Read Hadiyya 1 Saamu'eel Kitaaba 12 Bible Online

1 Saamu'eel Kitaaba 12 - Hadiyya bible

1 Saamu'eel Kitaaba 12

¹Ee lasage Saamu'eel Isra'ee'l minaadabina «Ki'nnuwwi xa'mmichcha hundam aa'aa ki'nnuwwina adila uullisaammo.

²Kanniinsi eehid ki'nnuwwa awwonsoo adila siiddakko'ookko. An lomma'nnaammo; i horoorim abo'aakko; i oosim ki'nnuwwinne maqire yo'o; woraaddaniinsi ki'isaa kaballi afeebe'e ki'nnuwwa awwonsaammo.

³Oono'o kaba ki'nnuwwi illagenne uullaammo. Waa'i illagennee ixxi doo'llu adi'l illagennee kullehe. An ayyi mirgo'o aa'ummo; Ayyi hallichcho mussummo? Ayye qawwisummo? Ayye barche'e issummo? Oogato boqqiseena ayyeensi maqanxa aa'ummo? Ka qaxiinsi matom issaammoohan ihulas dabaroommo» yukko.

⁴Ixxuwwim «Neese qawwiissittoyyo, Neesem barche'e issittoyyo; ayyeensim ma'lluwwam aa'llittoyyo» yita'a dabatto'o.

⁵Saamu'eelim «Oono'o an kaballa kinnuwwi illagenne muccur ihummisina Waa'ii ixxi doo'llu adilii naqaashshuwwa» yukko. Minaadabim «Eeyya! Ixxi niina naqaasha» yito'o.

⁶Ee lasage Saa'mu'eel minaadabina «Muse'ee Aaroonaa doo'llukkok gaassi ki'nnuwwi anno'om Gibxi uulliinsi fissukkok Waa'a.

⁷Kabadem ki'nnuwwinaa ki'nnuwwi anno'inaa Waa'i issu muccuroo'm bax hundinam Waa'i illagenne an ki'nnuwwinne fitamoommi bikkina keyye uullehe.

⁸Yaaqoobii ixxi abaroosii Gibxi uulla dillita'a ee beyyonne hee'llu'uuyyi Gibxi uulli manni woramadoo gaanjaqqa iyyiisso'o. Gaassi anno'im hara'mmato siiddeena Waa'i kollonne laatto'o. Waa'im Muse'ee Aaroonaa asse'ukko. Ixxuwwim Gibxiinsi awwonsita'a fissimminne ka uullanne hee'llamisa issito'o.

⁹Ihukkaarem minaadab ixxuwwi Moollanni Waa'a xaddo'o. Ee bikkina Waa'i Filisxeemina, Moo'aaphphi adilinaa Haxoor beero'i gogoxxi ijaajaanchi hee'u Siisaarinaa gaassi ki'nnuwwi anno'o higisaa uwwukko. Ixxuwwim Isra'eela kaa'llamisa issukko.

¹⁰Ee lasage ixxuwwi ‹Waa'a! Kiinniinsi qee'llinaa Ba'aalinaa Astaarootinaa otossinaa keese hawwondaammo; ihukkaarem kaba ni diina'i angiinsi neese gatise neesem kiina otossinoommo› yita'a Waa'i kollonne laatto'o.

¹¹Waa'im gaassaa Geedewoona ee lasagem Baaraaqaa Yooftaahee lasaanchonnem eese asse'aa ki'nnuwwi maso'iinsi gatisukko; ki'nnuwwim xumminne hee'llakkammisa issukko.

¹²Ihukkaarem ki'nnuwwi Amoo'n adil Naa'oos ki'nnuwwanne hawwo afiseena ki'ukkisa moo'llakko'i ammanenne ki'nnuwwi adil hee'u Waa'a laggakka'a ‹Neese awwonsoo adila uullise› yitakku'uuyyi eese xa'mmitakko'o.

¹³Kabadem doo'llitakko'i adila xa'mmitakko'isinnem oono'llehe Waa'i doo'llaa uullisaakko.

¹⁴Waa'a badditakko'aare, ixxenam otossitakko'aare, ixxi sagaram macceessakko'aaree ixxi ijaajom egettakko'aaree ee'isam ki'nnuwwii ki'nnuwwi adilii Moollanni Waa'a awwontakkolas ki'nnuwwina hundem luwwim taaphanookko.

¹⁵Ihukkaarem Waa'i sagara macceessakkobee'aaree Waa'i ijaajonnem boqqitakko'aare Waa'i angi ki'nnuwwi adilannee ki'nnuwwannee diina'oominne ki'ookko.

¹⁶Ee bikkina yoontakke'i beyyonne qoxxitakka'a uullehe; Waa'i issoo maalalsiisoo luwwa moo'llakkamo.

¹⁷Oono'o kaba laqqakkamisam eelliinchi iibbi lophphaakkoo hurbaata wixxaa'akkam aganayyonnihe? Ihukkaarem an kaba Waa'a uunxoommo. Waa'im gugaa xeenaa asse'ookko. Kuk ihoo ammanem ki'nnuwwina adila uullisoommisina xa'mmitakko'i mashka'inne Waa'a hawwoddakko'isaa kichche'issakko'isaa qoossitakkamo» yukko.

¹⁸Ee lasage Saamu'eel Waa'a uunxukko. Ee ayyaamonnem Waa'i xeenaa gugaa asse'ukko. Ee bikkina minaadab hundim Waa'aa Saamu'eelaa lobakata baddito'o.

¹⁹Minaadab hundim Saa'mu'eelina «Niikki mulli jolli hoffe'oo'nnim niina adil doo'llamoo'isina xa'mmimminne Waa'a hawwondummisa kaba lanqaammo. Ni jollinne lenoombee'isina niina ki awwaadaanina ki Moollanni Waa'a uunxe» yito'o.

²⁰Saamu'eelim «Baa'llakkotte! Kido'i jor luwwa issitakko'oo keen ikkakko'aarem wo'm wodaninne Waa'ina awwaaddehe bagaan ki'nnuwwi ille Waa'iinsi mulli kollonne dabattakkotte.

²¹Qophpha'n Waa'uwwa awwontakkotte; ixxuwwi hanqo'i keen ikko'i bee'i bikkina maham hara'mmiteenaa gatisseenaa xantamoyyo.

²²Waa'i ki'nnuwwina wo'm neeyyata uwwu bikkina ki'nnuwwa urooyyo. Mashka'oomim ixxi ki'nnuwwa ixxi gaqqan isseena gaassaatim murte'aakko.

²³An i kollinne ki'nnuwwi bikkina Waa'a uunximma urimminne Waa'a hawwodoomman ihaa siidamoombee'isa eese ixxi egerona. Ki'nnuwwi bikkina Waa'a uunximma urimmi bikkenne ki'nnuwwi issimmi hasisoo xabbeen er woshsha an ki'nnuwwina losisoommo.

²⁴Ee bikkina Waa'ina ijaajammehe. Ki'nnuwwi wo'm wodaninnem amma'nnantakka'a ixxi ki'nnuwwina issu maalalsiisoo luwwuwwa hundam sawwi'llehe.

²⁵Ihukkaarem baaxiilo baximmanne qoxxitakko'aa'lleensi ki'nnuwwii ki'nnuwwi adilii bi'llakkamo» yukko.