Read Hadiyya 1 Saamu'eel Kitaaba 11 Bible Online

1 Saamu'eel Kitaaba 11 - Hadiyya bible

1 Saamu'eel Kitaaba 11

¹Mat aganiinsi lasage Amoo'n adil Naa'oos Gala'aaxxi uullanne yoo Yaabeesh beero'onne ixxi gogot weerattamisa issimminne kibbukko; oo Yaabeesh manni Naa'oosina «Niinninne hide'ammona; neesem kiina awwaadaan inkoommo» yito'o.

²Naa'oosim «Ki'nnuwwinne maqire hidiro aagoommisa issoo mat woshshi yookko; oohim annannichchikam makki kolli ille fissimminne Isra'ee'l minaadabanne tuussiisoo sholle'nna eeboommo» yaa dabarukko.

³Yaabeesh awwonsaanim «Hundem Isra'ee'l uulla manna asse'nneembe'e lamar ayyaamo ihoo qax ammane uwwe; neese gatisookkoka hoongummaa'lleensi kiina ni anga uwwinoommo» yito'o.

⁴Asse'amaanim Saa'ool beyyo Gibi'a affa'a ee woshsha kutto'i ammanenne minaadab hundim sagara iimmaa'lla'a wi'llitto'o.

⁵Saa'ool ee ammane mat kado'i mirgo'uwwa ushe'aa abuulli beyyiinsi daba'llam hee'ukko; ixxim «Woshshoom maruwwa?» yaa xa'mmukko; ixxuwwim Yaabeeshiinsi waatto'i asse'amaan yito'i woshsha kutto'o.

⁶Saa'ool ka woshsha macceesu ammanenne Waa'ik Ayyaan ixxi hanenne wodaamisa dillukko. Saa'oolim lobakata quuqukko.

⁷Ee mat kado'i mirgo'uwwa muransaa ee muransu maara hundam amadiisaa «Saa'oolaa Saamu'eelaa awwonaa orina firoobee'i manchik mirgo'uwwi ka'isa muramookko» yoo qoxxaalli asso Isra'ee'l minaadab hundinam asse'ukko. Isra'ee'l minaadab hundim Waa'a lobakata baddita'a mat manchim gatoo'n hundim matikka'a fitto'o.

⁸Saa'oolim Beezeeqanne wixxaa'ukko. Ixxuwwi xigim Isra'eeliinsi waaru kee'nnek sas xibbi kum hee'ukko. Yihudiinsi Waaru kee'nnekim sad kum hee'ukko.

⁹Yaabeeshiinsi waatto'i asse'amaanom «Soodo samgud balliinsi gaassinaa diina'iinsi gatinsoomman ihukkisa ki'n minaadabina kullehe» yito'o. Yaabeesh minaadabim ee asso macceesso'i ammanenne lobakata liiranto'o.

¹⁰Naa'oosinam «Soodo ni anga kiina uwwinoommo; atim neese kiina liiransukkis hundam issitootto» yito'o.

¹¹Soodaraarom ki'aa Saa'ool o'l gogota sas beyyonne baxxansukko. Soodukkuuyyim ki'lla'a Amoo'n manna qasso'o; balli kolli afeebe'em Amoo'n manna guullito'o. Ee beeddichchiinsi gatto'i qaxim annannichchim gibbu'uuyyi binnito'o.

¹²Ee lasage Isra'ee'l minaadab Saamu'eelina « ‹Saa'ool neesenne adil ihooyyo› yito'i manni ayyayyette? ixxuwwa niina higissaa uwwe shinoommo» yito'o.

¹³Ihukkaarem Saa'ool «Kaballa mat manchom shimmi hasisooyyo; mashka'oomim ku ayyaam Waa'i Isra'ee'l minaadaba gatisu balla» yukko.

¹⁴Saamu'eelim «Neese hundim Gelgela mallaa Saa'ool niina adil ihukkisa erisa la'insona» yukko.

¹⁵Ee bikkina hundim Gelgela matta'a Waa'i illagenne Saa'ool adil ihukkisa la'isso'o; ee beyyonnem mateeyyoo'm kitima hincaa'llo'o. Saa'oolii Isra'ee'l minaadabii hundim ee uguda liiranchinne lonsito'o.