Read Hadiyya 1 Saamu'eel Kitaaba 15 Bible Online

1 Saamu'eel Kitaaba 15 - Hadiyya bible

1 Saamu'eel Kitaaba 15

¹Saamu'eel Saa'oolina «Isra'ee'l minaadabina an keesee doo'llaa adil issoommisina Waa'i asse'ukkok anette; kabadem hundam xanoo Waa'i kuroo woshsha macceese.

²Waa'i Amaaleeq manna guzumo'eena murte'aakko; Isra'ee'l minaadab Gibxiinsi fitto'i ammane ka Amaaleeq mannik lugu'm anno'i uullixanta'a hee'llo'o.

³Amaaleeq manna dangonnem mattaa qassaa ixxuwwina yoo luwwa hundam bi'ise; mat luwwam gatissoobee'isa goona, meento, ooso, Ciilluwwa, laro, gereebba, gaameela'aa hallaa hundam shihe» yukko.

⁴Saa'ool ixxi gogota hundam weeshaa Xeeleema yakkam beyyonne xigukko; ixxi gaadaa'nnekim xig Isra'eeliinsi lam xibbi kuma, Yihudiinsi tommi kum hee'ukko.

⁵Ee lasage ixxii ixxi gaadaanii Amaaleeq beero'o matta'a mat cebbi woronne maaxamta'a egetto'o.

⁶Isra'ee'l manni Gibxi uulliinsi fitto'i ammane ixxuwwi anno'i ixxuwwina eroomma issito'i Qeene'i oos beyyo «Amaaleeq manninne ki'nnuwwa edaa bi'isoombee'isa annanni ikkakka'a mulli beyyo mallehe» yaa qoxxaalli asso asse'ukko; ixxuwwim ee beyyo fatakita'a matto'o.

⁷Saa'oolim Hawwiilaa yakkammi beyyiinsi ki'isaa Gibxi uullanne eelliinchi firinne yoo Shuura massoo goog afeebe'e qasukkuuyyi Amaaleeq manna kaa'ukko.

⁸Amaaleeqina adil hee'u Agaago foorinnem amadaa qeefadukko; ixxi minaadabam guullukko.

⁹Ihukkaarem Saa'oolii ixxi gaadaanii Agaago shitoo'n gatisso'o; ee'isam doo'l, doo'l gereebba, laro, di'ir mirgo'uwwaa geexxuwwaa ee keeninne maqirem er luwwi hundam bi'isso'oyyo; ihukkaarem ixxuwwi bi'isso'ok xale'i awwaadoobee'i shufur luwwi hee'ukko.

¹⁰Ee lasage Waa'i Saamu'eelina

¹¹«Saa'oola adil issummi bikkina gaabbaammo; mashka'oomim ixxi eese awwonimma uraakko; i ijaajom egerukkoyo» yukko. Saamu'eelim ee woshshanne kichche'aa ee hiimo hundoomam Waa'i kollonne laarukko.

¹²Saamu'eelim soodaraarom ki'aa Saa'oolinne edameena marukko; ihukkaarem «Saa'ool Qarmeeloos duuna maraakko; ixxim ee beyyonne ixxo tiirakkam soodda baxaa ixxi lombina uullisaa daba'llaa Gelgela dillaakko» yakka'a kurakko'o.

¹³Saamu'eelim Saa'ool beyyo marukko. Saa'oolim «Saamu'eela, Waa'i keese maasse'ona; Waa'i ijaajo guullaa wonshaammo» yukko.

¹⁴Saamu'eelim «Eehaare ku an macceesoommi gereebbikii mirgo'uwwi muunii mahane?» yaa xa'mmukko.

¹⁵Saa'oolim «Ku keen i gaadaan Amaaleeq manniinsi qeefadda'a eebbo'oo keeno; gereebbikaa la'llekaa doo'l doo'lla ki Moollanni Waa'ina kitim issakka'a hincaa'akkona eebbo'ookko; ihukkaarem mulli keeno guullinaa bi'insaammo» yaa dabarukko.

¹⁶Saamu'eelim «Kaba ihookko! Waa'i iina hii'mmo'o kuru luwwa kiina kuroommo» yukko. Saa'oolim «Hino'o kure» yukko.

¹⁷Saamu'eelim «At ki gaga hoffiissaa moo'llittaarem Isra'ee'l sulluwwina awwonsaanchoyyonnihe? Waa'im Isra'ee'l minaadabina adil ikkoo'isina keese annannissaa doo'llaakko.

¹⁸Ee lasage ixxi ee baaxiilaan Amaaleeq minaadaba kumaaddoo'isina keese asse'aakko; ixxuwwi beedditeebe'i afeebe'e ixxuwwa shihe yaa kuraakko.

¹⁹Eehannah mahina ee ijaajo wonshittoyyo? Qeefadimmina gollitaatta Waa'a liiransoobee'i baxo mahina baxxitto?» yukko.

²⁰Saa'oolim «An Waa'i ijaajo egeraammo; eese ijaajukkisannem gaadaammo; xale'i adil Agaago amadaa waaraammo bagaan mulli Amaaleeq minaadaba hundam shaammo.

²¹Ihukkaarem i gaadaan doo'llito'i doo'l, doo'l gereebbaa laroo shito'oyyo; eekka issimmi bikkenne Gelgelanne ki Moollanni Waa'ina kitim issakka'a hincaa'akkamisina eebbo'ookko» yaa dabarukko.

²²Saamu'eelim «Waa'i hinka iittoo labookko? Ijaajanchannii hurbaaxxekkaa mulli kitimaa hincaa'imma? Ixxena ijaajamimmi doo'l gereebbi kitima hinca'immiinsi lophphookko.

²³Waa'anne boqqimmi kiirimmisa; xiiqqamimmim qophpha'n waa'anne otossimmisa baaxiil ihaa xigamookko. At Waa'i ijaajo gadditti bikkina ixxim adil ikkittisa hee'lloobee'isa keese gadaakko» yukko.

²⁴Saa'oolim «Eeyya! An baaxiilo baxaammo. I gaadaano baddummi bikkina Waa'i ijaajoo at uwwitti awwonsaa uraa ixxuwwi hasso'i luwwa issaammo.

²⁵Ihukkaarem i bi'ishsha uraammo yitoo'isina an keese uunxoommuulla; iinninne maqirem Gelgela mallona anim ee beyyonne i Waa'ina otossoommo» yukko.

²⁶Saamu'eelim «An kiinninne maqire maroommoyyo; at Waa'i ijaajo gaddaatto. Waa'im at Isra'eelanne adil ikkittisa hee'lloobee'isa keese gadaakko» yukko.

²⁷Ee lasage Saamu'eel daba'llaa mareena ki'ukkaare kaabbika kasa amadukkaare dereeramukko.

²⁸Saamu'eelim Saa'oolina Waa'i Isra'ee'l adillano ki angiinsi dereeraa kiinniinsi e'lloo mulli manchina higisaa uwwaakko.

²⁹Isra'ee'l minaadabina lombi ihu Waa'i qophphanooyyo. Ixxi saawitem dabassooyyo; Waa'i mannisa ihubee'i bikkina ixxi sawwite dabassooyyo» yukko.

³⁰Saa'oolim «Hanqinam an hawwodaammo. Ihona bagaan mulli luwwi gatukkaarem i minaadaphphi awwonsaa'n illagennee Isra'ee'l minaadaphphi illagennee eese lonse; ki moollanni Waa'inam otossoommisina iinninne maqirem mallona» yaa uunxukko.

³¹Ee bikkina Saamu'eel ixxenne maqirem Gelgela marukko. Saa'oolim Waa'ina otossukko.

³²Saa'mu'eelim «Adil Agaago keyye eebbehe!» yaa ijaajukko; Agaagim baa'aa huxe'ukkuuyyi ixxi beyyo waarukko; ixxi wodanonnem «Leh hinkido'i qaraaraalla?» yaa Saawwam hee'ukko.

³³Ee ammanenne Saamu'eel «Ki bisa'i lobakat ammo'o oos bee'an issukkisam kiyyummam kaballa oos bee'etan ikkamo» yukko. Ee lasage Gelgelanne yoo Waa'ina kitima hincaa'akkam luwwi illagenne Agaago muransaa ubbuusukko.

³⁴Ee lasage Saamu'eel Raama'a marukko. Adil Saa'oolim Gibi'a marukko.

³⁵Ee balliinsi ki'isaa Saamu'eel hee'u doollenne hundannem adil Saa'oola od moo'ukkoyyo. Ihukkaarem Waa'i Isra'eelanne Saa'oola adil issu bikkna gaabbukkaare Saamu'eel kichche'aa wi'llam hee'ukko.