Read Hadiyya 1 Saamu'eel Kitaaba 19 Bible Online

1 Saamu'eel Kitaaba 19 - Hadiyya bible

1 Saamu'eel Kitaaba 19

¹Saa'ool Daawiita shitamisina ixxi beet Yoonaataaninaa ixxi gassaan ikko'i Daannuwwinaa hundinam kurukko. Ihukkaarem Yoonaataan Daawiita lobakata iittam hee'ukko.

²Yoonaataanim «Iyyanni Saa'ool keese sheena makka hasoolla; sooxxi dara ki gaga ege'lle; mat daphphit beyyonne maaxantaa egere.

³Anim firaa at maaxanti beyyonne iyyanni gadanonne uulloommo. Ki bikkinam atoorassoommo. Ixxeensi macceesummi woshsham kiina kuroommo» yukko.

⁴Yoonaataanim ixxi anni Saa'oolina Daawiit bikkina er woshsha wocukkuuyyi «Adila, ki awwaadaanchi Daawiitanne jora issititte; ixxi keese hawwodukkoyyo. Ixxi issu luwwim kiina lobakata awwaadaakko.

⁵Daawiit Gooliyaada shukkok murte'aa ixxi gaga higisaa uwwaateyyonnihe? Waa'i Isra'ee'l minaadab hundinam kee'mmaalli kaachcha eddeesukko. Atim eekka moo'llaatta liirantitto. Eehannah ixxo kora'am shimminne Daawiit'nnoo'i muccur manchonne mahina jor luwwa issitoohane?» yukko.

⁶Saa'oolim Yoonaataan woshsha macceesaa lasonne «Hee'oo Waa'i la'ona Daawiita shakkammoyyo» yaa hide'ukko.

⁷Ee bikkina Yoonaataan Daawiita weeshaa ka woshsha hundam kuraa lasonne Saa'ool beyyo hincaa'ukko. Daawiitim illagee'nnisam adii'l illagenne awwaadimma asheerukko.

⁸Filisxee'm manninne hee'u or odim ki'ukko. Ihukkaarem Daawiit firaa kee'mmaallisa dangisaa qasamukko. Ixxuwwim kaa'anto''i bikkina gibba'a matto'o.

⁹Mat balla Waa'iinsi asse'amaakkoo jor ayyaan Saa'oola amadukko. Ee bikkina ixxi bagado anganne amadukkisam ixxi minenne afuuraa hee'ukko. Daawiitim ee beyyonne diitta lellam hee'ukko.

¹⁰Saa'ool Daawiita qasaa gortannanne edaa ureena sawwaakka amadu bagado huushukko. Ihukkaarem Daawiit koratukkaare bagad gortannanne kaaxxukko. Daawiitim ee beyyiinsi gibaa xorukko.

¹¹Ee hiimom Daawiitika mine kibbita'a soodaraar daranne shitona Saa'ool manna asse'ukko. Daawiit mi'n ama Meelkoolem «Kaballi maaro'o ki gaga gatixxitbeelas soox dara shakkeenatte» yita'a qoxxissa'a kutto'o.

¹²Isem maskootinne fissita'a dilliisso'aare gibaa xorukko.

¹³Ee lasage Meelkoole is abaroos otossoo qophpha'n waa'i misila Daawiit ara'anne iinsiisso'o. Horoo'llagannem fella'i oddinne baxamaakkoo barkuma dissita'a eddechchinne ifiisso'o.

¹⁴Daawiita amaddona Saa'ool asse'u manni waatto'i ammanenne Milkoole «Ixxi xissaa iinse'aakko» yito'o.

¹⁵Saa'oolim «An i gagim ixxo shoommo ara'innem iyyitakka'a eebbehe» yaa ee manna dabaraa asse'ukko.

¹⁶Oo asse'anto'i mannim mine aagga'a moo'llo'i ammanenne; ara'anne iinse'aakkoo qophpha'n waa'i misilaa ixxi horoo'l aganne fellakichchi oddinne baxamaakkoo barkumaa xale'e siiddo'o.

¹⁷Saa'oolim Meelkoolena «I diinakkichchi xorona ka hantaaro baxxaa mahina eese qawwiissitto?» yaa xa'mmukko. Meelkoolem « ‹Xoroommisina hara'mme; oo beelas an keese shoommo› yukko» yita'a dabatto'o.

¹⁸Daawiitim gibaa xoraa Saamu'eel hee'oo Raama'a marukko. Saa'ool ixxo hawwodu hawwojji hundam kurukko. Ee lasage Saamu'eelii Daawiitii Raama'anne yoo Naayootanne matta'a afuutto'o.

¹⁹Saa'oolinam «Daawiit Raama'anne yoo Naayootanne yookko» yakka'a kurakko'o.

²⁰Ee bikkina Daawiita amaddam manna Saa'ool asse'ukko. Ixxuwwim ee beyyo affa'a Saa'mu'eel awwonsatinne wixxito'oo hiraagaan sagara iimmaa'lla'a hiraago woccu'uuyyi moo'llo'i ammanenne Waa'i Ayyaan Saa'ool asse'u mannanne dillukko. Ixxuwwim ee'isam hiraago wocco'o.

²¹Saa'oolim ka woshsha macceesu ammanenne la'mmekam mulli manna asse'ukko. Ixxuwwim hiraago wocco'o. Saxxekam Saa'ool mulli manna asse'ukko ixxuwwim ee'isam hiraago wocco'o.

²²Lasaanchonne ixxi gagim Raama'a marukko. Eekke'em Sekku yakkam beyyonne yoo mat lob geejji wo'i bar yoo beyyo afaa «Saamu'eelii Daawiitii hee'llamok hannonnette?» yaa xa'mmukkaare Naayootanne yo'isa kurakko'o.

²³Ee bikkina Saa'ool Raama'anne yoo Naayoota marukkuuyyam Waa'i Ayyaan ixxonnem dillukko. Ixxim Naayoot afeebe'e googonne hiraago wocukkuuyyi marukko.

²⁴Ixxim eddechcha sheelaxxaa Saamu'eel illagenne odim hiraago wocukko. Ee'isinne ballaa hiimoo hundoomam kallemaram iinse'aa hosukko. Saa'oolim «Odim hiraagaaniinsi matisa xigamukkonnihe?» yakkam yanni waarukkok ee mashka'innette.