Read Hadiyya 1 Saamu'eel Kitaaba 16 Bible Online

1 Saamu'eel Kitaaba 16 - Hadiyya bible

1 Saamu'eel Kitaaba 16

¹Waa'i Saamu'eelina «Isra'ee'l minaadabanne adil ihaa hee'oo'isina an ixxo hasumbee'i bikkna at Saa'oolina kichche'llaa wi'llitoottok hinki balli afeebe'e? Eekka uttaa wee'l zayta buudonne wonshitaa amaddaa Beteliheemanne hee'oo Issayyi mine mare. Ixxi oosiinsim mato adil ihoo'isina doo'llaammo» yukko.

²Saa'mu'eelim «Kaka issimmi iina hinkid xanamookko? Mashka'oomim Saa'ool kaka macceesukkaare eese shookko» yukko. Waa'im « ‹An Waa'ina kitima hincaa'eena waaraammo› yitaa addichcho amaddaa mare.

³Issayyem ee kiti'm beyyo weeshe; anim at issitoo luwwa kuroommo; an kiina moo'isoommi manchom doo'llitaa adil issitootto» yaa dabarukko.

⁴Saamu'eelim Waa'i ijaaju luwwa isseena Beetaliheema marukko. Ee beyyo afukkisam ee beero'i awwonsaan baa'lla'a huxe'llu'uuyyi Saamu'eel beyyo hincita'a «Waattittok xumminateminnihe?» yit'a xa'mmito'o.

⁵Ixxim «Eeyya! Xumminatte; Waa'ina kitima hincaa'eena waaraammo; ki'nnuwwim gaga keessakka'a i kolli Waallehe» yaa dabarukko. Ee lasagem Issayyee ixxi abaroosaa keesaa kiti'm beyyo weeshukko.

⁶Ee beyyo affo'i ammanenne; Saamu'eel Eeli'aaba moo'aa «Hanqinam Waa'i doo'llu manchi oono'o Waa'i illagenne uullaakko» yaa sawwukko.

⁷Ihukkaarem Waa'i «Eeliyaabika uullichchaa danoo moo'llitte an ixxo gadaammo. Waa'i moo'ookkok manni moo'oo'isayyo. Manni hane moo'ookko. Ihukkaarem Waa'i wodano moo'ookko» yukko.

⁸Ee lasage Issayye Aminaadaaba weeshaa Saamu'eel beyyo eebukko. Ihukkaarem Saamu'eel ‹Kaka Waa'i doo'llukkoyyo» yukko.

⁹Odim Issayye Shaamaa yakkam ixxi beeto hincaa'ukko. Ihukkaarem Saamu'eel ixxom Waa'i doo'llukkoyyo» yukko.

¹⁰Issayyem ee'isinne ixxeka lamarem oosom Saamu'eel illagenne hincaa'ukko. Ihukkaarem Saamu'eel kakeeniinsi matom Waa'i doo'llukkoyyo» yukko.

¹¹Odim Issayyena «Ki oos xale'i ka qaxammennihe» yaa xa'mmukko. Issayyem «Hundiinsim hoffe'oo mat beet yookko. Ihukkaarem ixxi gereebba allaaraakko» yaa dabarukko. Saamu'eelim ixxo manna asse'llaa weeshisseebe'i afeebe'e kitima hincaa'nnoommoyyo» yukko.

¹²Ee bikkina Issayye weeshisukko. Ixxim mishisoo illi kolli danaam er beet hee'ukko. Waa'im Saamu'eelina «An doo'llummok kane ki'llaa zayta labe» yukko.

¹³Saamu'eelim wee'l zayti wo'mmaa hee'u buudo ki'isaa ixxi abbaayyuwwi illagennem Daawiitanne labukko; ee ammanchom Waa'i Ayyaan Daawiitanne dillukko. Ee balliinsim ki'isaa ixxeensi annanni ihukkoyyo; eehanniinsi lasage Saamu'eel Raama'a daba'llaa elle'ukko.

¹⁴Saa'ooliinsi Waa'i Ayyaan annanni ihu bikkina Waa'iinsi asse'amu jor ayyaan u'nnisam hee'ukko.

¹⁵Ixxi awwaadaanim «Oono'o, keese u'nnisoollak Waa'iinsi asse'amaakkoo jor ayyaana.

¹⁶Ee bikkina adila, diitta'inne zammareena xanoo mancho hansaa eemboommo neese ijaaje; ee lasage jor ayyaan keesenne waaroo ammane oo manchi kiina diitta lelloohaare at gaassisam fayya'i ikkootto» yito'o.

¹⁷Saa'oolim «Diitta erisa lelloo mancho hassakka'a eebbeehe» yukko.

¹⁸Ixxi awwaadaaniinsim mat «Diitta danaamisa lelloo Beeteeliheemanne yoo Issayyi beeto moo'aammo; ixxim geeda, qoxxalli gaadaancho, wocoo'isannem qoossimmi yoohanee liiranchinne wo'mmaakkoohanee Waa'im ixxenne maqire yoohanee» yaa dabarukko.

¹⁹Ee lasage Saa'ool «Gereebba allaaroo ki beet Daawiita iina asse'e» yaa Issayyi beyyo manna asse'ukko.

²⁰Issayyem daabbo'oo woyi'n diqaasaa cananne wonshaa hallichchonne iyyiisaatii fellakkichchi qeexa amadiisaatii ixxi beet Daawiita Saa'ool beyyo asse'ukko.

²¹Daawiitim Saa'ool beyyo waaraa ixxi awwaado asheerukko. Saa'oolim lobakata iittu bikkina ixxeka o'l mu'uta amadaanchi issukko.

²²Ee lasage Saa'ool «Daawiita iittaammo; i beyyonne ihaa iina awwaadoo'isina uwwe» yaa Issayyi beyyo asse'ukko.

²³Ee ammaniinsi ki'isaa Waa'i beyyiinsi jor ayyaan Saa'ool hanenne waaroo amman hundam Daawiit diitta lelloo ammane Saa'ooliinsi oo jor ayyaan firam hee'u bikkina fayye'am hee'ukko.