikkina lamfooretti ikka'a goonchi beeto qatto'o.

¹⁴Olla'i meentim Naa'oomena «Kaballa keese abooyyoo oos ooso uwwu Waa'i galaxxamona; ixxom Isra'eelanne summamaakkoohan issona.

¹⁵Keese lobakata iittitam ki beet are lamar goo'n oos issoohaanniinsi loboka issito'ookko; kaba odim ki heechcha haareechchi issookkokaa lommannanonne keese abooyyookkokaa qatto'ookko» yito'o.

¹⁶Ee lasage Naa'oome ee ciila aa'lla'a qaaphphito'o; erisa abooyyita'ahim li'isso'o.

¹⁷Is olla'i meentim ee ciilika summa «Yoobeeda» yita'a fissito'o. «Naa'oomena goonchi beet qaramukko» yitu'uuyyim manni hundinam kutto'o. Adil Daawiitina anni ihu Issayye qarukkok ka Yoobeedatte.

¹⁸Faareesiinsi ki'isaa Daawiitanne afeebe'e yoo qaranchi kanniinsi woroon yoohane. Oohim Faarees Heesiroona qarukko; Heesiroon Araama qarukko; Araam Aminaadaaba qarukko; Aminaadaab Na'aasoona qarukko; Na'aasoon Salmoona qarukko; Salmoon Boo'eeza qarukko; Boo'eez Yoobeeda qarukko; Yoobeed Issayye qarukko; Issayyem Daawiita qarukko.