Read Hadiyya 1 Saamu'eel Kitaaba 13 Bible Online

1 Saamu'eel Kitaaba 13 - Hadiyya bible

1 Saamu'eel Kitaaba 13

¹Saa'ool adil ihu ammane ixxi umur sad hiincho ihaa hee'ukko. Adil ihu la'm hiinchonne

²Saa'ool Isra'ee'l minaadabiinsi feeranto'oo sas kum manna doo'llaa ixxuwwi lambe'iinsi lam kum manna Miikmaasannee Beeteelannee yoo duunaam uullanne ixxenne ikkamisa issukko. Odim mat kum manna ixxi beet Yoonaataaninne maqirem edaa Biiniyaam shumo'i gassi woronne Geeba'a yakkam duunaam uulla asse'ukko; ihukkaarem eehanniinsi gatto'i mulli manna mine elle'llamisa issukko.

³Yoonaataanim Geeba'anne Filisxee'm manna qasukko. Filisxee'm minaadabim ka woshsha macceesso'o. Saa'oolim manna asse'aa ee uullanne hundannem xurumba fugisaa Ibro'i manna orina weeshukko.

⁴Saa'ool Filisxee'm manni gaaxxi awwonsaancho shukkisaa Filisxee'm mannim Isra'ee'l manna sabbo'isaa Isra'ee'l manni laqqo'o. Ee bikkina Isra'ee'l manni hundim Saa'oolinne maqire gaadina fittaman ihukkisa la'isseena Gelgelanne wixxito'o.

⁵Filisxee'm mannim Isra'ee'l manna qasseena wixxito'o. Ixxuwwinam sad kum o'l gaarre'uwwi, loh kum faradaanii ee'isam xigakkeena xanakkambee'i dambalaq shashsha'l qax gogotii hee'ukko. Ixxuwwim Beeti'aawe'iinsi eelliinchi firinne Miikmaasa yakkam beyyonne matta'a giribba baxxa'a afuutto'o.

⁶Isra'ee'l oos duuha'i jor ihukkisaa ixxuwwi o'l gogotim hambalaachchamukkisaa moo'lla'a worko'onne, utti shif woronne, ki'n lambe'enne, barennee baallennee maaxamto'o.

⁷Mulli keen odim Yoordaanoos daajje higga'a Gaad uullaa Gala'aaxxi uullaa matto'o. Ihukkaarem Saa'ool ee amman hundam Gelgelanne hee'ukko. Ixxenne hee'llo'i gogotim baddimmiinsi ki'ukkok huxe'llam hee'llo'o.

⁸Saa'oolim lamar ayyaam afeebe'e Saamu'eel waaroo'isa egerukkuuyyi afuurukko. Mashka'oomim ee'isa issoo'isina Saamu'eel Saa'oola ijaajaa hee'ukko. Ihukkaarem oo amman afeebe'e Saamu'eel Gelgela waarukkoyyi hee'ukko. Eehanniinsi ki'ukkok minaadab Saa'oola lagga'a laso daba'llimma asheetto'o.

⁹Ee bikkina Saa'ool minaadabina «Shokkiisakka'a hincaakkam kitimaa mateeyyoo'm kitimaa eebbehe» yaa ijaajaa shokkiisakkam kitima hincaa'ukko.

¹⁰Kitima hincaa'aa ki'ukkisam Saa'mu'eel waarukko. Saa'oolim firaa aa'ukko.

¹¹Saamu'eelim «Mah baxo baxxittok?» yaa xa'mmukko. Saa'oolim «I gogot binnukkisa, atim yitti ammanenne waatbee'isaa ee'isam Filisxee'm manni Miikmaasanne wixxito'isaa moo'ummo.

¹²Ee bikkina ‹Filisxee'm manni an Gelgelanne heemmisam waatta'a eese qasseenatte. Anim Waa'iinsi hara'mmato siidummoyyo› yaa sawwummo. Ee bikkina shokkiisakkam kitima hincaa'immi iina hasisukkisa moo'aatette» yaa dabarukko.

¹³Saamu'eelim Saa'oolina «Qawwoo'm baxo baxxaatto; ki moollanni Waa'i uwwu ijaajo egettittoyyo. Egettaattoota'n ki adillano Isra'ee'l hanenne heer heerinam qoxxisam hee'ukko.

¹⁴Ihukkaarem ka lasage ki adillan uullooyyo. Oono Waa'i ixxi woda'nnisa ihoo mancho doo'llaakko. At Waa'i ijaajo egerimma hoogimminne ixxo minaadabina awwonsaanchi issaa doo'llaakko» yaa dabarukko.

¹⁵Ee lasage Saamu'eel Gelgeliinsi ki'aa Biiniyaam gassi woronne yoo Gibi'aa yakkam uulla marukko. Saa'oolim ixxenne maqire yoo manna xigukko. Ixxuwwi xigim loh xibbi hee'ukko.

¹⁶Filisxee'm manni Miikmaasanne wiiddannita'a hee'llo'i ammane Saa'ool, ixxi beetii ixxenne maqire hee'llo'i mannii Biiniyaam gassonne yoo Gibi'anne hee'llo'o.

¹⁷Filisxee'm gaadaan sas beyyonne baxxamanta'a qasanteena worko'iinsi fitto'o. Mat gaalchi Shuu'aal gassoo Oofiraa yakkam uulli kolli marukko.

¹⁸La'm gaalchim Beetihooroo'n kolli marukko. Sax gaalchi Xaboo'ii'm cebbiinsi udma'i illagenne yoo tochchi uulla higukko.

¹⁹Ee doollenne Isra'ee'l uullanne xaara tumaa baxoo anga qoor manni hee'ukkoyyo. Mashka'oomim Ibro'i manni bisa'aa bagadoo baxxambee'isa Filisxee'm manni hoottam hee'llo'o.

²⁰Ee bikkina Isra'ee'l minaadab hundim uulla abuullitam mu'uttuwwa hundam mutussiteena meesaanaa jajjaraa qareesseena Filisxee'm manni beyyo mattam hee'llo'o.

²¹Heeda qareesisimminaa mirigo'o abuullakkam ammane ushe'akkeena awwaaxxakkam losha mutussimminaa miqamoo bit soor giraama kee'mmoo kin bir hee'ukko. Abuulli mu'uttuwwa mutussimmina miqamoo bit eehanni lam suume hee'ukko.

²²Eehanniinsim ki'ukkok o'l ayyaamonne Saa'ooliinsii ixxi beet Yoonaataaniinsii bagaan Isra'ee'l gaadaa'n lambe'enne bisa'aa bagadoo amaddo'i keen hee'llo'oyyo.

²³Filisxee'm mannim Mikmaasinne higakkambee'isa hooroo mat gaalcha asse'llo'o.