Read Hadiyya 1 Saamu'eel Kitaaba 14 Bible Online

1 Saamu'eel Kitaaba 14 - Hadiyya bible

1 Saamu'eel Kitaaba 14

¹Mat balla Saa'ool beet Yoonaataan ixxeka o'l mu'uta iyyoo woraadichchina «Waare Filisxee'm manni gaadaa'n hegeego mallona» yukko. Ihukkaarem ka woshsha Yoonaataan ixxi anni Saa'oolinam kurukkoyyo.

²Ee ammane Saa'ool Giibi'iinsi lobakata qee'lloo'n Miigroonanne mat Roomaa'n haqqichchi lugumonne wiiddanaa hee'ukko. Ixxenne maqirem loh xibbi gaadaan hee'ukko.

³Seelo'onne Waa'ina qeessichchi hee'u Eeli'i beet, Fiinihaas beet, Iikaabood abbaayyi Ahiixoob beet, Eefuuda edde'am hee'u Akiiym ixxenne maqirem hee'ukko. Ixxuwwim Yoonaataan maru beyyo laqqo'oyyo.

⁴Yoonaataan Filisxee'm manni wiiddanta'a yo'i beyyo afeena Miikmaasa higakkam googinne higimmi hasisam hee'ukko. Ee higakkam beyyi makkinnee qeddinnee Booxeexaa Seenaa yakkam lam qeeraa'l kin hee'ukko.

⁵Ee kinneewwiinsim mat ee higakkam beyyiinsi hanaa'n qarinne Miikmaas illaginne hee'oohan ihukkuuyyi la'mmek odim woroo'n qarinne Geebaa'i illagenne hee'oohan hee'ukko.

⁶Yoonaataanim ixxi o'l mu'uta iyyoo woraadichchina «Waare! Ee ballachchantobee'i keen wiiddanta'a yo'i beyyo mallona. Ayyi la'ukko Waa'i niina hara'mmeena xanookko. Lobakatinnem ihukko hofqaxinne Waa'i kaachcha uwwaa gatiseena hooroo luwwi bee'e» yukko.

⁷Oo woraadichchim «At doo'llitti luwwi hundam isse. An kiinniinsi annanni ihoommoyyo. Iihaanninne wo'm wodaninnem kiinninnette» yukko.

⁸Yoonaataanim «Ihona! Eehid ihulas eeqido fillona; Filisxee'm manninam moo'ammona.

⁹Ixxuwwim ‹Neese waalleembe'e ee beyyonne egellehe› yitolas yoommine'i beyyonne egelloommo.

¹⁰Ihukkaarem ‹Ni beyyo waallehe› yitolas ixxuwwi beyyo malloommo; oohim neese Filisxee'm manna kaa'nnoomisa Waa'i issaakkoo mare'i ihookko» yukko.

¹¹Ixxuwwim fitta'a Filisxee'm mannina moo'anto'o. Filisxee'm mannim «Oono'o, mat mat Ibro'i manni maaxamto'i bariinsi fittamuulla» yaqqanto'o.

¹²Ee lasage Filisxee'm manni Yoonaataanaa ixxi o'l mu'uta iyyoo woraadichchoo weeshsha'a «Ki'nnuwwina kulloommi woshshi yoo bikkina ni kollonne waallehe» yito'o. Yoonaataanim ixxi o'l mu'uta iyyaanchina «Kaba eese awwone! Waa'i Isra'eelina Filisxeema higisaa uwwaakko» yukko.

¹³Yoonaataanim anginnee gurubbinnee ankakkarukkuuyyi iim firukko. Ixxi o'l mu'uta iyyaanchim awwonukko. Yoonaataanim Filisxee'm manna dangonnem qasaa ubbuusimma asheerukko; ixxi ubbuusu keenom o'l mu'ta iyyaanchi woraadichchi shukko.

¹⁴Luxxeka oranne mat abuulli beyyonne lamiyye ihoo qax manna shito'o.

¹⁵Hax uullanne hee'llo'i Filisxee'm manni hundim hambalaachchanto'o. Dangissam keenii hegeegonne gatto'i gaadaanii hundim baachchinne huxe'llo'o; Waa'i ixxuwwanne ubbuusu u'nnisoo hambalaachchanchiinsi ki'ukkok uulli huxe'ukko.

¹⁶Biiniyaam gassi woronne Gibi'aa yakkam beyyonne hee'llo'i Saa'ool gaadaan Filisxee'm gaadaan kolli hundinnem gibbamisa moo'llo'o.

¹⁷Saa'oolim ixxenne maqire hee'llo'i mannina «Hino'o, ni gaadaano xiggakka'a ka beyyiinsi marukkok ayyetda'e laqqehe» yaa ijaajukko. Xiggo'i ammanenne Yoonaataanii ixxi o'l mu'ta iyyaanchii ee beyyonne hee'llo'oyyo.

¹⁸Saa'oolim ixxi Qeessichchi Akiiyina «Eefuuda amaddaa waare» yukko. Akiiy ee balla Eefuuda edde'aa Isra'ee'l minaadaphphi illagenne hee'ukko.

¹⁹Saa'ool ee qeessichchinne atoorarukkuuyyim Filisxee'm mannik hambalaachchanchi exxukkuuyyi marukko. Saa'oolim qeessichchina «Waa'a xa'mmineena Kaba amman bee'e» yukko.

²⁰Ee lasage ixxi yo'i beyyiinsi ki'lla'a orina matto'o. Filisxee'm mannim duduqita'a ixxuwwina'i ixxuwwim ee beyyonne bisa'inne shaqqantam hee'llo'o.

²¹Filisxee'm manninne maqirem gaadina matta'a hee'llo'i mat mat Isra'ee'l manni Filisxee'm manna lagga'a Saa'oolannee Yoonaataanannee exxito'o.

²²Efiree'm uulli duunnuwwanne maaxamta'a hee'llo'i mulli Isra'ee'l mannim Filisxee'm manni gibbu'uuyyi yo'isa macceesso'o. Ee bikkina ixxuwwi kolli o'l gogotinne mat ikka'a Filisxee'm manna hollansimma asheetto'o.

²³Ee'isam Beeti'aawee'n beero'iinsi eeqiddonne yoo goog hundannem afeebe'e matta'a qasso'o. Waa'im ee balla Isra'ee'l mannina agaagaa gatisukko.

²⁴Saa'oolim «Kaballa i diina'ika baado fireembe'e hurbaata itoo manchi ayyim duumamaakkoohan ihona» yaa minaadaba hidiisaa hee'u bikkina ee balla Isra'ee'l manni sibaatta'a hooggo'o. Ee bikkina ee balla Isra'ee'l mannik mat manchim hurbaata itukkoyyo.

²⁵Ixxuwwim lobakat haqqi yoo beyyo affa'a beyyi hundannem marabo siiddo'o.

²⁶Haqqi hundim marabo iyyaakkoohan ihukkaarem Saa'ool duuncha baddito'i bikkina ee marabiinsi duuqukkok ayyim hee'ukkoyyo.

²⁷Ihukkaarem Yoonaataan ixxi anni minaadaba hidiisukkisa macceesubee'i bikkina amadu biccinne maraphphi damaamiinsi ki'isaa hofqax marabom itukko. Ee ammanem ixxi malaayye siidukko; ixxekim illi caakkaa moo'ukko.

²⁸Ihukkaarem gaadaaniinsi mat «Neese hundim sibaallaa hoongaammo. Ihukkaarem kiyyanni ‹Kaballa mah hurbaatam itoo manchi duumamaakkoohan ihona› yaa qoxxisaa kuraakko» yukko.

²⁹Yoonaataanim «Iyyanni ni minaadabanne afisu hawwi hinkaa'nna kee'mmaalla! gootto'i marabo siidaa itummi bikkina malaayye siidummisaa i illim caakkaa moo'ukkisaa moo'e!

³⁰Kaballa ni minaadab diina'a kaa'aa qeefadaa siidu hurbaatiinsi itaakkoohan yakkota'n hinkaa'nna eran hee'ukko; Filisxee'm mannikam hinkaa'nna sheena xanam hee'uda'e hino'o sawwihe!» yukko.

³¹Ee balla Isra'ee'l manni Miikmaasiinsi Ayyaaloonanne yoo googonne hundannem hollansitu'uuyyi qassimminne Filisxee'm manna kaa'llo'o. Ee ammane Isra'ee'l manni sibaatto'i bikkina lobakata hoogga'a hee'llo'o.

³²Ee bikkina diina'iinsi siiddo'i qeefado'iinsi aa'llu'uuyyi gereebba, laroo wo'llaa batbatita'a aa'llu'uuyyi siiddo'i beyyonne hundannem duttu'uuyyi maara xiiginnem itimma asheetto'o.

³³Saa'oolinam «Ka moo'e ku minaadab xiigaam maara ittu'uuyyi Waa'i illagenne baaxiilo baxxo'ookko» yakkam woshshi ixxi beyyo afukko. Saa'oolim «Kuk lagimmi mare'e! Hino'o, mat geejji kina onkoroollissakka'a kid eebbehe» yaa laarukko.

³⁴Ee lasage mulli ijaajom «Minaadaphphi beyyo mattakka'a ‹Ki'nnuwwika laroo gereebbaa hundam eebbehe; ixxuwwam duttakka'a ka beyyonne itimmi hasisookko; xiigaam aashaalli maara itimminne Waa'i illagenne baaxiilo baxxakkotte› yitakka'a kullehe» yaa ijaajo higisukko. Ee bikkina minaadab ee hiimo ixxuwwika laroo gereebbaa hundam eebba'a ee beyyonne dutto'o.

³⁵Saa'oolim ee beyyonne Waa'ina kitima hincaa'akkam beyyo baxukko. Oo ixxi baxu kit'm beyyim luxxanem hee'ukko.

³⁶Saa'oolim ixxi gaadaano «Kaba dillinaa Filisxee'm minaadaba qansona soodeebe'i afeebe'em ixxuwwi diinate bongaa guullinona» yukko. Ixxuwwim «Kiina eroka labaa moo'amu luwwi hundam isse» yito'o. Ihukkaarem qeessichchi «Gaassinaa Waa'a xa'mminona» yukko.

³⁷Saa'oolim «Filisxee'm minaadaba qansonnihe? Kaachcham niina uwwitoohonnihe? yaa Waa'a xa'mmukko. Ihukkaarem Waa'i ee hiimo maham dabarukkoyyo.

³⁸Ee lasage Saa'ool ixxi minaadaphphi awwonsaanina «Kid hincitakka'a kaballa hinkido'i baaxiil baxamuda'e saarayyitakka'a laqqehe.

³⁹Jora baxaa siidamu manchi i beet Yoonaataanattem yakkota'n lehinne guzumo'amoohan ihukkisa Isra'ee'l minaadabina kaachcha uwwu hee'oo Waa'i summinne hide'oommo» yukko. Ihukkaarem matem dabachcham uwwoo manchi siidamukkoyyo.

⁴⁰Ee lasage Saa'ool «Ki'nnuwwi hundim ee kollinne uullehe; anii i beet Yoonaataanii odim ka kollinne uullinoommo» yukko. Ixxuwwim kiina danaa moo'amu luwwa isse» yito'o.

⁴¹Saa'oolim Isra'eelina Moollanni ihu Waa'i kolli «Waa'a! Kaballa iina mahina dabachcha hoottitto? Isra'ee'l Moollanni ikkitti Waa'a! Ka keesamu kinneewwi mashka'inne iina dabachcha uwwe; keese hawwondummok Yoonaataan te'im anetti inkaammoolas ka Uriiminne ka keese hawwodukkok ki minaadab Isra'eel ihaakkoolas ka Tumiiminne dabachcha uwwe» yukko. Dabachchoomim Yoonaataanaa Saa'oolaa moo'isukkaare minaadab muccurukko.

⁴²Ee lasage Saa'ool «I beet Yoonaataanannee eesennee saamo issehe» yukko. Saamim Yoonaataananne firukko.

⁴³Ee lasage Saa'ool Yoonaataanina «Issitti luwwi maha?» yaa xa'mmukko. Yoonaatanim «Hofqax marabom biccinne qasaa duuqaammo. Oono'o ka beyyonne yoommo lehinam gudaammo» yukko.

⁴⁴Saa'oolim «Waa'i eesenne oogatona; at lehinne guzumo'anchiinsi gattooyyo» yukko.

⁴⁵Ihukkaarem minaadab Saa'oolina «Isra'eelina ka lob kaachcha siidisu Yoonaataan lehimmi laboohanennihe? Ee'isa ihooyyo. Lehimmi gataa ixxi horoo'l saraatik matichchim uboobee'isa hee'oo Waa'i summinne hide'nnoommo. Kaballa ixxi issu luwwi hundim Waa'i hara'mmatinne ihaakkoohane» yito'o.

⁴⁶Ee lasage Saa'ool Filisxee'm manna hollansimma urukko. Ixxuwwim daba'llita'a ixxuwwi uullam matto'o.

⁴⁷Saa'ool Isra'eelanne adil ihaa lasage hundem beyyonnem yo'i diina'a qasukko. Oo diina'im Moo'aaphphane, Aamoo'nnane, Eedoo'm minaadaba, Xooba'i adilluwwaa Filisxee'm mannaa hee'llo'o. Ixxim ora oramu beyyonne hundannem kaa'ukko.

⁴⁸Gitannoominne oramaa Amaaleeq minaadab gatoo'n kaa'ukko. Ixxim Isra'ee'l minaadaba ixxuwwi diina'iinsi gatisukko.

⁴⁹Saa'oolikim goo'n oos Yoonaataanatte, Yishiwiinattee Maalkiishu'attee hee'llo'o. Lob landichchom Meeraabette ihukkuuyyi hoffotem Meelkoolette hee'llo'o.

⁵⁰Ixxi arem Ahimaax landichcho Ahino'aamette hee'llo'o. Ixxi gogoxxi ijaajaanchim ixxi annabbaayyi Neer beet hee'u Abaaneeratte hee'ukko.

⁵¹Saa'ool anni qiisii Abaaneer anni Neerii Abi'eel oos hee'llo'o.

⁵²Saa'ool hee'u doollenne hundannem Filisxee'm manninne kee'mmaalli or hee'ukko. Ee bikkina Saa'ool qoxar manna siidoo amman hundam ixxi gaadaanonne edam hee'ukko.